Heydər Əliyev Fondunun təşkilatçılığı ilə Drezdendə növbəti mədəniyyət tədbiri keçirilib

Bakı:

11 °C

82 %

12 m/s

Əlaqə

AZ RU EN

Ana səhifə / Mədəniyyət / Heydər Əliyev Fondunun təşkilatçılığı ilə Drezdendə növbəti mədəniyyət tədbiri keçirilib

Heydər Əliyev Fondunun təşkilatçılığı ilə Drezdendə növbəti mədəniyyət tədbiri keçirilib

10.12.2014 [10:11]

Heydər Əliyev Fondunun təşkilatçılığı və Azərbaycanın Almaniyadakı səfirliyinin dəstəyi ilə bu ölkədə keçirilən Azərbaycan Mədəniyyət Günləri çərçivəsində növbəti tədbir dekabrın 8-də Drezdendə təşkil olunub.
Məşhur “Albertinum” muzeyində keçirilən tədbirin iştirakçıları Qara Qarayev adına Azərbaycan Dövlət kamera orkestrinin ifasında Azərbaycan və dünya bəstəkarlarının əsərlərini dinləyiblər.
Tədbiri açan səfir Pərviz Şahbazov mədəniyyət axşamının Azərbaycanın birinci xanımı, Heydər Əliyev Fondunun prezidenti Mehriban Əliyevanın təşəbbüsü ilə keçirildiyini söyləyib. Diplomat tədbir iştirakçılarına ölkəmizin inkişafı, Azərbaycan-Almaniya münasibətlərinin tarixi kökləri və hazırkı vəziyyəti barədə məlumat verib. Səfir Şərq və Qərb mədəniyyətlərini özündə birləşdirən Azərbaycanın zəngin mədəni irsi, dünya musiqisinə verdiyi töhfələr, ölkəmizdə klassik və müasir musiqinin inkişafı, qazanılan nailiyyətlər haqqında danışıb. O, həmçinin xalqımızın musiqi beşiyi olan Qarabağın və ətraf rayonların Ermənistan silahlı qüvvələri tərəfindən işğal olunmasından bəhs edib.
Tədbirin aparıcısı Azərbaycanda mövcud olan alman irsi, birinci xanım Mehriban Əliyevanın və onun rəhbərlik etdiyi Heydər Əliyev Fondunun ölkəmizdə və xaricdə mədəni irsin qorunub saxlanması, mədəniyyət münasibətlərinin təşviq olunması və gənclərin təhsil almaq imkanlarının yaxşılaşdırılması üçün həyata keçirdiyi işlər barədə məlumat verib. Aparıcı məşhur bəstəkar Qara Qarayevin adını daşıyan Azərbaycan Dövlət kamera orkestrinin də fəaliyyətindən söhbət açıb.
Tədbir iştirakçılarına, həmçinin Heydər Əliyev Fondunun yeni nəşri olan, Berlin Humboldt Universitetində “Azərbaycan tarixi” kafedrasının müdiri, professor Eva Maria Auxun yaxından iştirakı ilə hazırlanan “Azərbaycanda alman irsi” kitabı təqdim edilib. Eyni zamanda, “Azərbaycanda alman izləri” adlı fotosərgi və “Almaniya bir rəssamın gözü ilə” mövzusunda keçirilən rəsm müsabiqəsinin qaliblərinin əsərlərindən ibarət sərgi nümayiş etdirilib.
Tədbirdə Drezden Şəhər Bələdiyyəsinin üzvləri, Saksoniya torpağı parlamentinin deputatları, Drezden Filarmoniyasının direktoru Anselm Roze, Drezden Muzeylər Birliyinin direktoru Qizbert Porstman, şəhərin Sənaye və Ticarət Palatasının idarə heyətinin üzvü Helmut Qolts, Drezden Rəssamlıq Akademiyasının rektoru Matias Flüqe, Drezden Dövlət Muzeyinin direktoru Erika Eşebax, Drezden Operasının direktorluğunun üzvü Solvayq Ekert, Almaniyada akkreditə olunmuş diplomatik korpusun və KİV-lərin nümayəndələri, habelə Saksoniya torpağının müsəlman, pravoslav və yəhudi dini icmalarının rəhbərləri iştirak ediblər.

Paylaş:

Baxılıb: 1147 dəfə