Ölkəmizdəki dini və milli tolerantlıq mühiti dünyaya nümunədir

Bakı:

28 °C

49 %

12 m/s

Əlaqə

AZ RU EN

Ana səhifə / MEDİA / Ölkəmizdəki dini və milli tolerantlıq mühiti dünyaya nümunədir

Ölkəmizdəki dini və milli tolerantlıq mühiti dünyaya nümunədir

09.07.2021 [09:41]

Ekspertlərin fikrincə, Azərbaycan təcrübəsi əyani şəkildə göstərir ki, müxtəlif mədəniyyətlərə və dinlərə mənsub olan xalqlar mehribanlıq, sülh, əməkdaşlıq şəraitində bir ailə kimi yaşaya bilərlər
Tolerantlıq nümunəsi olan Azərbaycanda multikultural dəyərlərə və ənənələrə həssaslıqla, hörmətlə yanaşılır. Cənubi Qafqaz regionunun lider dövləti olan Azərbaycan, eyni zamanda, millətlərarası və dinlərarası münasibətlərin inkişaf etdirilməsi baxımından da nümunəvi ölkə kimi xarakterizə olunur. Bu da səbəbsiz deyil. Belə ki, ölkəmizdə milli və dini müxtəliflik bəzi dövlətlərdən fərqli olaraq insanlar arasında fərq yaradan amil kimi deyil, əksinə, tolerantlıq mühitinin əsas komponentləri olaraq çıxış edir. Daha dəqiq desək, bu amil birləşdirici funksiya daşıyır.
Bu məqamda vurğulanmalıdır ki, 1993-cü ilin iyununda xalqın təkidli tələbi ilə yenidən siyasi hakimiyyətə qayıdan Ulu Öndər Heydər Əliyevin əsasını qoyduğu, milli və dini tolerantlığı özündə əks etdirən siyasi kurs bu gün Prezident İlham Əliyev tərəfindən uğurla davam etdirilir. Təsadüfi deyil ki, ölkəmizdə müxtəlif xalqların nümayəndələri bir ailə kimi yaşayırlar.
Məsələ ilə bağlı fikirlərini bölüşən Milli Məclisin İctimai birliklər və dini qurumlar komitəsinin üzvü Ceyhun Məmmədov bildirib ki, ölkəmizdə dini tolerantlığın qorunması və millətlərarası münasibətlərin inkişaf etdirilməsi istiqamətində mühüm addımlar atılır. Millət vəkili deyib ki, respublikamızda dövlət qeydiyyata alınan hər bir dini icmaya sərbəst şəkildə, maneəsiz fəaliyyət göstərmək üçün şərait yaradılıb.
Ölkəmizdə müxtəlif dinlərin nümayəndələrinə olan diqqət və qayğının Azərbaycan dövlətinin din siyasətinin mühüm istiqamətlərindən birini təşkil etdiyini söyləyən Ceyhun Məmmədov əlavə edib ki, hər il dövlət tərəfindən dini icmalara müvafiq qaydada dəstək göstərilir, dini bayram və mərasimlər dövlət səviyyəsində qeyd edilir: “Azərbaycanda dövlət müstəqilliyindən əvvəl 18 məscid mövcud idisə, hazırda ölkəmizdə 2250 məscid, 16 kilsə və 7 sinaqoq fəaliyyət göstərir. Bu günədək Dini Qurumlarla İş üzrə Dövlət Komitəsində 970 dini qurum dövlət qeydiyyatından keçib. Onlardan 933-ü İslam, 37-si isə qeyri-islam - 26-sı xristian, 8-i yəhudi, 1-i krişna, 2-si bəhai dini icmalarıdır. Eyni zamanda, ölkəmizdə 11 dini təhsil müəssisəsi (kollec) dövlət qeydiyyatına alınıb. 2014-cü ilin mayında Azərbaycanda dini dözümlülük ənənələrinin daha da möhkəmləndirilməsi, milli və dini azlıqlara dövlət qayğısının artırılması məqsədilə Bakı Beynəlxalq Multikulturalizm Mərkəzi yaradılıb. Sözügedən mərkəzin fəaliyyəti Azərbaycan həqiqətlərinin və multikulturalizmin dünyada təbliğində olduqca mühüm əhəmiyyətə malikdir”.
Millət vəkili onu da bildirib ki, 30 ilə yaxın işğal altında qalmış dini tarixi abidələrimizə qarşı ermənilər tərəfindən törədilən vəhşiliklər haqqında dünya ictimaiyyətinə 44 günlük Vətən müharibəsində əldə olunmuş qələbədən sonra əyani şəkildə məlumat verildi. Eyni zamanda, Ermənistandan fərqli olaraq Azərbaycan dövlətinin digər dinlərə məxsus tarixi abidələri qorumaq, bərpa etmək üçün davamlı addımlar atdığı bir daha beynəlxalq birliyin diqqətinə çatdırıldı.
Milli Məclisin İctimai birliklər və dini qurumlar komitəsinin üzvü Azər Badamov da Azərbaycanın tarixən müxtəlif millətlərin dinc, yanaşı yaşadığı, milli və dini tolerantlığın bərqərar olduğu ölkə olduğunu bildirib. Millət vəkili qeyd edib ki, Azərbaycanda hər zaman hər bir xalqın, millətin nümayəndəsinə bərabər münasibət göstərilib və göstərilməkdədir. Ölkəmizdə millətlərarası münasibətlərin inkişafı istiqamətində Ulu Öndər Heydər Əliyevin əsasını qoyduğu siyasi kursun Prezident İlham Əliyev tərəfindən uğurla davam etdirildiyini diqqətə çatdıran A.Badamov əlavə edib ki, məhz dövlət başçımızın apardığı uğurlu fəaliyyət Azərbaycanın multikulturalizm ünvanı və tolerantlıq nümunəsi kimi dünyada şöhrət qazanmasını şərtləndirdi: “Fərqli dini və etnik mənsubiyyətə malik insanların ölkəmizdə mehriban birgəyaşayış mədəniyyəti nümayiş etdirməsi xalqımızın üstünlüyü, cəmiyyətimizin zənginliyidir. Bu gün ölkəmizdə bütün dinlərə mənsub şəxslər azad və rahat şəkildə öz inanclarına, dini dəyərlərinə sahib çıxır, ibadətlərini edirlər”.
Millət vəkili onu da vurğulayıb ki, istər Birinci, istərsə də İkinci Qarabağ müharibəsində Azərbaycanda yaşayan müxtəlif xalqların nümayəndələri ölkəmizin ərazi bütövlüyü uğrunda böyük fədakarlıq və qəhrəmanlıq nümayiş etdiriblər. Ölkəmizdə fərqli millətlərdən olan çoxsaylı Milli Qəhrəmanlarımız var. Hər zaman olduğu kimi, bu gün də ölkəmizdə yaşayan bütün xalqlar ölkəmizin ərazi bütövlüyü məsələsində Azərbaycan dövləti ilə eyni mövqedən çıxış edirlər və vahid yanaşma sərgiləyirlər.
Beləliklə, Azərbaycan təcrübəsi əyani şəkildə göstərir ki, müxtəlif mədəniyyətlərə və dinlərə mənsub olan xalqlar mehribanlıq, sülh, əməkdaşlıq şəraitində bir ailə kimi yaşaya bilərlər.
Pərviz SADAYOĞLU
Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Dini və milli tolerantlıq, millətlərarası münasibətlərin inkişaf etdirilməsi” istiqaməti üzrə hazırlanmışdır

Paylaş:

Baxılıb: 926 dəfə