Ukraynada NATO hərbçiləri...

Bakı:

1 °C

75 %

11 m/s

Əlaqə

AZ RU EN

Ana səhifə / Analitik / Ukraynada NATO hərbçiləri...

Ukraynada NATO hərbçiləri...

19.03.2024 [10:55]

Putin: Müasir dünyada hər şey mümkündür

Rusiya-Ukrayna müharibəsi geosiyasi proseslərə əhəmiyyətli dərəcədə təsir edib. ABŞ, Avropa İttifaqı Rusiyaya ciddi sanksiyalar tətbiq edir. Avropa İttifaqı tərəfindən sayca 13-cü sanksiyalar paketi qəbul olunub. Məqsəd Rusiyanın iqtisadiyyatını zəiflətmək, bununla da rəsmi Moskvanı müharibəni dayandırmağa məcbur etməkdir. ABŞ və Avropa İttifaqı, eləcə də NATO Ukraynaya özünü müdafiə etmək üçün fəal hərbi yardım da göstərirlər. Bu yardımın dəyəri milyardlarla dollar səviyyəsindədir. Ukraynanın Müdafiəsi üzrə Təmas Qrupunun - “Ramştayn” formatının üzvləri mütəmadi olaraq toplantılar keçirərək rəsmi Kiyevə hərbi dəstək məsələsini müzakirə edir. ABŞ-ın müdafiə naziri Lloyd Ostin xarici tərəfdaşları Ukraynaya kömək etməkdə daha qətiyyətli olmağa çağırıb. “Daha dərinə getməyin vaxtıdır. Ukrayna xalqı bizi izləyir, Kreml bizi izləyir, tarix də bizi izləyir. Ona görə də biz Ukraynanın Rusiyanın təcavüzündən müdafiəsinə kömək etmək əzmimizdən geri çəkilməyəcəyik və tərəddüd etməyəcəyik”, - deyə ABŞ müdafiə naziri bəyan etmişdi. ABŞ Ukraynaya həcmi 2,5 milyard dollar olacaq yeni hərbi yardım paketini də elan edib.

Son zamanlar isə NATO ölkələrinin Ukraynaya qoşun göndərilməsi ilə bağlı fikirlər səslənir. Bununla əlaqədar müttəfiq ölkələrin yekdil rəyi olmasa da, mövzu gündəmdə qalır. Təbii ki, bu amil Rusiyada ciddi narahatlıqla qarşılanır. Rusiyanın dövlət başçısı Vladimir Putin prezident seçkiləri üzrə səsvermənin başa çatmasından sonra özünün seçki qərargahına gəlib və orada jurnalistlərin suallarını cavablandırıb. Ukrayna münaqişəsindən bəhs edən V.Putin qeyd edib ki, Rusiya hakimiyyəti Belqorod vilayətində yaranmış vəziyyətlə əlaqədar Ukraynaya bitişik ərazilərdə “müəyyən sanitar zona” yaratmağa məcbur ola bilər. O, həmçinin gələcəkdə bilavasitə Rusiya ilə NATO arasında münaqişəni istisna etməyib, hərçənd, hesab edir ki, heç kim bu addımın atılmasında maraqlı deyil.

NATO qoşunlarının Ukraynaya mümkün göndərilməsi haqqında sualı cavab verərkən Putin bildirib ki, müasir dünyada hər şey mümkündür. Onun sözlərinə görə, Rusiya Ukraynada NATO ölkələrinin hərbçilərinin olmasından xəbərdardır: “Ukraynada NATO ölkələrinin hərbçiləri var və onlar üçün yaxşı heç nə yoxdur”. Rusiya Prezidenti NATO ilə tammiqyaslı münaqişənin mümkünlüyü haqqında da danışıb: “Hər şey mümkündür. Lakin bu, Üçüncü Dünya müharibəsinə bir addım yaxın olacaq”.

Ümumiyyətlə, NATO Rusiya ilə savaşa birbaşa qoşulmağa ehtiyat etsə də, qarşıdurma üçün məkan kimi Ukrayna ərazisini seçib. Aydındır ki, Ukrayna ordusunun şəxsi heyətinin təkmilləşdirilməsi, potensialının artırılması, bu ölkəyə müxtəlif silah və hərbi texnikaların verilməsi NATO-nun hesabınadır. Burada NATO-nun siyasi, maliyyə, hərbi, logistik dəstəyi həm müharibənin müddətini uzadır, həm də Ukraynanın ərazi bütövlüyü, suverenliyi, sərhədlərinin toxunulmazlığı kontekstində münaqişənin həlli ilə bağlı bir mövqe ortaya qoyur. Eyni zamanda, bu amillər savaşın Rusiya-NATO kontekstinə çevrilməsinə səbəb olur. Ona görə də, Rusiya bu müharibədə NATO-nun hərbçilərinin iştirak etdiyini bildirir. Lakin hələ ki, Alyans Rusiya ilə açıq qarşıdurmadan çəkinir.

Nardar BAYRAMLI

Paylaş:

Baxılıb: 659 dəfə