Yelkənçi idmançıların “Federasiya Kuboku” uğrunda gərgin idman mübarizəsi uğurla başa çatıb

Bakı:

11 °C

93 %

4 m/s

Əlaqə

AZ RU EN

Ana səhifə / İdman / Yelkənçi idmançıların “Federasiya Kuboku” uğrunda gərgin idman mübarizəsi uğurla başa çatıb

Yelkənçi idmançıların “Federasiya Kuboku” uğrunda gərgin idman mübarizəsi uğurla başa çatıb

09.10.2018 [08:40]

Azərbaycan Yelkənli İdman Federasiyası tərəfindən təşkil olunan “Federasiya Kuboku” yarışları üzrə iki gün ərzində “Laser” və “Optimist” siniflərinin yarışı keçirilib və “Windsurf sinfi”nin nümayişi olub. Yarışda, həmçinin “Azərbaycan Xəzər Dəniz Gəmiçiliyi” QSC-nin “Xəzər” Yelkənli Qayıqlar İdman Klubunun “Laser-standard” sinfi üzrə komandası da iştirak edib.
Federasiyadan AZƏRTAC-a bildiriblər ki, çətin hava şəraitində gərgin idman mübarizəsi aparan yelkənçilər yarışı uğurla başa vurublar. Yelkənçilərin mübarizəsi böyük maraq və diqqətlə izlənilib.
“Optimist” sinfi üzrə yarışda Yelkənli İdman Federasiyasının (YİF) üzvləri fərqləniblər. Belə ki, Ömər İsmayılov birinci, Səxavət Əzimov ikinci, Fidan Ağazadə isə üçüncü olub.
İsmayıl Kərimov, Cavid Kərimov və Murad Allahverdi “Laser 4.7” sinfi üzrə yarışlarda ilk üçlükdə qərarlaşıblar. Qalib idmançılar YİF-in yetirmələridir.
“Laser Standart” sinfi üzrə yarışlarda “Xəzər” yelkənli qayıqlar idman klubunun üzvləri mükafatçılar sırasında yer alıblar. Belə ki, Mixail Protasov bütün rəqiblərini qabaqlayaraq fəxri kürsünün ən yüksək pilləsinə qalxıb. Tofiq Abdullayev yarışı ikinci, Ruslan Əzizov isə üçüncü pillədə başa vurublar.
Yekunda yelkənçilər iştirak sertifikatları, təşəkkürnamə ilə təltif olunublar.
Daha sonra “Optimist”, “Laser 4.7”, Laser Standart” sinifləri üzrə yarışın qalibləri mükafatlandırılıblar.
Yarış idman əlaqələndiricisi, hakim Burcu Algon Giorgianni, “Optimist” sinfinin baş məşqçisi Seyhun Yıldız, “Laser 4.7” sinfinin baş məşqçisi Tuğçe Subaşı, “Laser standard” sinfinin baş məşqçisi Tatyana Srebnaya, köməkçi məşqçilər Aleksandr Knyazev, Anton Vilyayev tərəfindən idarə olunub.
Qeyd edək ki, aktiv bazası 2014-cü ildən etibarən fəaliyyətə başlayan Azərbaycan Yelkənli İdman Federasiyasının əsas məqsədi hər zaman maddi-texniki bazanı gücləndirmək, məşqçi korpusunu formalaşdırmaq, komandaya yeni idmançıları cəlb etmək olub. Federasiyada hazırda “Optimist” və “Laser” sinifləri üzrə iki komanda formalaşıb. Bu siniflər üzrə ayrı-ayrılıqda, xaricdən dəvət edilən 2 baş məşqçi fəaliyyət göstərir. Məhz xaricdən dəvət edilən idman menecerləri, yüksək göstəricilərə malik mütəxəssislərin köməyi ilə komandaların məşqləri keçirilir.
Məqsədlərə çatmaq üçün Federasiya tərəfindən Avropanın qabaqcıl şirkətlərindən yelkənli idman üzrə qayıqların gətirilməsi, eyni zamanda, qısa müddətdə beynəlxalq səviyyəli məşqçilər Azərbaycana dəvət ediliblər. Bu addımların davamı olaraq mayın 31-dən iyunun 3-dək Yelkənli İdman Federasiyasının komandasının hazırlığı, o cümlədən yerli məşqçilərin təcrübə qazanması məqsədilə təlim düşərgəsi təşkil olunub. Məşqlərin yüksək keyfiyyətli olması və bu istiqamətdə peşəkarlığın artırılması məqsədilə beynəlxalq səviyyəli məşqçi, 6 dünya və 4 Avropa çempionatının qalibi, 30 il məşqçi kimi fəaliyyət göstərən Dragan Qasiç Yelkənli İdman Federasiyası tərəfindən təlimə cəlb edilib.
Azərbaycanı hər zaman beynəlxalq yarışlarda uğurla təmsil edən federasiyanın yelkənçiləri Qazaxıstanın Aktau şəhərində keçirilən “Xəzər Kuboku Beynəlxalq Yelkən Yarışı”nda yüksək nəticələr göstərərək 1-4-cü yerlər üzrə kuboklara sahib olublar. Yarışda təqdim olunan bütün kuboklara sahib çıxan yelkənçilərimizin yarışlarda fədakar iştirakı beynəlxalq səviyyəli məşqçilərin diqqətini cəlb edərək xüsusi rəğbətlə qarşılanmışdı.
Azərbaycan Respublikası Yelkənli İdman Federasiyasının gənc yelkənçisi Kristina Kərimova isə Sloveniyada keçirilən “Easter Regatta” adlı beynəlxalq yarışda 139 idmançı arasından dördüncü yerdə qərarlaşaq yüksək nəticə göstərib.

Paylaş:

Baxılıb: 1338 dəfə