Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevə

Bakı:

18 °C

88 %

0 m/s

AZ RU EN

Ana səhifə / YAP xəbərləri / Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevə

Azərbaycan Respublikasının Prezidenti, Yeni Azərbaycan Partiyasının Sədri cənab İlham Əliyevə

05.10.2026 [19:06]

Azərbaycan Respublikasının Prezidenti,
Yeni Azərbaycan Partiyasının Sədri
cənab İlham Əliyevə

Hörmətli cənab Prezident!
Hörmətli cənab Sədr!

Yeni Azərbaycan Partiyasının VIII Qurultayında səsləndirdiyiniz mühüm və əhatəli fikirlərin, ölkəmizin keçdiyi şərəfli yolun, əldə olunmuş tarixi nailiyyətlərin və qarşıda duran strateji vəzifələrin bir daha aydın şəkildə ifadə olunması münasibətilə Sizi Yeni Azərbaycan Partiyası Qubadlı rayon təşkilatının çoxminlik üzvləri və rayon ictimaiyyəti adından səmimi-qəlbdən təbrik edir, möhtəşəm nitqiniz üçün minnətdarlıq hissi ilə bir daha dərin təşəkkürümüzü bildiririk!

Nitqinizdə Azərbaycanın ərazi bütövlüyünün və suverenliyinin tam bərpa olunmasını müstəqil dövlətçilik tariximizin mühüm mərhələsi kimi qeyd etməyiniz, bu tarixi zəfərlərin əldə olunmasında xalqımızın həmrəyliyinin və dövlətimizin qətiyyətli siyasətinin rolunu vurğulamağınız xüsusi əhəmiyyət daşıyır. Bildirdiyiniz kimi, 2023-cü il sentyabrın 20-də Azərbaycanın suverenliyinin və ərazi bütövlüyünün tam bərpası ilə ölkəmizin qarşısında yeni inkişaf mərhələsi açılmışdır.

YAP Qubadlı rayon təşkilatının üzvləri və qubadlılar üçün bu tarixi prosesin xüsusi mənəvi və ictimai əhəmiyyəti vardır. İşğaldan azad edilmiş rayonlarımızın, o cümlədən Qubadlı rayonunun bərpası və keçmiş məcburi köçkünlərin doğma torpaqlarına qayıdışının təmin edilməsi xalqımızın böyük arzularından biridir.

Nitqinizdə “Böyük Qayıdış” prosesinin bundan sonrakı illərdə daha da sürətləndiriləcəyini bildirməyiniz Qubadlı rayon ictimaiyyətində də böyük rəğbət və dərin minnətdarlıq hissi doğurur.

VIII Qurultayda qarşıda duran əsas vəzifələr sırasında dövlətimizin təhlükəsizliyinin daha da möhkəmləndirilməsi, iqtisadi inkişafın davam etdirilməsi, Qarabağ və Şərqi Zəngəzurun bərpası, xarici siyasətin milli maraqlar əsasında davam etdirilməsi və ideoloji işin müasir tələblərə uyğun qurulması kimi istiqamətləri müəyyən etməyiniz ölkəmizin gələcək inkişaf prioritetlərinin aydın ifadəsidir.

Yeni Azərbaycan Partiyasının bu günü və gələcəyi ilə bağlı müəyyən etdiyiniz qiymətli fikirləri və prioritetləri də yüksək qiymətləndiririk. İnanırıq ki, YAP qarşıdakı dövrdə də müasir çağırışlara uyğun yenilənərək, gənclərin fəal iştirakını və yeni nəsil partiya üzvlərinin təşəbbüskarlığını daha da artıraraq, ölkəmizin ictimai-siyasi həyatında öz aparıcı rolunu uğurla davam etdirəcək, bölgənin və dünyanın müasir ideoloji fikirləri ilə silahlanmış güclü siyasi təşkilata çevrilərək, Ümummilli Lider Heydər Əliyevin ideyalarını gələcək nəsillərə uğurla çatdıracaqdır.

YAP Qubadlı rayon təşkilatının üzvləri və rayon ictimaiyyəti olaraq əminik ki, qarşıdakı dövrdə də ölkəmizin inkişafı, dövlətçiliyimizin möhkəmləndirilməsi və “Böyük Qayıdış” prosesinin uğurla davam etdirilməsi istiqamətində qarşıya qoyulan vəzifələrin həyata keçirilməsində partiya üzvləri öz fəallıqları ilə böyük töhfələr verəcəklər.

Nitqinizin sonunda Yeni Azərbaycan Partiyasının fəallarının və bütün üzvlərinin tarixi vəzifələrin icrasında fəal iştirak edəcəyinə dair ifadə etdiyiniz inamı yüksək qiymətləndirərək, Sizi əmin edirik ki, bütün partiya üzvlərimiz kimi, biz də etimadınızı doğruldacağıq.

Hörmətli cənab Prezident!
Möhtərəm cənab Sədr!

Sizi Yeni Azərbaycan Partiyasının VIII Qurultayının uğurla keçirilməsi münasibətilə bir daha YAP Qubadlı rayon təşkilatının çoxminlik üzvləri və rayon ictimaiyyəti adından səmimi-qəlbdən təbrik edir, dövlətçilik fəaliyyətinizdə möhkəm cansağlığı, yeni uğurlar və qarşıdakı məsuliyyətli vəzifələrin həyata keçirilməsində, titanik fəaliyyətinizdə Uca Allahdan müvəffəqiyyətlər arzulayırıq.

Uca Allah Sizi və xalqımızı qorusun!

Dərin hörmət və ehtiramla,

YAP Qubadlı rayon təşkilatının sədri

Təhmasib Rüstəmov

Paylaş:

Baxılıb: 68 dəfə