Azərbaycan regionda elekrtik enerjisinin də ixracatçısına çevrilir

Bakı:

27 °C

74 %

10 m/s

Əlaqə

AZ RU EN

Ana səhifə / YAP xəbərləri / Azərbaycan regionda elekrtik enerjisinin də ixracatçısına çevrilir

Azərbaycan regionda elekrtik enerjisinin də ixracatçısına çevrilir

17.02.2023 [17:09]

Fevralın 13-də Bakıda “Gülüstan” sarayında müstəqillik dövrünün 1280 MVt gücündə ən böyük İstilik Elektrik Stansiyasının təməlinin qoyması ölkəmizin dünya enerji mərkəzlərindən biri kimi gücünə güc qatacaq.

Bunu açıqlamasında YAP Gəncə şəhər təşkilatının sədri Ramil Orucov bildirib. O, qeyd edib ki, generasiya güclərinin artırılması, habelə elektrik enerjisi ilə təchizatda etibarlılığın və dayanıqlılığın gücləndirilməsi, son illər Azərbaycanda yeni elektrik enerjisi layihələrinin inşa edilməsi bölgənin enerji təhlükəsizliyinə ölkəmizin əvəzsiz ərməğanıdır. Səudiyyə Ərəbistanı Krallığının "ACWA Power" şirkəti tərəfindən Azərbaycanda inşa edilən 240 MVt gücündə "Xızı-Abşeron" Külək-Elektrik Stansiyasının, Birləşmiş Ərəb Əmirliklərinin "Masdar" şirkəti tərəfindən inşa olunan 230 MVt gücündə "Qaradağ" Günəş-Elektrik Stansiyasının təməlinin qoyulması, Qarabağ və Şərqi Zəngəzurda yeni generasiya güclərinin yaradılması, ardınca yeni təməli qoyulan 1280 MVt gücündə ən böyük İstilik Elektrik Stansiyası ölkəmizin enerji potensialını daha da gücləndirəcək.

Prezident cənab İlham Əliyev müstəqillik dövrünün ən böyük İstilik Elektrik Stansiyasının təməlqoyma mərasimində bildirib ki, yüzlərlə yeni iş yerləri yaranacaq və beləliklə, Azərbaycan öz imkanlarından tam istifadə edərək həm daxili tələbatı ödəyəcək, eyni zamanda, həm elektroenergetika, həm də təbii qaz sahəsində daha böyük addımlar atacaq. Çünki yeni tikiləcək stansiyada şərti yanacağın sərfiyyatı kifayət qədər aşağıdır və bu, imkan verəcək ki, ildə təqribən 800 milyon kubmetr və ya 1 milyard kubmetr qaza qənaət edilsin.

Yeni elektrik stansiyasının Azərbaycanın enerji təhlükəsizliyinə növbəti töhfə olacağını qeyd edən dövlət başçısı vurğulayıb ki, Avropa məkanında Azərbaycan qazına böyük tələbat olduğu üçün bu, eyni zamanda, Avropanın enerji təhlükəsizliyinə növbəti töhfə olacaq. Aydındır ki, Prezident cənab İlham Əliyevin liderliyi ilə həyata vəsiqə alan “Cənub qaz dəhlizi"nin reallaşması bütövlükdə Avrasiya regionunun enerji xəritəsində mühüm dəyişiklik etdi. Tarixi enerji dəhlizi ilə Xəzərdə hasil olunan təbii qaz tarixdə ilk dəfə alternativ marşrutla Avropa bazarlarına çatdırıldı. Hazırda Yunanıstan, Bolqarıstan, Albaniya və İtaliya kimi dövlətlər Azərbaycan qazının alıcılarıdır.

Azərbaycanın enerji sistemində 1280 meqavatlıq yeni, nəhəng, müasir standartlara cavab verən elektrik stansiya ölkədə karbon qazının miqdarı çox böyük dərəcədə – 2 milyon ton azalacaq. Bu da ətraf mühitə çox böyük fayda verəcək.

Ramil Orucov onu da qeyd edib ki, təməli qoyulan 1280 MVt gücündə ən böyük İstilik Elektrik Stansiyası həm də Azərbaycan-İtaliya münasibətlərinin yüksək səviyyədə olmasının göstəricisidir. Prezident İlham Əliyevin qeyd etdiyi kimi, İtaliya şirkətinin bu stansiyanın inşasında iştirakı təsadüfi deyil. Azərbaycanla İtaliya arasındakı yaxın münasibətlər 44 günlük Vətən müharibəsi dövründə də öz təsdiqini tapmışdı.

Xatırladaq ki, müharibə günlərində İtaliyada Azərbaycanın suverenliyi, ərazi bütövlüyü və beynəlxalq səviyyədə tanınmış sərhədlərinin toxunulmazlığına hörməti əks etdirən sənədlər qəbul edilmişdi. Hərbi əməliyyatlar dövründə həmrəylik və dəstək mövqeyi İtaliya mətbuatında daha intensiv xarakter almışdı. 44 günlük Vətən müharibəsi zamanı Azərbaycanın ədalətli mövqeyini qətiyyətlə dəstəkləyən İtaliya şirkətləri hazırda Qarabağın və Şərqi Zəngəzurun yenidən qurulmasında və bərpasında fəal iştirak edirlər.

Azərbaycanın müstəqillik dövrünün ən böyük İstilik Elektrik Stansiyasının təməlinin qoyulması bir də onu təsdiq etdi ki, Azərbaycan regionda elekrtik enerjisinin də ixracatçısına çevrilir- deyə YAP Gəncə şəhər təşkilatının sədri Ramil Orucov vurğulayıb.

Paylaş:

Baxılıb: 581 dəfə