Törədilən ekoloji cinayətin qarşısı mütləq alınmalıdır

Bakı:

27 °C

78 %

10 m/s

Əlaqə

AZ RU EN

Ana səhifə / YAP xəbərləri / Törədilən ekoloji cinayətin qarşısı mütləq alınmalıdır

Törədilən ekoloji cinayətin qarşısı mütləq alınmalıdır

21.12.2022 [11:19]

Torpaqlarımızın işğal altında olduğu 30 ilə yaxın müddətdə Ermənistanın ərazilərimizdə həyata keçirdiyi soyqırım, işğalçılıq, terrorçuluq siyasəti ilə yanaşı, yürütdüyü ekoloji terror siyasəti nəticəsində ölkəmizin təbiətinə, bioloji müxtəlifliyinə, flora və faunasına, su mənbələrinə, ümumilikdə işğal altında olmuş ərazilərin ekologiyasına, regionun ekosisteminə ciddi zərər vurulub, beynəlxalq ekoloji cinayət törədilib. Lakin Ermənistanın Azərbaycana qarşı ekoloji terroru bu gün də davam etməkdədir.
Məlum olduğu kimi, bu il dekabrın 3-dən etibarən Azərbaycan Respublikası İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan Respublikası ərazilərində faydalı qazıntı yataqlarının qanunsuz istismarı, bundan irəli gələn ekoloji və digər törəmə fəsadlar ilə bağlı sülhməramlı kontingentin komandanlığı ilə danışıqlar aparıblar. Azərbaycan nümayəndələrinə Qızılbulaq qızıl və Dəmirli mis-molibden yataqlarına yerində baxış, qanunsuz istismarın dayandırılması, müxtəlif istiqamətlər üzrə monitorinq və inventarizasiyanın aparılması məqsədilə gələn işçi qrup üzvərini burada yaşayan erməni sakinlər qarşılayaraq onların əraziyə buraxılmasına mane olublar.
Baş verənlərə etiraz olaraq azərbaycanlı vətəndaş cəmiyyətinin üzvləri, ekoloji hüquqların müdafiəsi sahəsində fəaliyyət göstərən qeyri-hökumət təşkilatlarının nümayəndələri, ictimai fəallar insan hüquqları sahəsində mövcud beynəlxalq sənədlərdə, o cümlədən milli qanunvericilikdə təsbit olunmuş hüquqlarından, xüsusilə sağlam ətraf mühitdə yaşamaq, sərbəst toplaşmaq, sərbəst hərəkət etmək hüquqların pozulmasına bilavasitə təsir göstərən ekoloji fəsadlara səbəb olan halların aradan qaldırılmasına haqlı narazılıqlarını bildirirək, Şuşa-Laçın yolunda artıq 10 gündür davam edən dinc etiraz aksiyası başlamışlar.
Əlbəttə ki, Azərbaycan vətəndaş cəmiyyətinin nümayəndələrinin və ekofəalların Şuşa-Laçın yolunda həyata keçirdiyi etiraz aksiyası Azərbaycan ictimaiyyətinin haqlı narazılığının göstəricisidir. Lakin bir sıra erməni mənbələri aksiyanın əsas məramı barədə dünya ictimaiyyətinə yalan məlumat verirlər.
Rəsmi İrəvanın qərəzli iddialarına gəlincə bildirməliyik ki, bu iddialar əsassızdır. Ermənistan tərəfinin guya Laçın yolunun bağlanması, bölgədə humanitar fəlakət yaşanması, etnik təmizlənmənin həyata keçirilməsi barədə iddiaları dünya ictimaiyyətini çaşdırmaq məqsədli və böhtan xarakterli olduğundan heç bir həqiqəti əks etdirmir.
Bu mənanada, baş verənlər, aksiya iştirakçılarının, hətta Xankəndidən olan sakinlərimizin öz doğma torpaqlarına buraxılmaması yolun azərbaycanlılar tərəfindən deyil, Rusiya Federasiyasının dırnaqarası sülhməramlı kontingenti tərəfindən bağlandığını bir daha sübut edir. Vətəndaş cəmiyyətinin nümayəndələri sadəcə talan edilmiş təbii sərvətlərimizin qanunsuz istismarının və daşınmasının qarşısını almağa çalışırlar. Təcili tibbi yardım və digər humanitar məqsədli yüklər bu yolla maneəsiz daşınır və bu istiqamətdə heç bir problem yaşanmır.
Bu günlərdə aksiya iştirakçılarına ictimai dəstək isə günbəgün artır. Ekologiya, geologiya və digər sahələr üzrə alimlər, ekspertlər, tələbələr, vətəndaş cəmiyyətinin təmsilçiləri aksiyaya qoşulur, səsləndirilən tələblərə dəstək verirlər.
Biz də tələblərimiz yerinə yetirilməyənə qədər aksiyanı davam etdirməliyik, törədilən ekoloji cinayətin qarşısı mütləq alınmalıdır və hər bir vətəndaşımız bu yolda öz üzərinə düşən vəzifəni məsuliyyətlə icra etməlidir.

Həbib Misirov
YAP Kəlbəcər rayon təşkilatının sədri

Paylaş:

Baxılıb: 556 dəfə