SOCAR-AQŞ “Qərbi Abşeron” yatağında yeni horizontal quyu tikintisini başa çatdırıb

Bakı:

3 °C

65 %

11 m/s

Əlaqə

AZ RU EN

Ana səhifə / İqtisadiyyat / SOCAR-AQŞ “Qərbi Abşeron” yatağında yeni horizontal quyu tikintisini başa çatdırıb

SOCAR-AQŞ “Qərbi Abşeron” yatağında yeni horizontal quyu tikintisini başa çatdırıb

12.02.2016 [09:58]

SOCAR-AQŞ 20 saylı stasionar dəniz özülündən layihə dərinliyi 823 m olan 28 saylı quyunun tikintisi işlərini təhlükəsiz, ətraf mühitə heç bir ziyan vurmadan və vaxtından əvvəl uğurla yekunlaşdırıb.
Qeyd edək ki, 28 saylı quyuda qazma işlərinə 30 dekabr 2015-ci ildə başlanılmışdı. “Qərbi Abşeron” yatağında qazılan quyunun faktiki dərinliyi 820 metr təşkil edir. Quyu Qırmaki Altı Lay Dəstəsinə (QAD) maksimum 53 dərəcə bucaq altında qazılmışdır.
20 saylı stasionar dəniz özülün qurğu rəisi Səyavuş Abdullayev müəssisənin həyata keçirdiyi işlərə münasibət bildirərək qeyd edib ki, dayaz quyuların qazılmasının özünəməxsus xüsusiyyətləri var: “Dayaz quyularda baş verə biləcək hadisələrin tezliyini nəzərə alaraq qazma briqadasından daha diqqətcil və çevik olmaları tələb olunur. 28 saylı quyunun qazılmasında müəssisəmiz yeni avadanlıq - HH 300 qazma qurğusundan uğurla istifadə etmişdir. 300 at gücündə olan, tam avtomatlaşdırılmış və yığcam olan bu qurğu hidravlik olduğundan qazma baltasına əlavə olaraq 30 tona yaxın yük verə bilir”.
28 saylı quyu cari ilin 3 fevral tarixində sifarişçiyə təhvil verilib. Quyu gündəlik 20 ton neft hasilatı ilə istismar fonduna qəbul edilib. Qeyd edək ki, sifarişçi SOCAR-ın “Azneft” İstehsalat Birliyidir.
Xatırladaq ki, SOCAR-AQŞ MMC inteqrə olunmuş qazma və quyu xidmətləri göstərən birgə müəssisə kimi SOCAR və “Abşeron Qazma” Şirkəti tərəfindən 2007-ci ildə təsis edilib. Müəssisənin əsas fəaliyyəti quyuların layihələndirilməsi və planlaşdırılması, neft və qaz quyularının qazılması, maili istiqamətləndirilmiş quyuların qazılması, horizontal quyuların qazılması, quyuların mənimsənilməsi, quyuların əsaslı təmiri, yan lülələrin qazılması və çoxşaxəli quyuların qazılması ilə bağlı iş və xidmətlərin təqdim edilməsindən ibarətdir. Hazırda SOCAR-AQŞ dayaz sulu “Günəşli” yatağında yerləşən 11 saylı, “Qərbi Abşeron” yatağının 20 saylı və “Ümid” yatağının 1 saylı Dərin Dəniz Stasionar Özüllərində (DDSÖ) qazma işləri aparır. Müəssisə, eyni zamanda, “Bulla” və “Günəşli 7” yataqlarında qazma işlərinin həyata keçirilməsi üçün hazırlıq işlərini davam etdirir. Müəssisə, 2009-cu ildən etibarən IADC təşkilatının üzvüdür. SOCAR-AQŞ, Dənizdə Neft və Qaz Quyularının Qazılması və Quyu Təmiri Xidmətlərinin Göstərilməsi, Kəmər Endirmə Xidmətləri, Atqıya Qarşı Avadanlıqların və Quyuağzı Avadanlıqların Təmiri və Sınağı Xidmətlərinin göstərilməsi üçün ISO 9001:2008, ISO 14001:2004 və OHSAS 18001:2007 beynəlxalq standartlarının tələblərinə əsasən sertifikatlaşdırılıb. SOCAR-AQŞ, API Spec Q2 sertifikatını yaxın zamanda əldə etmək məqsədilə iş aparır.

Paylaş:

Baxılıb: 1178 dəfə