Laçına həyat qayıdır

Bakı:

30 °C

62 %

6 m/s

Əlaqə

AZ RU EN

Ana səhifə / YAP xəbərləri / Laçına həyat qayıdır

Laçına həyat qayıdır

03.04.2023 [10:47]

İkinci Qarabağ müharibəsinin nəticəsi olaraq Laçın rayonu Azərbaycanın nəzarətinə həm hərbi əməliyyatlar, həm də siyasi yollarla qaytarılmış rayonlarımızdan biridir. Belə ki, rayonun cənub hissəsini - Güləbird və digər bir neçə kəndi rəşadətli ordumuz döyüşərək, vuruşaraq azad etdi. Daha sonra Prezident cənab İlham Əliyevin həyata keçirdiyi uğurlu diplomatiya nəticəsində rayon, eləcə də Laçın şəhəri ölkəmizin nəzarətinə keçdi. İşğaldan azad edilmiş hər bir bölgəmizdə olduğu kimi hazırda Laçın rayonunda da geniş bərpa-quruculuq işləri həyata keçirilir.

Prezident cənab İlham Əliyev Laçın rayonunda xüsusi nümayəndə təyin etdiyi Məsim Məmmədovu qəbul edərkən lazımi tapşırıqlar verməklə yanaşı görülən işlər haqqında da geniş bəhs etdi. Ölkə başçısı bildirdi ki, Laçında həyata keçirlən bərpa-quruculuq işləri ilə bərabər təhlükəsizlik məsələri də yüksək səviyyədə təmin olunur. Rayonunun yenidən qurulması ilə bağlı işlərə müharibə başa çatan kimi başlanılsa da Laçın şəhərinin yenidən qurulması keçən ilin avqustun 26-dan etibarən həyata keçirilir. Birinci mərhələdə Laçın şəhərində 500-ə yaxın fərdi ev inşa edilir və ya ermənilər tərəfindən dağıdılmış evlər yenidən bərpa olunur. Həmçinin çoxmərtəbəli səkkiz yaşayış binası yenidən qurulur, ya da ki, tamamilə əsaslı təmir olunur. Bundan əlavə, 30-dan çox ictimai bina inşa edilir. Bütün bu işlərin cari ilin sonuna qədər başa çatdırılması planlaşdırılır. İşlər yekunlaşdıqca keçmiş köçkünlərin də Laçına qayıdışı təmin olunacaq. Belə ki, minlərlə insan artıq bu ilin sonuna qədər Laçın şəhərində yaşayacaq və laçınlılar bu il öz doğma diyarına qayıdacaqlar. Hazırda Zabux və Sus kəndlərinin tamamilə yenidən qurulması prosesinə start verilib. Zabux kəndində 1000-dən çox, Sus kəndində isə 300-dən çox insan yerləşəcək.

Prezident cənab İlham Əliyev bildirdi ki, bu il və gələn il Laçın rayonuna təqribən 10 minə yaxın, bəlkə də çox keçmiş köçkün yerləşdiriləcək. Artıq Baş planı təsdiq olunan Güləbird kəndində birinci mərhələdə 2400, Qorçu kəndində isə 1300 insanın yerləşməsi nəzərdə tutulur.

İnsanların Laçına qayıdıb rahat şəraitdə yaşamaları üçün şəhərin bütün infrastrukturu yenidən qurulur – su xətləri, kanalizasiya xətləri, elektrik enerjisi xətləri, yollar, şəhərin bütün daxili yolları yenidən qurulur. Çox füsunkar təbiəti - meşələri, dağları, çayları olan Laçın şəhərinin memarlıq üslubu da göz oxşayır. Bir sözlə, həyata keçirilən genişmiqyaslı işlər nəticəsində Laçın, nəinki ölkə, dünya miqyasında ən gözəl şəhərlərindən birinə çevriləcək.

Prezident cənab İlham Əliyevin Laçın rayonunda xüsusi nümayəndə təyin etdiyi Məsim Məmmədova verdiyi mühüm tapşırıqlardan biri də rayonda ətraf mühitin qorunması ilə bağlı məsələ oldu. Ölkə başçısı bildirdi ki, Laçına qayıdacaq hər bir keçmiş məcburi köçkün ətraf mühiti qorumalıdır. Torpaqların zəbt edilməsi, meşə fondunun məhv edilməsi və digər xoşagəlməz hallar olmamalı, bir sözlə, Laçın rayonunda ətraf mühitin qorunması birinci vəzifə olmalıdır.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 616 dəfə