YAP Kəlbəcər rayon təşkilatı Silahlı Qüvvələr Günü münasibətilə Gəncə Memorial Kompleksini ziyarət edib

Bakı:

23 °C

74 %

11 m/s

AZ RU EN

Ana səhifə / Arxiv / YAP Kəlbəcər rayon təşkilatı Silahlı Qüvvələr Günü münasibətilə Gəncə Memorial Kompleksini ziyarət edib

YAP Kəlbəcər rayon təşkilatı Silahlı Qüvvələr Günü münasibətilə Gəncə Memorial Kompleksini ziyarət edib

25.06.2026 [12:29]

Yeni Azərbaycan Partiyası Kəlbəcər rayon təşkilatı tərəfindən “Şəhərsalma və Memarlığ İli” çərçivəsində 26 İyun – Azərbaycan Respublikasının Silahlı Qüvvələri Günü münasibətilə Gəncə Memorial Kompleksinə ziyarət təşkil olunub.
Ziyarətdə YAP Kəlbəcər rayon təşkilatının sədri Həbib Misirov, şəhid ailələri, qazilər, idarə - müəssisə rəhbərləri, eləcə də partiya fəalları iştirak ediblər.

Əvvəlcə Ümummilli Lider Heydər Əliyevin və Vətənimizin azadlığı və ərazi bütövlüyü uğrunda canlarından keçmiş şəhidlərimizin əziz xatirəsi ehtiramla yad edilib. Sonra iştirakçılar Memorial Kompleksin önünə gül dəstələri düzüblər.
Ziyarət zamanı iştirakçılara Ermənistan silahlı qüvvələrinin 2020-ci ilin oktyabr ayında Gəncə şəhərinə etdiyi raket hücumlarının dinc əhali arasında törətdiyi ağır faciələr barədə ətraflı məlumat verilib. Bildirilib ki, Gəncə Memorial Kompleksi həmin hücumlar nəticəsində həlak olmuş günahsız insanların xatirəsinin əbədiləşdirilməsi məqsədilə inşa olunub.

Kompleksdə yerləşən muzeyin “XX əsrin əvvəli”, “Deportasiya və məcburi köçkünlük”, “Soyqırımı və kütləvi qırğınlar”, “Atəşkəs və Vətən müharibəsi dövrü”, “İtkin düşənlər, kütləvi məzarlıqlar, mina terroru” və “İşıqlı gələcəyə doğru” mövzularına həsr olunmuş zalları ziyarət edilib, arxiv materialları, tarixi sənədlər və dağıdılmış mədəni irs nümunələri ilə bağlı məlumatlar təqdim olunub.

Qeyd edilib ki, muzeyin ayrıca bölməsi atəşkəs dövründə, Vətən müharibəsi günlərində və sonrakı mərhələdə mülki əhalinin məqsədli şəkildə hədəfə alınması faktlarını əks etdirir. Ziyarətçilər 44 günlük Vətən müharibəsi zamanı cəbhə bölgəsindən uzaqda yaşayan sakinlərin, o cümlədən uşaqların üzləşdiyi faciələr, verilən itkilər və dövlət–xalq–ordu birliyinin gücü haqqında məlumatlandırılıblar.

Ekspozisiyanın son hissəsində uzun illər davam edən haqsızlıqlara baxmayaraq mübarizə əzmini qoruyan Azərbaycan xalqının qələbə ruhu və milli həmrəyliyi nümayiş etdirilir.
Çıxışlarda vurğulanıb ki, Gəncə Memorial Kompleksi xalqımızın yaddaşında silinməz iz qoyan hadisələrin gələcək nəsillərə çatdırılmasında mühüm əhəmiyyət daşıyan tarixi məkanlardan biridir. Bildirilib ki, bu şanlı Zəfər salnaməsi Ümummilli Lider Heydər Əliyevin əsasını qoyduğu dövlətçilik siyasətini uğurla davam etdirən Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə yazılıb.

Ziyarət tədbir iştirakçılarında dərin təəssürat yaradıb və vətənpərvərlik ruhunun gələcək nəsillərə ətraflı aşılanması üçün zəmin yaradıb.

Paylaş:

Baxılıb: 426 dəfə