Kristin Muttonen: Azərbaycanın multikulturalizm, mədəniyyətlərarası və dinlərarası dialoq sahəsində müsbət təcrübəsi var

Bakı:

27 °C

54 %

7 m/s

AZ RU EN

Ana səhifə / Siyasət / Kristin Muttonen: Azərbaycanın multikulturalizm, mədəniyyətlərarası və dinlərarası dialoq sahəsində müsbət təcrübəsi var

Kristin Muttonen: Azərbaycanın multikulturalizm, mədəniyyətlərarası və dinlərarası dialoq sahəsində müsbət təcrübəsi var

09.09.2017 [11:38]

Sentyabrın 8-də Milli Məclisin ATƏT Parlament Assambleyasındakı nümayəndə heyətinin üzvlərinin ölkəmizdə səfərdə olan qurumun sədri xanım Kristin Muttonen ilə görüşü keçirilib.
AZƏRTAC xəbər verir ki, Milli Məclis sədrinin müavini, nümayəndə heyətinin rəhbəri Bahar Muradova Azərbaycanın beynəlxalq təşkilatlarla münasibətlərə xüsusi önəm verdiyini bildirib. O, ATƏT-Azərbaycan əməkdaşlığından, regionda gedən proseslərdən söz açıb, bütün sahələrdə inkişaf edən ölkəmizlə qurum arasında əməkdaşlıq barədə fikirlərini bildirib, bu səfərin əməkdaşlığın genişlədirilməsi baxımından faydalı olacağına ümidvar olduğunu deyib.
Vitse-spiker Ermənistan-Azərbaycan, Dağlıq Qarabağ münaqişəsinin hazırkı durumu haqqında qonağa məlumat verib. Əsas diqqəti Ermənistanın işğalçılıq siyasəti nəticəsində yaranmış münaqişənin nizamlanması məsələsinə yönəldərək, problemin qısa zamanda həlli üçün ATƏT-in əməli addımlar atmasının vacibliyini vurğulayıb. Münaqişənin region üçün təhlükəsindən danışan Bahar Muradova Ermənistan silahlı qüvvələrinin qoşunların təmas xəttində mütəmadi olaraq təxribatlar törətdiyini və dinc azərbaycanlı sakinləri qətlə yetirdiklərini bir daha qonağın diqqətinə çatdırıb, qurumun bu yöndə zəruri addımlar atmalı, Ermənistan tərəfinə ciddi təsirlər göstərməli olduğunu deyib.
ATƏT Parlament Assambleyasının sədri Kristin Muttonen Bakıda olduğu müddətdə ölkə rəhbərliyi ilə müxtəlif sahələrə dair faydalı müzakirələr apardığını deyib. O, Azərbaycanın qurumla əməkdaşlığını yüksək qiymətləndirib və Assambleyadakı nümayəndə heyətinin fəal çalışdığını, mühüm təşəbbüslər və qətnamələr irəli sürdüyünü söyləyib. Qonaq Azərbaycanın multikulturalizm, tolerantlıq, mədəniyyətlərarası və dinlərarası dialoqun qurulması sahəsində müsbət təcrübəsi olduğunu vurğulayıb. Kristin Muttonen Ermənistan-Azərbaycan, Dağlıq Qarabağ münaqişəsinin ədalətli həllinə nail olunması üçün zəruri danışıq mühitinin yaradılmasında əlindən gələni əsirgəməyəcəyini də qeyd edib.
Görüşdə deputat, ATƏT PA-nın vitse-prezidenti Azay Quliyev, millət vəkilləri Kamran Nəbizadə, Tahir Mirkişili, Elşad Həsənov və digər rəsmi şəxslər iştirak ediblər.
Söhbət zamanı qarşılıqlı əhəmiyyət kəsb edən bir sıra məsələlər barədə fikir mübadiləsi aparılıb, hər iki tərəfi maraqlandıran suallar cavablandırılıb.

Paylaş:

Baxılıb: 548 dəfə