Münaqişənin nəticələri nəzərə alınmadan sərhədlərin açılması Azərbaycanın milli maraqlarına ziddir

Bakı:

15 °C

77 %

8 m/s

AZ RU EN

Ana səhifə / Siyasət / Münaqişənin nəticələri nəzərə alınmadan sərhədlərin açılması Azərbaycanın milli maraqlarına ziddir

Münaqişənin nəticələri nəzərə alınmadan sərhədlərin açılması Azərbaycanın milli maraqlarına ziddir

03.09.2009 [01:30]

Novruz Məmmədov: Mən də inanmaq istəyirəm ki, münaqişə həll edilməyincə, münaqişənin həllində güclü irəliləyiş əldə edilməyincə Türkiyə addım atmayacaq
“Hesab edirəm ki, Türkiyə hökuməti, Türkiyə rəhbərliyi münaqişə başlanan gündən indiyədək olan prosesləri nəzərə alacaq. Eyni zamanda, Türkiyə baş nazirinin bu ilin mayında Azərbaycanda verdiyi bəyanat, Türkiyə xarici işlər nazirinin bəyanatlarının mahiyyətindən belə başa düşürük ki, doğrudan da, Türkiyə proseslərin gedişində Azərbaycana verdiyi vədə əməl edəcək. Yəni Türkiyə baş nazirinin dediyi kimi, əgər Ermənistan-Azərbaycan münaqişəsinə və işğala son qoyulmazsa, Türkiyə Azərbaycana verdiyi vədə əməl edəcək, mövqeyindən bir addım da geri dönməyəcək”. Bunu Prezident Administrasiyasının Beynəlxalq əlaqələr şöbəsinin müdiri Novruz Məmmədov “Turan” agentliyinə müsahibəsində bildirib. Şöbə müdirinin sözlərinə görə, Azərbaycan və Türkiyə dost, qardaş, strateji tərəfdaş və bir millət, iki dövlətdir: “Münasibətlərimizin bütün sahələrdə ruhu bundan ibarətdir ki, biz Türkiyə tərəfinə, Türkiyə rəhbərlərinə, Türkiyənin indiki mövqeyinə inanmalıyıq. Mən də inanmaq istəyirəm ki, münaqişə həll edilməyincə, münaqişənin həllində güclü irəliləyiş əldə edilməyincə Türkiyə addım atmayacaq”.
“Dünya birliyi Türkiyənin Ermənistanla birgə atdığı bu addımı hər tərəfdən təqdir edir” deyən Novruz Məmmədov söyləyib ki, Azərbaycanın buna etirazı yoxdur: “Düşünürəm ki, Türkiyənin bu addımı münaqişənin həlli prosesinə çox böyük təsir edə bilər. Türkiyə baş naziri Azərbaycan parlamentində çıxışında qeyd etdi ki, Ermənistanla sərhədləri bu ölkə Azərbaycan ərazilərini işğal etdiyinə görə bağlayıblar. Sərhədlərin bağlanmasının səbəbi budursa, nəticə də bununla bağlı olmalıdır. İnanırıq ki, proseslərin belə getməsinə baxmayaraq Türkiyə vədinə əməl edəcək. çünki bu məsələni Türkiyə parlamenti də təsdiq etməlidir. Ona görə də məsələ parlamentin müzakirəsinə təqdim edilməmişdən öncə Dağlıq Qarabağ münaqişəsinin həllində çox ciddi irəliləyiş əldə olunmalıdır ki, Türkiyənin baş nazirinin və rəhbərliyinin verdiyi vədə uyğun olaraq, onlar hazırda ortada olan sənədləri Böyük Millət Məclisinin təsdiqinə təqdim etsinlər”.
Novruz Məmmədov vurğulayıb ki, Türkiyə-Ermənistan sərhədlərinin açılması münaqişənin nəticələri nəzərə alınmadan baş verərsə, Azərbaycanın milli maraqlarına birbaşa ziddir və Azərbaycan tərəfindən qəbul edilməyəcək.

Paylaş:

Baxılıb: 1140 dəfə