Fransadan daha bir anti-demokratik addım...

Bakı:

23 °C

68 %

2 m/s

Əlaqə

AZ RU EN

Ana səhifə / Dünya / Fransadan daha bir anti-demokratik addım...

Fransadan daha bir anti-demokratik addım...

23.04.2025 [09:25]

Fransada hüquq-mühafizə orqanları şəxsi toxunulmazlıq hüququnu kobul şəkildə pozurlar. Belə ki, “Telegram”- ın həmtəsisçisi Pavel Durov Fransa polisini sözügedən sosial şəbəkədəki yazışmaları ələ keçirmək cəhdində ittiham edib. Durov öz “X” sosial şəbəkə hesabında qeyd edib ki, Fransa polisi “Telegram” - dakı şəxsi məlumatlara girişə məhdudiyyətlərin aradan qaldırılmasını təkid edir. O, Fransa hüquq-mühafizə orqanlarının bu tələbini insan hüquqlarına zidd hesab edib - belə bir halın baş verəcəyi təqdirdə şəbəkəyə üzv olanların şəxsi mesajlarının təhlükə altına düşəcəyini bildirib: “12 illik tarixində “Telegram” heç vaxt bir bayt da olsun şəxsi mesajı açıqlamayıb. Avropa İttifaqı Rəqəmsal Xidmətlər Aktına uyğun olaraq, etibarlı məhkəmə qərarı ilə təmin olunarsa, “Teleqram” cinayətdə şübhəli bilinən şəxslərin mesajlarını deyil, yalnız IP ünvanlarını və telefon nömrələrini açıqlayacaq. Heç bir ölkə azadlıqların yavaş-yavaş aşınmasından sığortalanmayıb. Hər gün bu azadlıqlar hücuma məruz qalır və biz onları müdafiə etməliyik,” - deyə Durov vurğulayıb. “Telegram” - ın həmtəsisçisinin bu sözləri bir daha Fransanın xislətini sübut etmiş oldu. Fransada insan hüquqlarının və azadlıqlarının kobud şəkildə pozulmasını artıq ekspertlər də etiraf edirlər. Heç bir hüquqi əsas olmadan vətəndaşların şəxsi məlumatlarının ələ keçirilməsi anti-demokratik addım kimi qiymətləndirilir. Bu, özünü demokratiyanın “tacı” hesab edən Fransanın Qərb dəyərlərini necə tapdaladığını aydın şəkildə sübut edir. Son doqquz ildə Parisdə və Fransanın bir sıra şəhərlərində keçirilən dinc aksiyaların zorla dağıdılması, sosial hüquqların məhdudlaşdırılması, Fransaya məxsus dənizaşırı regionlarda azadlıq tələb edənlərin repressiyaya məruz qalmaları, o cümlədən bu yaxınlarda müxalif liderin həbsi və seçkilərdə iştirakının qadağan edilməsi və şəxsi məlumatlara girişə cəhd Fransa hakimiyyətinin məqsədyönlü şəkildə insan hüquqlarını pozduğunu deməyə əsas verir.

Məsələ ilə bağlı siyasi ekspert İlyas Hüseynov “Yeni Azərbaycan” qəzetinə şərhində qeyd edib ki, son zamanlar Fransada insan hüquqlarının pozulması adi hala çevrilib:

“İndiki Fransa hakimiyyəti dəfələrlə anti-demokratik addımlar atıb. Bir çox dinc aksiyaların polis zorakılığı ilə dağıdılması, xüsusilə də Fransanın müstəmləkəçilik siyasətini davam etdirməsi və dənizaşırı regionlarda yerli xalqların əsarət altında saxlanılması, indi də şəxsi toxunulmazlıq hüququnun tapdalanmasına təşəbbüsün göstərilməsi - bütün bunlar insan hüquqlarının pozulmasının bariz nümunəsidir. Şəxsi məlumatlara girişə məhdudiyyətlərin aradan qaldırılmasını tələb etmək şəxsi azadlıqlara hörmətsizlikdir. Xüsusilə qeyd edim ki, Fransada insan hüquqlarının pozulması və demokratik dəyərlərin tapdanması məhz Makron hakimiyyəti dövründə daha çox təsadüf edilir. Makrondan əvvəl Fransa barədə bu cür məlumatlara təsadüfi hallarda rast gəlmək olardı. Daxili və xarici siyasətdə buraxılmış kobud səhvlər, Qərbi-Mərkəzi Afrikada geostrateji mövqelərin itirilməsi və beynəlxalq səviyyədə nüfuzun zəifləməsi Makron hakimiyyətini irrasional addımlar atmağa vadar edir. Sosial şəbəkə istifadəçilərinin şəxsi məlumatlarına giriş təşəbbüsü bu addımlardan biridir. “Telegram”- a münasibət də bu siyasətin təzahürüdür. İndiki hakimiyyət belə hesab edir ki, “Telegram”-da istifadəçilərin şəxsi məlumatlarını ələ keçirməklə Rusiyanı asanlıqla ittiham edəcəklər. İnsan hüquqları baxımından, sosial şəbəkə istifadəçilərinin şəxsi məlumatlarının təhlükəsizliyi xüsusi əhəmiyyət kəsb edir. Təəssüflər olsun ki, Fransa hakimiyyəti buna əks-mövqe nümayiş etdirir”.

Yunis ABDULLAYEV

Paylaş:

Baxılıb: 655 dəfə