Masazır Duz Zavodunda yeni duz məhsullarının təqdimatı olub

Bakı:

17°C

63%

2m/s

Əlaqə

AZ RU EN

Ana səhifə / İqtisadiyyat / Masazır Duz Zavodunda yeni duz məhsullarının təqdimatı olub

Masazır Duz Zavodunda yeni duz məhsullarının təqdimatı olub

07.12.2012 [03:55]

Zavod kommunal təsərrüfat müəssisələrində, yol istismar idarələrində, neft sənayesində, gön-dəri sənayesində və bir çox başqa sənaye sahələrində tələbatı qarşılamaq üçün də duz məhsulları istehsal edir
Müasir avadanlıqlarla təchiz edilmiş Masazır Duz Zavodu məhsul çeşidlərini artırıb. Zavod həmin məhsulların təqdimatını da keçirib. Bu münasibətlə media təmsilçilərindən ibarət növbəti heyətin zavoda ekskursiyası təşkil olunub.
Yeni məhsullarla tanışlıqdan öncə KİV təmsilçilərinə açıqlama verən “Azərsun Holdinq”in İctimaiyyətlə əlaqələr və sosial xidmətlər departamentinin rəhbəri Afiq Səfərov zavodun tikilməsinin zərurətdən irəli gəldiyini bildirib: “Belə ki, UNİCEF-in 2005-ci ildəki hesablamalarına görə, Azərbaycan əhalisinin 75 faizi yod çatışmazlığı xəstəliyindən əziyyət çəkirdi. Bəhs edilən dövrdə duzlarda yodun olmaması bu vəziyyəti daha da gərginləşdirirdi”.
Onun sözlərinə görə, bir sıra hökumət və qeyri-hökumət orqanlarının ölkədaxili bazarlarda yod çatışmazlığı problemi ilə mübarizə aparmalarına baxmayaraq, sözügedən problemin mövcudluğu “Azərsun Holdinq” Şirkətlər Qrupunu bu sahə üzrə ciddi addımlar atmağa sövq edib: “Beləliklə, uzun sürən çalışmalar nəticəsində ərsəyə gələn Masazır Duz Zavodu hazırda istehsal etdiyi “Azərduz” ilə ölkə bazarlarında və satış şəbəkələrində yod çatışmazlığı problemi ilə mübarizə aparmaqdadır. Hazırda zavodun istehsal etdiyi yodlaşdırılmış, yüksək keyfiyyətli süfrə duzu olan “Azərduz” yerli bazarlarda istehlakçıların ixtiyarına verilməklə, ilk növbədə insan sağlamlığına xidmət edir”.
A.Səfərov onu da deyib ki, özünəməxsus mənzərəsi ilə göz oxşayan Masazır gölünün yanında inşa edilən Masazır Duz Zavodu 2010-cu il 21 iyul tarixində Prezident İlham Əliyevin iştirakı ilə açılıb: “Müəssisə Azərbaycanda ilk dəfə sənaye üsulu ilə emal edilmiş, təmizlənmiş və yodlaşdırılmış duz istehsal etməkdədir. Dünya standartlarına uyğun yüksək səviyyəli texnologiya ilə çalışan Masazır Duz Zavodu 600-ə qədər insanın məşğulluğuna şərait yaradıb”.
Sonra KİV təmsilçiləri zavodda istehsal prosesi və yeni məhsullarla tanış olublar. Jurnalistlər duzun istehsalı prosesini mərhələ-mərhələ əyani şəkildə müşahidə ediblər. Masazır Duz Zavodunun istehsalat müdiri Ceyhun Salmanov media təmsilçilərinə yeni məhsul çeşidləri, zavodun fəaliyyəti, istehsal sahələri barədə ətraflı məlumat verib. Bildirilib ki, zavodda su təmizləmə sistemlərində, hovuzlarda, filtrlərin təmizlənməsində, qazanxanalarda istifadə olunması üçün nəzərdə tutulan tablet duzlar, heyvandarlıq təsərrüfatları üçün heyvan yalama duzları da istehsal olunmaqdadır.
Onun sözlərinə görə, zavod fəaliyyətə başladığı dövrdə sadəcə süfrə duzları istehsal edirdi, amma indi bu çeşidlərin sayı xeyli artıb: “Belə ki, tezliklə Azərbaycan bazarının ehtiyacı olduğu digər duzları da istehsal etməyi qarşımıza məqsəd qoyduq. Qərara alındı ki, ölkəmizdə sənaye və qeyri-sənaye sektorunda istifadə olunan duzlar xaricdən gətirilməsin və Azərbaycanın öz ehtiyatları çərçivəsində bu öz həllini tapsın. Biz bunun üçün süfrə duzundan başlayaraq, duzlarımızın çeşidini artırdıq. Bu gün Masazır Duz Zavodu vasitəsilə Azərbaycanın duza olan tələbatı 100 faiz ödənilir. Hədəfimiz tək Azərbaycan bazarı deyil, həm də qonşu dövlətlər və Avropa ölkələrinin bazarlarıdır. Artıq Azərbaycan xarici dövlətlərə duz istehsal edən bir ölkədir. Rusiya, Ukrayna, Gürcüstan və bir sıra Orta Asiya ölkələrinə duz idxal olunmaqdadır. Bundan başqa, Gürcüstan bazarında olan erməni duzunu sıxışdırıb sıradan çıxarmışıq. Gürcüstanlılar Azərbaycanın əla növ duzuna daha çox üstünlük verirlər”.
Nadir AZƏRİ

Paylaş:

Baxılıb: 1514 dəfə