Zəlzələ ilə bağlı süni ajiotaj

Bakı:

28 °C

49 %

11 m/s

Əlaqə

AZ RU EN

Ana səhifə / Xəbər lenti / Zəlzələ ilə bağlı süni ajiotaj

Zəlzələ ilə bağlı süni ajiotaj

16.02.2023 [10:51]

Mənəvi kriteriyalara sığmayan addım...

Yeganə BAYRAMOVA

Fevralın 6-da Türkiyədə baş verən dəhşətli zəlzələ dünyanı, eləcə də Azərbaycan xalqını sarsıtdı. Şəhərlər, kəndlər, qəsəbələr yerlə yeksan oldu. Çox sayda insanın ölməsi və yaralanması xəbərlərini eşidən, dağıntılarla bağlı görüntüləri izləyən, xəbərləri oxuyan insanlar psixoloji gərginlik keçirirlər. Bütün bunlar Türkiyədə olduğu kimi, Türkiyənin dərdini öz dərdi bilən Azərbaycanda da ciddi psixoloji travma yaradıb. Əsas səbəb də insanların sosial şəbəkələrdə daim zəlzələ ilə bağlı xəbərlərin şahidi olması, bəzən şayiə xarakterli xəbərlərin ortaya çıxması, yanlış proqnozların verilməsidir.

Onsuz da vətəndaşlarımız belə bir fəlakətin ölkəmizdə olacağı barədə narahatlıq yaşayırlar. Təəssüf ki, bu durumdan istifadə edən bəzi şəxslər sosial şəbəkələrdə, xüsusilə, “Tik-Tok”-da Azərbaycanda zəlzələ olacağına dair süni ajiotaj yaradırlar. Həmin şəxslər vətəndaşlara səslənərək ölkəmizdə zəlzələnin baş verəcəyini, vətəndaşların hazırlıqlı olduqlarını deyirlər.

Həyəcan və təşviş pozuntusu

Mövzu barədə “Yeni Azərbaycan”a danışan psixoloq Elnur Rüstəmov bildirib ki, belə həssas bir dönəmdə həqiqəti əks etdirməyən xəbərlərin paylaşılması yolverilməzdir. Onun sözlərinə görə, yanlış informasiya yayanlar böyük məsuliyyət daşıyırlar:

“Son günlər hər birimiz həssas bir dönəm keçirik, qardaş Türkiyədə baş verən zəlzələdə insanların həyatda qalması üçün göstərilən səylər göz önündədir. Bu cür faciədən sarsılan şəxslərin sosial şəbəkələrdə yanlış xəbərlərə rastlaması onlarda həyəcan və təşviş pozuntusu yarada bilər. Məsələn, Bakıda yaxud Gəncədə yaşayan biri düşünür ki, zəlzələ orada baş versə, necə olacaq? Əlbəttə, həmin şəxslər zəlzələnin Azərbaycanda baş verib-verməyəcəyi barədə düşünürsə, bu, normal haldır. Lakin onların belə düşünməsinə şərait yaradan insanlar var. Hansı ki, yanlış informasiyalar yayaraq vətəndaşlar həyəcan, qorxu və təşviş yaradırlar. Hazırda insanların istənilən neqativ xəbərlərə qarşı həssaslığı artıb. Ona görə də bəzi vətəndaşların diqqətli olması lazımdır”.

Öz eqosunu təmin edənlər

Psixoloq qeyd edib ki, yanlış informasiyaları sosial şəbəkələrdə yayan adam uzağı 1000-2000 nəfər baxış sayı toplaya bilər. Həmin şəxs öz aləmində düşünür ki, yanlış məlumat yayaraq minlərlə baxış qazandım. Ancaq düşünmürlər ki, o xəbərləri izləyənlər arasında onların doğmaları da var. Kiminsə yanlış informasiya yayaraq insanların duyğuları ilə oynamağa mənəvi haqqı yoxdur. Bu cür situasiyalara yol açanlar öz eqosunu təmin etməyə çalışırlar”.

Vətəndaş həmrəyliyi olmalıdır

E.Rüstəmovun sözlərinə görə, informasiya əsrində bu cür yanlış məlumatların tirajlanmasına qarşı vətəndaş həmrəyliyi olmalıdır: “Məsələn, həmin şəxs yaydığı yanlış xəbər üçün nə qədər izləmə olduğunu dostuna söyləyirsə, dostu onu tənbeh edərək yanlış yolda olduğunu deməlidir. Fikrimcə, məsələ ilə bağlı qanuni addım atılmalıdır. Artıq 1 həftədən çoxdur ki, cəmiyyətimizdəki insanlar narahatdır və bu narahatlığı nisbətən də olsa, azaltmaq üçün müxtəlif yollara əl atırlar: Kimisi yardım, kimisi isə dua edir və bununla özlərinə təskinlik verməyə çalışırlar. Belə olan halda yanlış xəbərlər paylaşıb xaos yaratmaq düzgün deyil və heç bir mənəvi kriteriyalara sığmır”.

10 gündən 1 aya qədər həbs...

Hüquqşünas Kənan Tağıyevin sözlərinə görə, sosial şəbəkələrdə bu cür yanlış informasiyaları yayan şəxslər yalnız inzibati qaydada məsuliyyətə cəlb olunurlar: “Belə məqamlarda cinayət məsuliyyətinə cəlb olunma kimi hallar baş vermir. Vətəndaş inzibati məsuliyyətə cəlb olunur və 10 gündən 1 ay müddətinə həbs edilə bilər”.

Azərbaycanda güclü zəlzələ ola bilər?

Azərbaycan Milli Elmlər Akademiyası Respublika Seysmoloji Xidmət Mərkəzinin baş direktoru Qurban Yetirmişli bildirib ki, zəlzələlərin qısamüddətli proqnozu mümkün deyil: “Baxmayaraq ki, Azərbaycanda hər gün yeraltı təkanlar qeydə alınır. Lakin çoxu hiss olunmur. Odur ki, yaxın zamanlarda ölkədə güclü təkanların olması gözlənilmir”.

Paylaş:

Baxılıb: 484 dəfə