Taksim meydanında keçirilən yürüş-mitinqdə YAP Gənclər Birliyinin üzvləri də iştirak edib

Bakı:

26 °C

70 %

10 m/s

Əlaqə

AZ RU EN

Ana səhifə / YAP xəbərləri / Taksim meydanında keçirilən yürüş-mitinqdə YAP Gənclər Birliyinin üzvləri də iştirak edib

Taksim meydanında keçirilən yürüş-mitinqdə YAP Gənclər Birliyinin üzvləri də iştirak edib

01.03.2012 [01:18]

Seymur Orucov: İldən-ilə bu istiqamətdə tədbirlər genişlənir və diqqət çəkən məqamlardan biri odur ki, gənc nəsil bu prosesdə fəal iştirak edir
Məlum olduğu kimi, fevralın 26-da Xocalı soyqırımının 20-ci ildönümü ilə əlaqədar İstanbul şəhərinin tarixi Taksim meydanında izdihamlı yürüş-mitinq keçirilib. Həmin gün qardaş ölkədə 175 mindən çox insan 20 il bundan əvvəl erməni faşistləri tərəfindən törədilmiş Xocalı soyqırımı ilə bağlı Azərbaycanın haqq işinə dəstək vermək üçün Taksim meydanına toplaşıb, “Bir millət, iki dövlət - Xocalıya ədalət!” şüarı altında keçirilən aksiyada insanlar “Biz hamımız xocalılıyıq”, “Xocalıya ədalət!”, “Bir millət, iki dövlət”, “Erməni yalanlarına son!”, “Qarabağ bizimdir, bizim də olacaq!”, “Erməni cavab verəcəkdir”, “Qəlbimizdə Xocalı”, “Azərbaycan xalqı tək deyil!” və s. şüarları səsləndiriblər.
Qeyd edək ki, sözügedən aksiyada Azərbaycanın və Türkiyənin deputatları, hər iki ölkənin dövlət və hökumət, diplomatik korpusun və beynəlxalq təşkilatların, QHT-lərin nümayəndələri, qardaş ölkənin 35 şəhərindən təmsilçilər, bir sıra xarici ölkələrdən qonaqlar, yerli və xarici KİV-lərin təmsilçiləri, o cümlədən, Yeni Azərbaycan Partiyasının Gənclər Birliyinin (YAP GB) nümayəndə heyəti də iştirak edib. Aksiyada iştirak etmək üçün fevralın 23-də İstanbula yola düşən YAP GB-nin üzvləri səfərin ilk günündən təbliğat kampaniyasına başlayıblar. Belə ki, gənclərimiz İstanbulun küçələrində bukletlər paylayıb, türkiyəli qardaş və bacılarımızı aksiyada iştiraka dəvət ediblər. Bu barədə açıqlama verən YAP GB-nin sədri Seymur Orucov deyib ki, yürüş-mitinqə dünyanın müxtəlif ölkələrindən xeyli insan qatılıb və bütün iştirakçıların tələbi Xocalı soyqırımına dünya birliyi tərəfindən ədalətli qiymətin verilməsi olub: “Yürüş-mitinqdə YAP Gənclər Birliyinin üzvləri də iştirak etdilər. Biz YAP GB tərəfindən hazırlanmış və Xocalı soyqırımına həsr olunmuş on minədək bukleti tədbir iştirakçılarına payladıq. Türk dilində hazırlanmış bukletlərdə faciəni əks etdirən faktlar və fotolar öz əksini tapmışdı. Hesab edirik ki, bütövlükdə bu möhtəşəm tədbir Xocalı soyqırımını dünyaya tanıdan böyük hadisə olacaq. İldən-ilə bu istiqamətdə tədbirlər genişlənir və diqqət çəkən məqamlardan biri odur ki, gənc nəsil bu prosesdə fəal iştirak edir. Bu tədbir həmçinin, Azərbaycan-Türkiyə birliyinin təcəssümüdür”.
Aksiyaya qatılan YAP GB-nin üzvlərinin də vurğuladıqları kimi, yürüş-mitinqdə Azərbaycandan və Türkiyədən olan minlərlə gənc iki ölkənin gəncliyinin dostluğunu nümayiş etdiriblər: “Hər iki ölkədən olan gənclər birlikdə Azərbaycanın və Türkiyənin himnini səsləndirdilər. Biz böyük bir qürur hissi ilə aksiyada iştirak etdik”.
YAP GB-nin üzvləri sonda bir arzularını da dilə gətiriblər: “Azərbaycan gəncliyi olaraq çox arzu edirik ki, növbəti belə aksiyaları düşmən işğalından azad olunmuş Xocalıda, həmçinin, digər torpaqlarımızda keçirək. Və təbii ki, Ermənistanın öz işğalçılıq siyasətindən əl çəkməyəcəyi təqdirdə Ali Baş Komandan İlham Əliyev cənablarının rəhbərliyi ilə Azərbaycan gəncliyi torpaqlarımızın işğaldan azad olunması üçün müharibəyə hazırdır”.
Nadir AZƏRİ

Paylaş:

Baxılıb: 1430 dəfə