Türkiyə Azərbaycanla təhsil sahəsində əməkdaşlığa böyük önəm verir

Bakı:

27 °C

65 %

9 m/s

Əlaqə

AZ RU EN

Ana səhifə / Müsahibə / Türkiyə Azərbaycanla təhsil sahəsində əməkdaşlığa böyük önəm verir

Türkiyə Azərbaycanla təhsil sahəsində əməkdaşlığa böyük önəm verir

13.03.2012 [01:29]

Murad Adıvar: Azərbaycandakı iqtisadi inkişaf bu ölkəyə ilk dəfə ayaq basan hər bir kəsi valeh edir
ötən həftə Bakıda, “Hyatt Regency” mehmanxanasında 30 ölkəni təmsil edən universitetlərin iştirakı ilə beynəlxalq təhsil sərgisi keçirilib. Sərgi iştirakçıları arasında İzmir Ekonomi Universitetinin stendi ziyarətçilərin böyük marağına səbəb olub. Universitetin prorektoru Murad Adıvar sərgi ilə bağlı öz təəssüratlarını əməkdaşımızla bölüşüb.
-Murad bəy, bir çox ölkələrdə keçirilən analoji sərgilərdə iştirak etmisiniz. Bakıda təşkil olunan təhsil sərgisini necə qiymətləndirirsiniz?
- Bəri başdan qeyd edim ki, sərgi çox yaxşı təşkil olunub. Burada sərgi iştirakçıları, eləcə də, ziyarətçilər üçün hər bir şərait yaradılıb. Bildiyim qədər, təhsil sərgisinin Bakıda keçirilməsi artıq ənənə halını alıb. Və İzmir Ekonomik Universiteti olaraq biz artıq üçüncü ildir ki, bu sərgidə iştirak edirik. Bunun da səbəbləri var. Türkiyə Azərbaycanla təhsil sahəsində əməkdaşlığa çox böyük önəm verir. Odur ki, Bakıda keçirilən analoji sərgilərdə heç tərəddüd etmədən iştirak edirik.
- Universitetinizdə Azərbaycandan nə qədər tələbə təhsil alır?
-öncə qeyd edim ki, İzmir Ekonomik Universitetin (İEU) qurulmasında yaxından iştirak edənlərdən biri-həmyerliniz, Universitetin Fənn-ədəbiyyat fakültəsinin dekanı İsmixan Bayramoğlunun bu işdə çox böyük zəhməti vardır. Budəfəki sərgiyə də elə onunla birlikdə gəlmişəm. O ki qaldı sualın birbaşa cavabına, İEU-da 20-dən artıq azərbaycanlı tələbə təhsil alır. Biz ümid edirik ki, bu tələbələrin sayı ildən-ilə artacaq. Biz digər Türk cümhuriyyətlərindən olan tələbələrin də Universitetimizdə təhsil almasına tərəfdarıq. Azərbaycanın bu mənada bir körpü rolu oynayacağına əminik. çünki burada təhsilə çox böyük önəm verilir. Azərbaycan universitetləri dünyanın bir sıra ali məktəbləri ilə, o cümlədən, İEU ilə əməkdaşlıq edir. Biz də bu əməkdaşlıqdan istifadə edərək tələbə mübadiləsi aparmaq, daha çox tələbəni universitetimizdə görmək istəyirik.
Məlum olduğu kimi, İEU dünya universitetlərinin reytinq sıralamasında ikinci minlikdə qərarlaşıb. Bu, çox mühüm göstəricidir. Hesab edirik ki, Azərbaycandan olan gənclər İEU-nun imkanlarından istifadə etməklə yüksək biliklərə yiyələnə və öz ölkəsi üçün faydalı mütəxəssisə çevrilə bilərlər. Onlar universitetimizdə qazanmış olduqları təcrübələri Azərbaycanda tətbiq edə, ölkənin daha da inkişafına layiqli töhfə verə bilərlər.
- Bəs Azərbaycandakı inkişafı necə qiymətləndirirsiniz?
-Avropanın bir çox şəhərlərində olmuşam. Azərbaycana isə ilk gəlişimdir. Bakıya gələndən sonra buradakı inkişafı görüb heyrətləndim. Tez Türkiyəyə, həyat yoldaşıma zəng vurdum, dedim ki, kaş sən də burada olaydın, bu gözəlliyi öz gözlərinlə görmüş olaydın. Azərbaycan hər bir turisti heyrətləndirəcək qədər gözəl bir ölkədir. Azərbaycandakı iqtisadi inkişaf bu ölkəyə ilk dəfə ayaq basan hər bir kəsi valeh edir. Məlum olduğu kimi, Azərbaycan paytaxtı bu il “Eurovision” musiqi yarışmasına ev sahibliyi edəcək. Hesab edirəm ki, burada yaradılmış gözəlliklər, insanların mehribanlığı və qonaqpərvərliyi avropalı turistlərin uzun müddət yaddaşlarından silinməyəcək. Bu, hər şeydən əvvəl Azərbaycan Prezidenti cənab İlham Əliyevin, eləcə də, Onun islahatçı komandasının öz işinə çox peşəkarcasına yanaşmasından irəli gəlir. Elə məhz bunun nəticəsidir ki, son illərdə Azərbaycan bir-birinin ardınca istər beynəlxalq arenada, istərsə də digər sahələrdə bir-birindən uğurlu nailiyyətlər əldə etməkdədir. Hesab edirəm ki, qarşıdakı illərdə də bu uğurların davamı gələcəkdir.
-Səmimi söhbət üçün təşəkkür edirik.
- Mən də qəzetiniz vasitəsilə bütün Azərbaycan xalqına səmimi salamlarımızı yetirir, onlara rifah və xoş güzəran arzulayıram.
(Sərgidə iştirak edən İzmir Ekonomi Universitetinin nümayəndələri ilə geniş reportajla növbəti sayımızda tanış ola bilərsiniz)
Səlim Loğmanoğlu

Paylaş:

Baxılıb: 1173 dəfə