“Xocalısız 22 il”

Bakı:

27 °C

46 %

4 m/s

Əlaqə

AZ RU EN

Ana səhifə / YAP xəbərləri / “Xocalısız 22 il”

“Xocalısız 22 il”

26.02.2014 [09:35]

YAP Yevlax rayon təşkilatında Xocalı soyqırımının 22-ci ildönümünə həsr olunmuş anım tədbiri keçirilib
Yeni Azərbaycan Partiyası (YAP) Yevlax rayon təşkilatında Xocalı soyqırımının 22-ci ildönümünə həsr olunmuş anım tədbiri keçirilib. Əvvəlcə Xocalı faciəsi qurbanlarının və ölkəmizin müstəqilliyi uğrunda şəhid olmuş Vətən övladlarının xatirəsi bir dəqiqəlik sükutla yad edilib.
“Xocalısız 22 il” adlı tədbiri giriş sözü ilə açan YAP Yevlax rayon təşkilatının Aparat rəhbəri Əli Quliyev Xocalı faciəsinin səbəbləri haqqında ətraflı məlumat verib. Qeyd edilib ki, ermənilər və onların havadarlarının Xocalıda törətdikləri qırğınlar XX əsrin ən qanlı faciələrindən biridir: “Bir gecədə Xocalının yer üzündən silinməsində keçmiş Sovet ordusunun 366-cı motoatıcı alayı da yaxından iştirak edərək şəhərin dinc əhalisinə divan tutulmasında canfəşanlıq göstərib, nəticədə görünməmiş vəhşiliklər törədilib”.
Natiq, həmçinin, Xocalı soyqırımı haqqında tarixi həqiqətlərin beynəlxalq ictimaiyyətə çatdırılması istiqamətində Ümummilli liderimiz Heydər Əliyevin əsasını qoyduğu siyasi kursun bu gün ölkə Prezidenti İlham Əliyev tərəfindən uğurla davam etdirilməsindən, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, millət vəkili Mehriban xanım Əliyevanın gördüyü mühüm işlərdən, Heydər Əliyev Fondunun vitse-prezidenti Leyla Əliyevanın təşəbbüsü ilə təsis edilən “Xocalıya ədalət!” kampaniyasının təqdirəlayiq nəticələrindən ətraflı söhbət açıb.
Sonra çıxış edən YAP Yevlax rayon təşkilatı Qadınlar Şurasının sədri Əminə Əhmədova deyib ki, Azərbaycan Respublikasının Prezidenti İlham Əliyevin inamla həyata keçirdiyi daxili və xarici siyasət, erməni qəsbkarlığının ifşasına yönəlmiş uğurlu addımlar bəhrəsini verməkdədir. Xocalı soyqırımı haqqında həqiqətlərin dünya ictimaiyyətinə çatdırılması, Azərbaycan xalqı və ümumən insanlıq əleyhinə törədilmiş bu son dərəcə ağır hərbi cinayətin beynəlxalq miqyasda siyasi-hüquqi qiymətini alması məsələsi dövlət siyasətinin mühüm istiqamətini təşkil edir.
Tədbirdə çıxış edən Xocalı sakinləri həmin dəhşətli faciə ilə bağlı acı xatirələrini dilə gətiriblər. Natiqlər, həmçinin, bütün qaçqın və məcburi köçkünlərin, şəhid ailələrinin, müharibə əlillərinin, o cümlədən də Xocalı sakinlərinin ötən müddətdə hərtərəfli dövlət qayğısı ilə əhatə olunduqlarını vurğulayıblar. Sonda çıxış edən YAP Yevlax rayon təşkilatının sədr müavini Zərifə Məmmədova Xocalı qətliamının təqsirkarlarının haqlı cəzalarına çatacağına və xalqımızın işğal altındakı bütün torpaqlarını yağı düşməndən tezliklə azad edəcəyinə ümidvar olduğunu bildirib.
NADİR

Paylaş:

Baxılıb: 1217 dəfə