VI Qlobal Bakı Forumu qlobal əhəmiyyətli məsələlərin aktiv müzakirə platformasıdır

Bakı:

24 °C

88 %

8 m/s

Əlaqə

AZ RU EN

Ana səhifə / Siyasət / VI Qlobal Bakı Forumu qlobal əhəmiyyətli məsələlərin aktiv müzakirə platformasıdır

VI Qlobal Bakı Forumu qlobal əhəmiyyətli məsələlərin aktiv müzakirə platformasıdır

17.03.2018 [09:50]

Forum sülh, təhlükəsizlik, əməkdaşlıq, sabitlik və inkişaf prinsipləri çərçivəsində dialoq imkanlarının genişləndirilməsi üçün mühüm əhəmiyyətə malikdir
Xəbər verildiyi kimi martın 15-də Azərbaycanın paytaxtında “İnklüziv cəmiyyətlərin qurulması üçün fərqliliklərin aradan qaldırılması” mövzusunda VI Qlobal Bakı Forumu işə başlayıb. Açılış mərasimindən sonra VI Qlobal Bakı Forumu işini panel iclasları ilə davam etdirib. Bu mötəbər tədbirə 50-dən çox ölkədən 500-dək nümayəndə, o cümlədən Nizami Gəncəvi Beynəlxalq Mərkəzinin üzvü olan sabiq dövlət və hökumət başçıları, beynəlxalq təşkilatların rəhbərləri, tanınmış ictimai-siyasi xadimlər, alimlər qatılıblar.
VI Qlobal Bakı Forumunda aktual çağırışlardan doğan strateji məsələlər müzakirə edilib, Forumun iştirakçıları bu mühüm platformanın əhəmiyyətini olduqca yüksək qiymətləndiriblər. Diqqətə çatdırılıb ki, Qlobal Bakı Forumu beynəlxalq səviyyədə dialoqun genişləndirilməsi baxımından səmərəlidir. Eyni zamanda, Forum regional və beynəlxalq miqyasda mövcud problemlərin həllinə intellektual töhfədir. Bildirilib ki, Forum qlobal gündəlikdə duran məsələlərin müzakirəsi məqsədilə kifayət qədər qısa müddət ərzində dünya platformalarından birinə çevrilib.
Digər tərəfdən, nüfuzlu beynəlxalq media qurumları da Forumu diqqət mərkəzində saxlayırlar. Həmin mətbuat orqanları da VI Qlobal Bakı Forumunun əhəmiyyətindən bəhs edən məqalə və informasiyalarla çıxış ediblər. Ümumi qənaət ondan ibarət olub ki, bu Forum sülh, təhlükəsizlik, əməkdaşlıq, sabitlik və inkişaf prinsipləri çərçivəsində dialoq imkanlarının genişləndirilməsi üçün mühüm platformadır. Eyni zamanda, belə təşəbbüslərin davamlı olması beynəlxalq münasibətlərin gələcəyi üçün xüsusi əhəmiyyət daşıyır.
Öz növbəsində məsələyə münasibət bildirən Milli Məclisin deputatı, akademik Nizami Cəfərov deyib ki, Azərbaycan son illər müxtəlif mövzularda beynəlxalq tədbirlərin təşkilatçısı rolunda çıxış edir: “Çünki ölkəmiz regionda sülh, əmin-amanlıq, əməkdaşlıq məkanına çevrilib. Bu baxımdan, VI Qlobal Bakı Forumu da böyük əhəmiyyət kəsb edir”.
Onun sözlərinə görə, Azərbaycan müxtəlif səpkili beynəlxalq tədbirlərin ənənəsini yaradan ölkələrdən biri sayılmaqdadır: “Azərbaycan həm də sivilizasiyalararası dialoqun formalaşmasına xidmət edən ənənələrin yaranmasına, xalqların, dövlətlərin yaxınlaşmasının yeni yollarını düşünən ölkə kimi çıxış edir”.
“Hesab edirəm ki, müəyyən müddət sonra bu tədbirlər daha çox ölkələri əhatə edəcək. Prezidentlərin, baş nazirlərin, keçmiş dövlət başçılarının, siyasətçilərin, alimlərin, ekspertlərin, müxtəlif təbəqələrin nümayəndələrinin iştirakı ilə keçirilən belə tədbirlər dünyanın çox narahat dönəminə təsadüf edir. Dünyanın bir sıra məkanlarında qarşıdurmalarla müşahidə olunan bir şəraitdə bu tədbirin Bakıda keçirilməsi çox böyük əhəmiyyət kəsb edir. Ona görə ki, Azərbaycan çoxsaylı etnik qrupların, dini konfessiyaların nümayəndələrinin uzun illər bir arada qardaşlıq şəraitində yaşadığı ölkədir. Hazırda multikultural dəyərlərin iflasa uğradığı, bu dəyərlərdən geri çəkilmiş Avropada gedən proseslərin alternativi olaraq ölkəmizdə müşahidə olunan müsbət prosesləri təqdim etmək, əslində, bir mesajdır. Yəni Avropa cəmiyyətləri də bu dəyərlərə istinad etməlidir. Azərbaycanın bu foruma ev sahibliyi etməsi də bu baxımdan dünyaya mesajdır, mühüm çağırışdır”, - deyə akademik vurğulayıb.
Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva isə qeyd edib ki, Azərbaycanda keçirilən VI Qlobal Bakı Forumunda mühüm məsələlər müzakirə olunub. Forumda dünyanın nüfuzlu siyasi, elm, ictimai xadimləri iştirak edib. Onun sözlərinə görə, belə bir mötəbər beynəlxalq tədbirdə dünyada mövcud olan aktual məsələlərin geniş müzakirə olunması müasir beynəlxalq münasibətlər kontekstində mühüm əhəmiyyətə malikdir.
“Bu fakt göstərir ki, beynəlxalq arenada Azərbaycanın rolu güclənir. Azərbaycan Şərqlə Qərbin, sivilizasiyaların qovuşuğunda yerləşdiyi üçün bu mötəbər tədbirin ölkəmizdə keçirilməsi tamamilə qanunauyğundur. VI Qlobal Bakı Forumu mühüm məsələlərin müzakirə edildiyi nüfuzlu bir platformadır. Forumda dünyanın bir çox ölkələrindən nümayəndələr iştirak edib. Hesab edirəm ki, Forumda qlobal əhəmiyyətli məsələlərin müzakirə olunması dünyada mövcud olan bir sıra problemlərin həlli baxımından əhəmiyyətlidir”, - deyə deputat qeyd edib.
Nurlan QƏLƏNDƏRLİ

Paylaş:

Baxılıb: 651 dəfə