Ədəbiyyat İnstitutunda professor Teymur Əhmədovun 90 illiyinə həsr olunmuş elmi sessiya

Bakı:

26 °C

55 %

5 m/s

Əlaqə

AZ RU EN

Ana səhifə / Elm / Ədəbiyyat İnstitutunda professor Teymur Əhmədovun 90 illiyinə həsr olunmuş elmi sessiya

Ədəbiyyat İnstitutunda professor Teymur Əhmədovun 90 illiyinə həsr olunmuş elmi sessiya

29.12.2020 [09:35]

Nizami Gəncəvi adına Ədəbiyyat İnstitutunda görkəmli filologiya elmləri doktoru, professor Teymur Əhmədovun 90 illik yubileyinə həsr olunmuş onlayn elmi sessiya keçirilib.
İnstitutdan AZƏRTAC-a bildirilib ki, müəssisənin direktoru, akademik İsa Həbibbəyli çıxışında Teymur Əhmədovu Azərbaycan ədəbiyyatşünaslıq elminin ağsaqqalı kimi xarakterizə edib. Qeyd edib ki, o, iki cəhətinə görə rekorda imza atıb. Birincisi, 90 yaşına çatan alim kimi, ikincisi 90 yaşında da yazıb-yaradaraq mətbuatda müntəzəm olaraq çap olunan ziyalı kimi.
Akademik əlavə edib ki, onun yazdıqları ilkin mənbələrə söykənən ciddi mətnlərdir, özünəməxsus üslubunun əsasını akademik üslub təşkil edir. Bununla belə, qəzetdə işlədiyi üçün publisistik üslubu da özünəməxsusdur. Bir sözlə, onun sabit üslubu var, öz fərdi üslubunu təsdiq edib. Teymur Əhmədov nərimanovşünaslığı xüsusi elmi istiqamətə çevirib, qırx il bu istiqamətdə tədqiqatlar aparıb. O, Azərbaycan nərimanovşünaslığının yaradıcısı və ən görkəmli nümayəndəsidir. Onun yaradıcılığında faktla, mənbə ilə, arxiv sənədləri ilə, dövri mətbuatla işləmək mədəniyyəti var. Bu il Nəriman Nərimanovun ikicildliyini ortaya qoydu. “Nəriman Nərimanov” monoqrafiyasını təkmilləşdirib yenidən çap etdirdi. Həm də Nəriman Nərimanov haqqında altı dildə tanıtma kitabı nəşr etdirib. Bundan başqa, Mirzə İbrahimov, Mir Cəlal Paşayev haqqında da sanballı tədqiqatların müəllifidir.
Ədəbiyyat İnstitutunun direktor müavini, filologiya elmləri doktoru Əlizadə Əsgərli “Sənətkarın elmi pasportu seriyası”nda işıq üzü görən “Teymur Əhmədov: ədəbiyyat və mətbuat” kitabı haqqında iştirakçılara məlumat verərək yubilyara təbriklərini çatdırıb.
Sessiyada “Professor Teymur Əhmədovun ədəbiyyatşünaslıq görüşləri”, “Füyuzat” jurnalında professor Teymur Əhmədovun türk dili və ədəbiyyatı haqqında görüşlərinə dair”, “Professor Teymur Əhmədovun ədəbiyyatşünaslıq görüşlərində akademik Mirzə İbrahimovun rolu”, “Professor Teymur Əhmədov və Azərbaycan mətbuatı” və s. mövzularda məruzələr dinlənilib.
Ədəbiyyat nəzəriyyəsi şöbəsinin müdiri, professor Tahirə Məmməd, filologiya üzrə fəlsəfə doktoru, “Respublika” qəzetinin baş redaktor müavini Hümbət Musayev, “Füyuzat” jurnalının redaktoru Mübariz Yunis, sosiologiya üzrə fəlsəfə doktoru Samir Səttarov, Ədəbiyyat İnstitutunun elmi katibi, filologiya üzrə fəlsəfə doktoru Mehman Həsənli çıxışlarında yubilyarın həyat və fəaliyyətinin müxtəlif tərəflərindən söz açıblar.
Sonda Teymur Əhmədov həmkarlarına ona belə yüksək qiymət verdikləri üçün təşəkkürlərini çatdıraraq deyib: “Taleyimin 60 ili Ədəbiyyat İnstitutu ilə bağlıdır. 60 ilin 30 ilini Nəriman Nərimanovun tədqiqatı ilə məşğul olmuşam. Mən 24 yaşımda bu məbədə gəlmək üçün yeddi il hazırlaşmışam. 1995-ci ildə ulu öndər Heydər Əliyev məni çağırıb “Respublika” qəzetinə baş redaktor təyin etdi. 25 ildir bu işdə çalışıram. “Füyuzat” jurnalının 100 illiyindən sonra onun davamı kimi mən jurnalı bərpa etdim”.
Yubilyar 90 illik yubileyini torpaqları düşmən işğalından azad olunmuş Azərbaycanın vətəndaşı kimi qeyd etməsi sevincinə görə Müzəffər Ali Baş Komandana xüsusi təşəkkürlərini çatdırıb. Prezident İlham Əliyevin böyük diplomatiyasının nəticəsi olaraq Kəlbəcər və digər çətin relyefə malik rayonlarımızın bir güllə atılmadan, şəhid vermədən azad edilməsini əsl Qələbə adlandırıb.

Paylaş:

Baxılıb: 1437 dəfə