Müstəqil siyasətin növbəti uğuru

Bakı:

33 °C

32 %

4 m/s

Əlaqə

AZ RU EN

Ana səhifə / YAP xəbərləri / Müstəqil siyasətin növbəti uğuru

Müstəqil siyasətin növbəti uğuru

07.07.2026 [13:04]

Prezident İlham Əliyevin Avropa Komissiyasının Prezidenti Ursula Fon der Lyayen ilə Bakıda keçirdiyi görüş və mətbuata verdiyi bəyanat müasir dövrdə Azərbaycanın beynəlxalq münasibətlər sistemində tutduğu mövqenin daha da möhkəmləndiyini nümayiş etdirdi. Son dövrlərdə Avropa İttifaqının ali rəhbərliyinin Bakıya intensiv səfərləri təsdiqləyir ki, Azərbaycan artıq regionun deyil, daha geniş coğrafiyanın siyasi gündəliyində mühüm yer tutan dövlətlərdən birinə çevrilib.

Müasir beynəlxalq münasibətlərdə etibarlı tərəfdaş statusunu qazanmaq asan deyil. Bu, ilk növbədə ardıcıl siyasət, verilən öhdəliklərə sadiqlik və milli maraqlara əsaslanan praqmatik yanaşma tələb edir. Azərbaycan son illərdə məhz bu prinsiplərə söykənən xarici siyasət kursu həyata keçirərək müxtəlif siyasi mərkəzlərlə qarşılıqlı hörmətə əsaslanan münasibətlər formalaşdırmağa nail olub. Prezident İlham Əliyevin rəhbərliyi ilə həyata keçirilən balanslaşdırılmış diplomatiya ölkəmizin beynəlxalq etimad kapitalını əhəmiyyətli dərəcədə artırıb.

Bakıda keçirilən görüşün diqqətçəkən cəhətlərindən biri də tərəflər arasında dialoqun artıq ayrı-ayrı sahələrlə məhdudlaşmamasıdır. Müzakirələrin gündəliyinin genişliyi göstərir ki, Azərbaycan və Avropa İttifaqı münasibətlərə strateji baxış prizmasından yanaşırlar. Bu gün əməkdaşlıq siyasi dialoqdan iqtisadi əlaqələrə, nəqliyyat layihələrindən rəqəmsal transformasiyaya, enerji təhlükəsizliyindən regional sabitliyə qədər çoxşaxəli xarakter daşıyır. Belə bir gündəliyin formalaşması isə yalnız qarşılıqlı etimad şəraitində mümkündür.

Azərbaycanın xarici siyasətinin mühüm xüsusiyyətlərindən biri milli maraqları qlobal əməkdaşlıq imkanları ilə uzlaşdırmağı bacarmasıdır. Ölkəmiz heç bir siyasi blokun qarşıdurma alətinə çevrilmədən müxtəlif beynəlxalq tərəfdaşlarla bərabərhüquqlu münasibətlər qurur. Məhz bu müstəqil siyasət xətti Azərbaycanın həm Şərqdə, həm Qərbdə etibarlı tərəfdaş kimi qəbul olunmasına şərait yaradıb. Ursula Fon der Lyayenin Bakıya səfəri də Avropa İttifaqının bu reallığı nəzərə aldığını və Azərbaycanla uzunmüddətli əməkdaşlığa xüsusi önəm verdiyini nümayiş etdirir.

Prezident İlham Əliyevin bəyanatında xüsusi vurğulanan məqamlardan biri münasibətlərdə müşahidə olunan "görünməmiş dinamika" ifadəsi idi. Bu dinamika təsadüfi deyil. Son illər Azərbaycan regional təşəbbüslərin müəllifi, beynəlxalq layihələrin etibarlı iştirakçısı və mühüm siyasi proseslərin fəal tərəfi kimi çıxış edir. Ölkəmizin COP29-a uğurla ev sahibliyi etməsi, qlobal enerji və nəqliyyat layihələrində artan rolu, müxtəlif beynəlxalq platformalarda irəli sürdüyü təşəbbüslər onun beynəlxalq nüfuzunu daha da möhkəmləndirib. Avropa İttifaqının Azərbaycanla münasibətlərə artan marağı da məhz bu reallığın məntiqi nəticəsidir.

Bugünkü geosiyasi şəraitdə dövlətlərin nüfuzu yalnız iqtisadi imkanları ilə deyil, etibarlı tərəfdaşlıq mühiti yaratmaq bacarığı ilə də ölçülür. Azərbaycan bu baxımdan mühüm üstünlüklərə malikdir. Siyasi sabitlik, ardıcıl inkişaf strategiyası, beynəlxalq hüquqa əsaslanan mövqeyi və praqmatik diplomatiyası ölkəmizi beynəlxalq əməkdaşlıq üçün cəlbedici tərəfdaşa çevirib.

Prezident İlham Əliyevin Bakıda səsləndirdiyi fikirlər göstərir ki, Azərbaycanın xarici siyasət kursu öz səmərəsini verir. Ölkəmiz beynəlxalq münasibətlər sistemində təşəbbüs irəli sürən, etibarlı əməkdaşlıq platformaları yaradan və müxtəlif maraqları uzlaşdırmağı bacaran dövlət kimi mövqeyini getdikcə daha da gücləndirir. Bu isə Azərbaycanın qarşıdakı dövrdə də Avropa İttifaqı və digər beynəlxalq tərəfdaşlarla əlaqələrini yeni məzmun və keyfiyyət mərhələsinə yüksəldəcəyinə əminlik yaradır.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 192 dəfə