Sülh, barış və dayanıqlı inkişaf Azərbaycanın qəti mövqeyidir

Bakı:

26 °C

78 %

9 m/s

Əlaqə

AZ RU EN

Ana səhifə / YAP xəbərləri / Sülh, barış və dayanıqlı inkişaf Azərbaycanın qəti mövqeyidir

Sülh, barış və dayanıqlı inkişaf Azərbaycanın qəti mövqeyidir

16.03.2023 [18:04]

Almaniya Azərbaycanın Avropada ən vacib siyasi-iqtisadi tərəfdaşlarından biridir. Almaniya eyni zamanda Avropa İttifaqının Şərqi Avropa ölkələri ilə sıx əməkdaşlığını nəzərdə tutan Polşa və İsveç tərəfindən irəli sürülmüş “Şərq Tərəfdaşlığı” təşəbbüsünün fəal müdafiəçisi və təşviqatçısıdır. İki ölkə arasında siyasi münasibətlərin yüksək səviyyəsi qarşılıqlı səfərlər və intensiv parlamentlərarası əməkdaşlıqda öz əksini tapıb.

Almaniya Azərbaycanın müstəqilliyini 1992-ci ilin 12 yanvarında tanıyıb. Azərbaycan ilə Almaniya arasında diplomatik münasibətlər 1992-ci ilin 20 fevralında qurulub. 2 sentyabr 1992-ci ildə Azərbaycanın Almaniyada səfirliyi, 22 sentyabr 1992-ci ildə Almaniyanın Azərbaycanda səfirliyi açılıb. Diplomatik münasibətlərin yaranmasından sonra Azərbaycan və Almaniya arasında əlaqələr mütəmadi olaraq inkişaf edib.

Azərbaycan Respublikasının Prezidenti cənab İlham Əliyevin bu günlərdə Almaniya Federativ Respublikasına səfəri bu əlaqələlərin inkişafında mühüm bir mərhələnin başlanğıcıdır. Cənab Prezident ilk növbədə Avropa İttifaqının bu önəmli ölkəsi ilə bir sıra məsələləri müzakirə edərək Azərbaycanın mövqeyini çatdırmışdır. Almaniyanın federal kansleri Olaf Şoltsla görüşdən sonra cənab Prezidentin Bəyanatından görünür ki, ilk növbədə Azərbaycan-Avropa İttifaqı əlaqələrinin bundan sonra da inkişaf etdirilməsi üçün imkanlar araşdırılmışdır. Söhbət zamanı Avropanın enerji təhlükəsizliyi probleminin həllində oynadığı rol xüsusi diqqət mərkəzində olmuşdur. Cənab Prezident İlham Əliyev demişdir: “Biz Avropa məkanına qaz ixracatımızı artırırıq. 2021-ci ildə əgər Avropaya 8 milyard kubmetr qaz ixrac etmişiksə, bu il bu rəqəm təqribən 12 milyard kubmetrə çatacaq. Bu, bizim ümumi ixracatımızın yarısı deməkdir, gələcək illərdə öz ixrac coğrafiyamızı Avropada genişləndirmək istərdik.”

Almaniyalı iş adamları ilə görüşünə toxunan cənab Prezident bildirmişdir: “Dünən mənim 30-a yaxın almaniyalı iş adamı ilə görüşüm olmuşdur. İki saata yaxın davam edən bu görüşdə Azərbaycana, Azərbaycan iqtisadiyyatına, imkanlara Almaniya biznesi tərəfindən böyük diqqətin şahidi oldum. O cümlədən bərpaolunan enerji növlərinin birgə işlənməsi və istismarı istiqamətində çox gözəl imkanlar var, bu barədə də bu gün biz fikir mübadiləsi apardıq. Azərbaycanın çox geniş bərpaolunan enerji potensialı var. Təkcə Xəzər dənizinin külək enerji potensialı 157 qiqavata bərabərdir və artıq bir neçə kontrakt imzalanıb. Əminəm ki, gələcəkdə Azərbaycan Avropaya təkcə təbii qaz yox, yaşıl enerjini də ixrac edən ölkəyə çevriləcəkdir.”

Cənubi Qafqazda təhlükəsizlik məsələsindən bəhs edən ölkə başçısı Azərbaycanın 30 il ərzində işğala məruz qaldığını qeyd etmiş və bu problemi Azərbaycanın özünün həll etdiyini bildirmişdir. “Biz iki il yarım bundan əvvəl Vətən müharibəsi nəticəsində öz ləyaqətimizi, ərazi bütövlüyümüzü, hüquqlarımızı döyüş meydanında bərpa etdik, Ermənistanı məğlub etdik və məcbur etdik ki, Ermənistan bizim torpaqlarımızdan çıxsın. Beləliklə, 28 il ərzində BMT Təhlükəsizlik Şurasının 4 qətnaməsini icra etməyən Ermənistan cəmi 44 gün ərzində öz məğlubiyyəti ilə barışmalı olmuşdur”-deyə qeyd edən cənab İlham Əliyev bu gün regionda sülh prosesinə ermənilər tərəfindən mane olunduğunu diqqətə çatdırmışdır: “Onu da bildirməliyəm, əfsuslar olsun ki, vaxtilə Qarabağı Ermənistan kimi tanıyan Ermənistan rəhbərliyi sülh şansını itirmişdir. 2019-cu ildə Ermənistanın bugünkü baş naziri demişdi ki, “Qarabağ Ermənistandır və nöqtə” və bu, faktiki olaraq sülh danışıqlarına vurulan ən böyük zərbə idi. 44 günlük Vətən müharibəsi zamanı biz sübut etdik ki, Qarabağ Azərbaycandır və nida işarəsi. Biz bu nida işarəsini 2020-ci il noyabrın 8-də Şuşada qoyduq.

İndi isə sülhün zamanı çatıbdır. Biz Ermənistana sülh təklif etmişik, 5 prinsip əsasında sülh müqaviləsini təklif etmişik. Ümid edirəm ki, Ermənistan bu şansı qaçırmayacaq, nəhayət Cənubi Qafqazda sülh və əməkdaşlıq dövrü başlayacaqdır.

Cənab İlham Əliyev inam və güvənlə bu fikirləri söyləyərək Azərbaycanın haqq işini bir daha diqqətə çatdırmışdır. Bu gün ən ümdə məsələ olan sülh, barış və dayanıqlı inkişaf Azərbaycanın qəti mövqeyidir. Ölkəmiz üzv olduğu bütün təşkilatlarda ancaq bu mövqedən çıxış edir. Dövlət başçısının dünyada gedən proseslərə də münasibəti eyni olaraq qalır və cənab prezident xarici siyasətində bu prinsipləri əsas tutur.

Natiq Qulizadə,

YAP Zəngilan Rayon Təşkilatının sədri

Paylaş:

Baxılıb: 684 dəfə