"Orucluq insanlıq üçün edilən ibadətdir"

Bakı:

26 °C

57 %

7 m/s

Əlaqə

AZ RU EN

Ana səhifə / Xəbər lenti / "Orucluq insanlıq üçün edilən ibadətdir"

"Orucluq insanlıq üçün edilən ibadətdir"

12.03.2024 [11:35]

Bildiyimiz kimi mart ayının 11-dən müsəlmanların mübarək Ramazan ayı başlayıb. Hər il olduğu kimi, bu il də Qafqaz Müsəlmanları İdarəsi Ramazan ayının gündəlik duaları, imsak-iftar vaxtlarını əks etdirən xüsusi təqvim tərtib edib. Qeyd edək ki, bu təqvim İdarənin internet saytında yerləşdirilib.

Din xadimləri bildirir ki, bu ayda oruc təkcə ac qalmaq deyil, eyni zamanda ruhun tərbiyəsi, cismin imtahanıdır. Oruc tutan adam qarnı ilə yanaşı qəlbini də qorumalıdır. Beynini, düşüncəsini, ruhunu paklamalıdır. Ancaq yaxşılıq düşünməli və yaxşılıq etməlidir.

Oruc tutmaq təkcə müsəlmanlarda deyil, əvvəlki ümmətlərdə də olub. Necə ki, Quranda bu barədə deyilir.

Eyni zamanda Quranda kimlərin oruc tutacağı da qeyd edilir, üzrlü olanlar vurğulanır, onlara rüxsət haqqı tanınır.

İlahiyyatçı Tural İrfan "Yeni Azərbaycan" - a açıqlamasında bildirir ki, oruc tutmağa taqəti olmayanlar isə (hər günün əvəzində) bir yoxsulu doyduracaq qədər fidyə verməlidirlər:

""Ramazan" sözü ərəbcə qızmar daşa deyilir. Müsəlman da qızmar günlərdə, soyuq qış günlərində məhz Rəbbinin rızasını qazanmaq üçün, paklanmaq üçün oruc tutur, ibadətini icra edir. Həmçinin Uca Yaradan müqəddəs kitabında Quranın Ramazan ayında nazil edildiyini belə vurğulayır: “İnsanlara doğru yolu göstərən, bu yolu açıq dəlilləri ilə aydınlaşdıran və (haqqı batildən) ayıran (Quran) Ramazan ayında nazil edilmişdir. Aya (ramazan ayına) yetişən şəxslər (bu ayı) oruc tutmalıdırlar; xəstə və ya səfərdə olanlar isə tutmadığı günlərin sayı qədər başqa günlərdə tutsunlar. Allah sizin üçün ağırlıq deyil, yüngüllük istər ki, fövtə gedən günlərin orucunu tamamlayasınız və sizi düz yola yönəltməsinə görə Ona (“Allahu əkbər” deməklə) təzim və şükür edəsiniz.""

Oruc tutmaq bütün dinlərdə var. Əsasən də səmavi dinlərdə oruc fərz əmr olunub. Yəhudilikdə, xristianlıqda da oruc var. Oruc tutmaq insanı həm cismani, həm də ruhani təmizləyir, düşündürür. Qidalanma zamanı insanın daxili orqanları yalnız həzm üçün çalışır, ancaq oruc zamanı orqanlar istirahət edir, qan dövranı, qan təzyiqi nizamlanır.

T.İrfanın sözlərinə görə insanların ən çox maraqlandığı sual namaz qılmayanların oruc tuta bilib bilməməsidir. :"Əgər qaydalara uyğun oruc tutubsa başqa zaman günahlar edənin də orucu qəbul olar. Allah böyük mərhəmət sahibidir. Ancaq içi boş, quru və sadəcə borc ödəmək qəbilindən oruc tutmaq doğru olmaz. Əsl ibadət dünya malı, dünya marağı üçün, yaxud axirəti qazanmaq üçün deyil, sırf Allah rızası üçün, sırf insanlıq üçün edilən ibadətdir. Müsəlman gərək ilin bütün vaxtlarında namazına, orucuna ötürməsin. Günah da Ramazanda da eynidir, başqa aylarda da.

Kafir olmaq, dindən çıxmaq orucu pozur. Çünki orucun şərti müsəlmanlıqdır. Əgər insan islamdan çıxsa demək oruc da islama aid olduğu üçün artıq o ibadət yox, sadəcə pəhriz qəbilindən hesab olunacaq. Söyüş söymək orucu pozmasa da günahdır. Hər günah da orucu pozmaz".

O bildirir ki, Ramazan ayında toy, bayram, nişan, şadlıq, şənlik keçirmək çox gözəl və savabdır. Yaxşı olar ki, müsəlmanlar bütün xeyirli işlərini bu aya salsınlar. Ancaq gündüz oruclu adamları məclisə çağırmaq doğru olmaz. Ümumiyyətlə orucluq ayında şənlik məclisi etməyin heç bir eybi yoxdur.

Bilmədən yemək, içmək, qusmaq orucu pozmur. Diş fırçalamaq isə ümumiyyətlə orucu pozmur, əksinə müstəhəbdir. Çünki oruc tutan adamın mədəsindən qoxu gəlir, başqalarını narahat edir. Əsas odur ki, insan təmiz niyyət ilə oruc tutsun. Xalqımız, dövlətimiz üçün dua etsin".

Havar Şəfiyeva

Paylaş:

Baxılıb: 808 dəfə