Bakı Ekspo Mərkəzindən dünyaya verilən strateji mesajlar

Bakı:

27 °C

51 %

7 m/s

Əlaqə

AZ RU EN

Ana səhifə / YAP xəbərləri / Bakı Ekspo Mərkəzindən dünyaya verilən strateji mesajlar

Bakı Ekspo Mərkəzindən dünyaya verilən strateji mesajlar

03.06.2026 [21:17]

Bakı Ekspo Mərkəzində işinə başlayan 31-ci Bakı Enerji Həftəsinin rəsmi açılış mərasimi və burada Azərbaycan Respublikasının Prezidenti İlham Əliyevin proqram xarakterli, dərindən təhlil edilmiş nitqi ölkəmizin qlobal enerji arxitekturasındakı yerini, qazandığı tarixi uğurları və gələcək hədəflərini növbəti dəfə bütün dünyaya nümayiş etdirdi. Bu mötəbər beynəlxalq platforma dünyanın 46 ölkəsindən 270-dən çox nüfuzlu şirkəti, dövlət rəsmilərini və beyin mərkəzlərini vahid məkanda birləşdirərək, Azərbaycanın qlobal enerji sektorundakı strateji rolunu və ölkəmizə olan sarsılmaz beynəlxalq inamı bir daha təsdiqlədi. Dövlət başçısı öz çıxışında Xəzər Neft və Qaz Sərgisinin keçdiyi tarixi yola toxunaraq, bu tədbirin hələ müstəqilliyimizin ilk ağır illərindən etibarən müasir Azərbaycanın müstəqil enerji siyasətinin, xarici investisiya axınının və uzunmüddətli iqtisadi müstəqilliyinin möhkəm bünövrəsini qoyduğunu xüsusi vurğuladı. Keçmişə nəzər saldıqda aydın görünür ki, Ümummilli Lider Heydər Əliyevin uzaqgörənliklə əsasını qoyduğu və 1994-cü ildə imzalanan "Əsrin Müqaviləsi" olmasaydı, bu gün regional və qlobal miqyaslı layihələrdən danışmaq qeyri-mümkün olardı.

Builki forum həm də Azərbaycanın enerji salnaməsində müstəsna və tarixi bir yubileyə təsadüf edir. Dünyanın ən iri qaz-kondensat yataqlarından olan “Şahdəniz” müqaviləsinin imzalanmasından dəqiqliklə 30 il ötür və Prezident İlham Əliyev bu tarixi hadisənin ölkənin qaz hasilatında, ixracatında və ümumi geosiyasi çəkisinin artmasında dönüş nöqtəsi, tamamilə yeni bir səhifə olduğunu qeyd etdi. Azərbaycan qazı dünyanın 16 ölkəsinə tədarük edilir və bu dövlətlərdən 10-u məhz Avropa İttifaqının üzvüdür. Bu statistika təkcə Azərbaycanın etibarlı tərəfdaş imicini deyil, həm də boru kəməri qazının şaxələndirilməsində qlobal liderliyini və bütövlükdə Avropanın enerji təhlükəsizliyinin əsas dayaqlarından birinə çevrildiyini aydın göstərir. Eyni zamanda, açılış mərasimində ABŞ Prezidenti Donald Trampın tədbir iştirakçılarına ünvanladığı xüsusi məktubun oxunması və Bakıda keçirilən rəsmi ikitərəfli görüşlər iki ölkə arasındakı strateji enerji tərəfdaşlığının və rəsmi Vaşinqtonun Azərbaycanın regional layihələrinə verdiyi yüksək qiymətin növbəti bariz göstəricisidir.

Müstəqilliyin ilk illərində layihələr üçün yalnız xarici kapitaldan asılı olan Azərbaycan, bu gün artıq özü qlobal səviyyədə kapital ixrac edən ölkəyə çevrilib. Hazırda Dövlət Neft Şirkəti – SOCAR təkcə ölkə daxilində deyil, Yaxın Şərq, Afrika, Balkanlar və Mərkəzi Asiya regionlarında irimiqyaslı investisiya layihələrinin fəal iştirakçısı, neft-kimya komplekslərinin sahibi və birbaşa qlobal investoru qismində çıxış edərək ölkəmizə əlavə iqtisadi dividendlər qazandırır.

Dövlət başçısı öz nitqinin sonunda Bakı Enerji Forumunda təqdim edilən yeni Yol Xəritəsinin əhəmiyyətini yekunlaşdırdı. Bu sənəd sadəcə növbəti illər üçün iqtisadi plan deyil, Azərbaycanın həm mövcud zəngin neft-qaz ehtiyatlarının səmərəli, ekoloji standartlara uyğun idarə olunmasını, həm də gələcəyin təmiz, ekoloji cəhətdən təhlükəsiz yaşıl enerji hədəflərini tam uzlaşdıran mükəmməl və uzaqgörən bir strategiyadır. Azərbaycan qlobal arenada öz tərəfdaşlarına təkcə resurs deyil, həm də sabitlik, etibarlılıq və gələcəyə birgə addımlamaq fəlsəfəsi təklif edir.

Bakı Enerji Həftəsinin açılışındakı bu bəyanatlar bir daha sübut etdi ki, rəsmi Bakının formalaşdırdığı enerji siyasəti yaxın onilliklərdə də qlobal enerji xəritəsinin təhlükəsizlik və şaxələndirilmə sütunlarını müəyyən etməkdə davam edəcəkdir.

Samirə Zeynalova

YAP Tərtər rayon təşkilatının mühasibi

Paylaş:

Baxılıb: 427 dəfə