Azərbaycan və Mərkəzi Asiya arasında strateji tərəfdaşlığın yeni mərhələsi

Bakı:

21 °C

94 %

4 m/s

Əlaqə

AZ RU EN

Ana səhifə / Arxiv / Azərbaycan və Mərkəzi Asiya arasında strateji tərəfdaşlığın yeni mərhələsi

Azərbaycan və Mərkəzi Asiya arasında strateji tərəfdaşlığın yeni mərhələsi

13.10.2026 [11:16]

Azərbaycan Respublikasının Prezidenti İlham Əliyevin 8 oktyabr 2026-cı il tarixində Türkmənistanın Türkmənbaşı şəhərində Azərbaycan Respublikası və Mərkəzi Asiya Dövlət Başçılarının 8-ci Məşvərət görüşündə çıxışı ölkəmizin regional əməkdaşlığın genişləndirilməsi, iqtisadi əlaqələrin dərinləşdirilməsi və beynəlxalq mövqeyinin möhkəmləndirilməsi istiqamətində həyata keçirdiyi ardıcıl siyasətin mühüm təzahürüdür. Dövlət başçısının çıxışı Azərbaycanın Mərkəzi Asiya ölkələri ilə münasibətlərinin artıq ənənəvi dostluq əlaqələrindən daha geniş məzmun daşıdığını, ortaq iqtisadi maraqlara, strateji layihələrə və uzunmüddətli inkişaf məqsədlərinə əsaslandığını bir daha nümayiş etdirdi.
Türkmənistanın Avaza kompleksində keçirilən görüş Azərbaycan ilə Mərkəzi Asiya dövlətləri arasında çoxtərəfli əməkdaşlığın inkişafı baxımından xüsusi əhəmiyyət daşıyır. Azərbaycanın 2025-ci ilin noyabrında Mərkəzi Asiya Dövlət Başçılarının Məşvərət formatının tamhüquqlu iştirakçısına çevrilməsi ölkəmizin regionda artan nüfuzunun və qarşılıqlı etimadın mühüm göstəricisidir.Prezident İlham Əliyev çıxışında bu tarixi qərara görə dövlət başçılarına təşəkkürünü bildirmiş, Azərbaycanın formatda tamhüquqlu iştirakının təmin olunmasında Türkmənistanın və Qurbanqulu Berdiməhəmmədovun rolunu xüsusi vurğulamışdır.
Azərbaycanın Mərkəzi Asiya dövlətləri ilə münasibətlərinin əsasını tarixi bağlılıq, ortaq mədəni irs, mənəvi yaxınlıq və qarşılıqlı hörmət təşkil edir. Prezident İlham Əliyevin çıxışında bu amillərin xüsusi yer tutması əməkdaşlığın yalnız iqtisadi maraqlarla məhdudlaşmadığını göstərir.

Prezident İlham Əliyevin çıxışında iqtisadi-ticari əlaqələrin genişləndirilməsi və qarşılıqlı investisiyaların artırılması əsas istiqamətlərdən biri kimi diqqətə çatdırılmışdır. Dövlət başçısının qeyd etdiyi kimi, ötən il Azərbaycanın Mərkəzi Asiya ölkələri ilə ticarət dövriyyəsi 50 faizdən çox artmış, həmin ölkələrin kapitalı ilə Azərbaycanda 400-dən çox şirkət fəaliyyət göstərməyə başlamışdır.
Bu göstəricilər region ölkələri arasında iqtisadi əlaqələrin inkişaf etdiyini və qarşılıqlı maraqların daha da gücləndiyini nümayiş etdirir. Bununla belə, Prezident İlham Əliyev əməkdaşlığın yalnız ticarət dövriyyəsinin artırılması ilə məhdudlaşmamasının vacibliyini vurğulamışdır. Azərbaycanın Qazaxıstan, Özbəkistan və Qırğızıstanla yaratdığı birgə investisiya fondlarının imkanlarından daha səmərəli istifadə edilməsi yeni istehsal sahələrinin formalaşmasına, sahibkarlıq əlaqələrinin genişlənməsinə və iqtisadiyyatların qarşılıqlı tamamlanmasına şərait yarada bilər.
Prezident İlham Əliyevin çıxışında səsləndirilən mühüm mesajlardan biri də sülhün, təhlükəsizliyin və siyasi-iqtisadi sabitliyin regional əməkdaşlığın əsasını təşkil etməsidir. Dövlətlər arasında iqtisadi əlaqələrin genişlənməsi, nəqliyyat dəhlizlərinin səmərəli fəaliyyəti, enerji layihələrinin həyata keçirilməsi və investisiya mühitinin yaxşılaşdırılması ilk növbədə sabitliyə və qarşılıqlı etimada əsaslanır.
Azərbaycanın regional əməkdaşlığa verdiyi töhfə də bu prinsiplərlə sıx bağlıdır.

Türkmənbaşı görüşü bir daha təsdiq etdi ki, Azərbaycan ilə Mərkəzi Asiya ölkələri arasında münasibətlər yeni inkişaf mərhələsinə qədəm qoyur. Bu mərhələ ortaq tarixi və mənəvi dəyərləri iqtisadi tərəfdaşlıq, müasir texnologiyalar və strateji hədəflərlə birləşdirərək regionun gələcəyinə daha geniş perspektivlər açır.
Azərbaycanın regional əməkdaşlığın gücləndirilməsinə verdiyi töhfə, Prezident İlham Əliyevin həyata keçirdiyi məqsədyönlü siyasət və dövlətlər arasında qarşılıqlı faydaya əsaslanan münasibətlər ölkəmizin beynəlxalq nüfuzunun daha da möhkəmlənməsinə xidmət edir.

Gündüz Alıkişiyev

YAP Tərtər rayon təşkilatının məsləhətçisi

Paylaş:

Baxılıb: 4 dəfə