Səudiyyə Ərəbistanının nüfuzlu “əl-Cəzirə” qəzetində 20 Yanvar faciəsi barədə məqalə dərc olunub

Bakı:

24 °C

73 %

15 m/s

AZ RU EN

Ana səhifə / Xəbər lenti / Səudiyyə Ərəbistanının nüfuzlu “əl-Cəzirə” qəzetində 20 Yanvar faciəsi barədə məqalə dərc olunub

Səudiyyə Ərəbistanının nüfuzlu “əl-Cəzirə” qəzetində 20 Yanvar faciəsi barədə məqalə dərc olunub

17.01.2026 [20:18]

Səudiyyə Ərəbistanı Krallığında nəşr olunan nüfuzlu “əl-Cəzirə” qəzetində 1990-cı il 20 Yanvar faciəsinə həsr olunmuş məqalə dərc edilib.

AZƏRTAC xəbər verir ki, məqalədə 20 Yanvar faciəsinin Azərbaycan xalqının milli yaddaşında “Qara Yanvar” kimi əbədi həkk olunduğu, bu il həmin hadisələrin 36-cı ildönümünün qeyd edildiyi vurğulanır.

Bildirilir ki, 1990-cı il yanvarın 20-nə keçən gecə sovet qoşunları misli görünməmiş hərbi əməliyyatla Bakı şəhərinə daxil olaraq dinc və silahsız mülki əhaliyə qarşı zorakılıq törədib. Nəticədə 130-dan çox insan şəhid olub, yüzlərlə şəxs yaralanıb.

Yazıda qeyd olunur ki, “Qara Yanvar” faciəsi Azərbaycan xalqının azadlıq və müstəqillik iradəsini sarsıtmaq məqsədi daşısa da, əksinə, milli şüurun formalaşmasında dönüş nöqtəsinə çevrilib. Bu hadisələr Sovet İttifaqının daxili dağılma prosesini sürətləndirib, 1991-ci ildə Azərbaycan Respublikasının müstəqilliyinin elan olunmasına aparan yolu açıb. Xalqın suverenlik və milli ləyaqət uğrunda qətiyyətli mövqeyi bütün dünyaya nümayiş etdirilib.

Məqalədə Ümummilli Lider Heydər Əliyevin 20 Yanvar hadisələrinə verdiyi prinsipial siyasi qiymət xüsusi vurğulanır. Ulu Öndərin 1990-cı il yanvarın 21-də Moskvada keçirdiyi mətbuat konfransında Azərbaycan xalqına qarşı törədilmiş cinayəti açıq şəkildə pisləməsi, beynəlxalq ictimaiyyəti məlumatlandırması və ciddi siyasi təzyiqlərə baxmayaraq qəti mövqe ortaya qoyması qeyd olunur. Bildirilir ki, bu mövqe sonradan müasir Azərbaycan dövlətinin milli suverenliyin və qanuni hüquqların müdafiəsinə əsaslanan siyasi xəttinin ideoloji təməlini formalaşdırıb.

Məqalədə diqqətə çatdırılır ki, Azərbaycan xalqı hər il 20 Yanvar tarixini fədakarlıq və müqavimətin əbədi rəmzi kimi ehtiramla yad edir. Minlərlə insan Bakıda yerləşən Şəhidlər xiyabanını ziyarət edərək Vətənin azadlığı və müstəqilliyi uğrunda canından keçənlərin xatirəsini anır.

Eyni zamanda, yazıda vurğulanır ki, müasir Azərbaycan dövləti məhz bu tarixi sınaqlardan keçərək beynəlxalq arenada etibarlı və məsuliyyətli tərəfdaş kimi mövqeyini möhkəmləndirib. Bu kontekstdə Səudiyyə Ərəbistanı ilə Azərbaycan arasında münasibətlərin qarşılıqlı hörmət və ortaq maraqlar əsasında inkişaf etdiyi qeyd olunur. Krallığın 1991-ci ilin dekabrında Azərbaycanın müstəqilliyini erkən tanıması və 1992-ci ilin fevralında diplomatik münasibətlərin qurulması ikitərəfli əməkdaşlığın genişlənməsi üçün mühüm zəmin yaradıb.

Paylaş:

Baxılıb: 489 dəfə