Rayonların birləşdirilməsi niyə vacibdir?

Bakı:

9 °C

87 %

1 m/s

Əlaqə

AZ RU EN

Ana səhifə / Xəbər lenti / Rayonların birləşdirilməsi niyə vacibdir?

Rayonların birləşdirilməsi niyə vacibdir?

19.04.2022 [10:13]

Növbəti rayon Xızı ola bilər

Deputat: Rayonların öz funksiyasını itirməsi birləşdirilməni zəruri edir

Günel ABBAS

Son illər ölkə ərazisində bir sıra rayonların birləşdirilməsi ilə bağlı müxtəlif təkliflər verilir, islahatlar aparılır. Bu yaxınlarda Nizami və Kəpəz rayonlarının Gəncəyə birləşdirilməsi məsələni yenidən gündəmə gətirdi. Məlumdur ki, rayonların sayının çox olması büdcədən ayrılan vəsaitin artması ilə nəticələnir. Dotasiyanı mümkün qədər azaltmaq üçün həyata keçirilən islahatlara artıq start verilib. Hazırda rayonların inzibati ərazilərinin formalaşdırılması istiqamətində işlər aparılır. Formalaşdırma prosesi daha çox həmin regionların sosial-iqtisadi potensialı, əhalinin məşğulluq səviyyəsi və təbii resursları əhatə edir. Bu məsələnin reallaşması üçün isə dərin iqtisadi, texniki analiz aparılmalı, mövcud şəraiti nəzərə alaraq, addımlar atılmalıdır. Prosesə cəlb edilən rayonların idarəetməsində problemlər olur, onlar iqtisadi cəhətdən özlərini doğrultmurlar. Bu mənada hazırda rayon icra hakimiyyətlərinin birləşdirilməsi ilə bağlı müxtəlif təkliflər də var.

Milli Məclisin Regional məsələlər komitəsinin sədri Siyavuş Novruzov “Yeni Azərbaycan”a bildirib ki, prosesin şamil olunacağı növbəti rayon Xızı ola bilər, ancaq son qərar Cənab Prezidentindir. Onun sözlərinə görə, mərhələli şəkildə bu cür rayonları birləşdirmək mümkündür: “1990-cı illərdə böyük rayonları iki hissəyə bölərək 10-a yaxın rayon yaradılıb. Əvvəllər ölkədə 8 zona yaradılması ilə bağlı fikirlər var idi, sonradan iqtisadi zonalar yaradıldı. Hazırda islahatlar aparılır, bələdiyyələr də yeni strukturlara uyğun formalaşdırılacaq. Son illər əhalinin idarəetmə prosesində iştirakını asanlaşdıran addımlar atılır, buna elektron hökumət portalını misal göstərmək olar”.

Deputat qeyd edib ki, bəzi rayonların hissə-hissə öz funksiyasını itirməsi onların birləşdirilməsini zəruri edir: “Gələcəkdə öz daxili idarəetməsini həyata keçirən rayonların sayını artırmaq üçün çalışmalıyıq. İnzibati rayonlarda işlər elə qurulmalıdır ki, rayonun hökumətdən dotasiyası azalsın. Yeni müəssisələr tikilməli, xidmət sahələri yaradılmalıdır. Azərbaycanda 14 iqtisadi rayon ayrılıb, onların bəziləri kifayət qədər böyükdür. Həmin rayonlar vilayət və ya əyalət kimi ola bilər”.

S.Novruzov vurğulayıb ki, kiçik rayonların birləşdirilərək daha səmərəli idarə olunması həm iqtisadi, həm də sosial cəhətdən faydalı olar: “Bu, birmənalı olaraq regionların inkişafına stimul verəcək. Çünki xərclə gəlir arasındakı fərqin büdcədən ödənilməsi regionlarda istehsal sektorlarının inkişafına imkan vermir. Rayonların birləşdirilməsi həm də dotasiyalaşdırma mexanizminə son qoyacaq ki, bu da özlüyündə büdcədəki ağırlığı aradan qaldıracaq. Nəticədə bundan sonra rayonlar yerli büdcə hesabına inkişaf edəcəklər. Eyni zamanda, Bakı ilə regionlar arasında iqtisadi fərq aradan qalxacaq və regionlara xarici investisiyaların cəlb edilməsi ilə iş yerləri yaradılacaq”.

Paylaş:

Baxılıb: 658 dəfə