Milli Mətbuat – Xalqın səsi, dövlətin gücü

Bakı:

28 °C

47 %

4 m/s

Əlaqə

AZ RU EN

Ana səhifə / Arxiv / Milli Mətbuat – Xalqın səsi, dövlətin gücü

Milli Mətbuat – Xalqın səsi, dövlətin gücü

21.07.2026 [14:28]

Hər il iyulun 22-si Azərbaycanda Milli Mətbuat Günü kimi qeyd olunur. Bu əlamətdar tarix Azərbaycan milli jurnalistikasının banisi Həsən bəy Zərdabinin 1875-ci il iyulun 22-də nəşr etdirdiyi "Əkinçi" qəzetinin ilk nömrəsinin çap olunması ilə bağlıdır. "Əkinçi" qəzeti xalqın maariflənməsinə, milli şüurun formalaşmasına və ana dilinin inkişafına böyük töhfələr vermiş, Azərbaycan mətbuatının təməlini qoymuşdur. Milli mətbuatımız ötən 150 ilə yaxın dövr ərzində böyük inkişaf yolu keçmiş, cəmiyyətin maariflənməsində, milli-mənəvi dəyərlərin qorunmasında, dövlətçilik ənənələrinin möhkəmləndirilməsində mühüm rol oynamışdır. Tarixin müxtəlif mərhələlərində mətbuat xalqın problemlərini işıqlandırmış, milli azadlıq ideyalarının yayılmasına xidmət etmiş, müstəqillik uğrunda mübarizədə əhəmiyyətli rol oynamışdır. Müstəqilliyini bərpa etdikdən sonra Azərbaycanda söz və mətbuat azadlığının inkişafı dövlət siyasətinin mühüm istiqamətlərindən birinə çevrilmişdir. Ümummilli Lider Heydər Əliyev mətbuatın inkişafına xüsusi diqqət yetirmiş, demokratik cəmiyyətin qurulmasında azad medianın rolunu yüksək qiymətləndirmişdir. Onun təşəbbüsü ilə 1998-ci ildə Azərbaycanda kütləvi informasiya vasitələri üzərində senzura ləğv edilmiş, bu da milli mətbuatın inkişafında yeni mərhələnin başlanğıcı olmuşdur.
Bu siyasət bu gün Azərbaycan Respublikasının Prezidenti cənab İlham Əliyev tərəfindən uğurla davam etdirilir. Dövlət başçısının rəhbərliyi ilə informasiya siyasəti daha da təkmilləşdirilmiş, media qurumlarının maddi-texniki bazasının gücləndirilməsi, jurnalistlərin sosial rifahının yaxşılaşdırılması və peşəkarlığının artırılması istiqamətində mühüm addımlar atılmışdır. Medianın inkişafı üçün qanunvericilik bazası yenilənmiş, müasir dövrün çağırışlarına uyğun islahatlar həyata keçirilmişdir. Azərbaycan Prezidenti İlham Əliyevin 2009-cu ilin martında imzaladığı Sərəncamla Prezident yanında Kütləvi İnformasiya Vasitələrinə Dövlət Dəstəyi Fondu yaradıldı. Fondun yaradılmasında məqsəd Azərbaycanda fikir, söz və məlumat azadlığı şəraitini yaxşılaşdırmaq, o cümlədən buna xidmət edən kütləvi informasiya vasitələrinə dövlət dəstəyi idi. Rəqəmsal texnologiyaların sürətlə inkişaf etdiyi müasir dövrdə medianın qarşısında yeni vəzifələr dayanır. İnformasiya təhlükəsizliyinin qorunması, dezinformasiyaya qarşı mübarizə, operativ və obyektiv xəbərlərin ictimaiyyətə çatdırılması jurnalistikanın əsas prioritetlərindən biridir. Azərbaycan mediası da bu istiqamətdə öz fəaliyyətini daim təkmilləşdirir, milli maraqların qorunmasına xidmət edən informasiya siyasəti həyata keçirir.
Xüsusilə 44 günlük Vətən müharibəsi dövründə Azərbaycan jurnalistləri böyük peşəkarlıq nümayiş etdirərək cəbhədən operativ məlumatlar çatdırmış, Ermənistanın yaydığı saxta məlumatların ifşa olunmasında mühüm rol oynamışlar. Mətbuat nümayəndələri Azərbaycanın haqq səsinin beynəlxalq ictimaiyyətə çatdırılması istiqamətində yorulmadan fəaliyyət göstərmiş, informasiya müharibəsində ölkəmizin mövqeyinin müdafiəsinə əhəmiyyətli töhfə vermişlər. Bu gün Azərbaycan mediası yeni inkişaf mərhələsinə qədəm qoymuşdur. Ənənəvi media ilə yanaşı, elektron media və rəqəmsal platformalar da cəmiyyətin informasiya təminatında mühüm rol oynayır. Müasir jurnalistikanın əsas prinsipləri olan obyektivlik, qərəzsizlik, operativlik və peşəkarlıq daim ön planda saxlanılır.
22 İyul – Milli Mətbuat Günü yalnız jurnalistlərin peşə bayramı deyil, həm də Azərbaycan sözünün, milli düşüncəsinin və dövlətçilik ənənələrinin təntənəsidir. Milli mətbuatımızın keçdiyi şərəfli yol gələcək nəsillər üçün örnək olaraq qalacaq və Azərbaycanın inkişafına bundan sonra da xidmət edəcəkdir.

Azər Ağayev
YAP Tərtər rayon təşkilatının sədr müavini

Paylaş:

Baxılıb: 119 dəfə