Paşinyanın “Qərb yolu” Ermənistanı haraya aparır?

Bakı:

29 °C

43 %

3 m/s

Əlaqə

AZ RU EN

Ana səhifə / Siyasət / Paşinyanın “Qərb yolu” Ermənistanı haraya aparır?

Paşinyanın “Qərb yolu” Ermənistanı haraya aparır?

07.12.2021 [10:14]

Pərviz Sadayoğlu

Artıq bir müddətdir ki, anti-Rusiya əhvalının artdığı Ermənistanda bütün kartlar açılır. Noyabrın 26-da keçirilən Soçi görüşünə qədər Baş nazir Nikol Paşinyan yalnız müxalifətin bəzi kəsiminin anti-Rusiya meyilindən danışırdısa, artıq hakimiyyətin də mövqeyinin nədən ibarət olduğunu ortaya qoyur. Ermənistanın “Past” qəzetinin məlumatına görə, Nikol Paşinyan parlamentdə təmsil olunmayan siyasi qüvvələrin təmsilçiləri ilə görüşündə bəzi siyasi qüvvələrdən “Qərbə inteqrasiya” məsələsində dəstək istəyib.

Kartlar açılır: Baş nazir niyyətini aydın ifadə edir

Hələ 44 günlük müharibədən sonra Ermənistan cəmiyyətində Rusiyaya qarşı aqressiv münasibət formalaşmışdı. Həmin dövrdə Ermənistan hakimiyyəti özünü Rusiyanı “xəyanət”də günahlandıran erməni cəmiyyətinin emosiyalarını cilovlamağa hazır, bunun qarşısının alınması istiqamətində addımlar atırmış kimi göstərməyə çalışsa da, prosesin tam əksinə inkişaf etməsi sirr deyildi. Bu, Paşinyana qarşı loyal olan müxalifətin belə küçələrdə “Moskvaya yox” şüarlarından da açıq şəkildə görünürdü. Beləliklə, Ermənistanın siyasi mühiti öz gələcəyini illərdir ki, qanadı altına sığınaraq yaşadığı Rusiya ilə deyil, öz dövlət imicini zərbə altına qoyaraq Ermənistanı “dəstəkləyən” Fransanın timsalında Qərbə bağladığını göstərdi.

Rəsmi İrəvanın ziyanı qazancından daha artıq olacaq

Ermənistanın Qərbə sığınmağının yeganə səbəbi və ya istiqaməti Fransa deyil. Hələ hakimiyyətə gəldiyi dövrdən bu günə kimi “sorosun adamı” damğasından qurtula bilməyən Paşinyanın “demokratiya sammiti”nə dəvət alması da təsadüf sayıla bilməz. Bu dəvət həm də rəsmi Vaşinqtonun Kremlə mesajıdır. Soçi görüşü zamanı yenidən ATƏT-in ölü Minsk qrupunu xortlatmaq niyyəti Paşinyanın istəyini ortaya qoyurdu: erməni Baş nazir Fransanı, ABŞ-ı yenidən prosesə cəlb, onları bu regional problemin həllində vasitəçi etməyə çalışır. Bunun qarşılığında Paşinyana verilən “vəd” isə bəllidir: ən azından vaxt udacaq. Amma görünən budur ki, rəsmi İrəvanın ziyanı qazancından daha artıq olacaq.

Moskvanın cavabı necə olacaq?

Təbii ki, rəsmi Moskva Ermənistanın bu açıq mövqe dəyişikliyinə susqun qalmaq niyyətində deyil. Bu mənada, “Qərbə doğru” yol almış Paşinyanın büdrəməsi an məsələsidir. Soçi görüşündən sonra baş verən bəzi məsələlər bunu təsdiqləyir. Qeyd edək ki, bir sıra məsələlərin Brüsseldə reallaşacağını düşünən Ermənistan bu yolla Qərbin prosesdəki fəaliyyəti haqda təbliğat aparmağı planlaşdırırdı. Amma elə erməni ekspertlər Brüssel danışıqlarının Paşinyanın bu istiqamətdə niyyətini gerçəkləşdirmək üçün əlverişli vasitə olacağını düşünmürlər. Analitiklərin qənaətinə əsasən, hadisələrin gedişi yaxın zamanda Rusiyanın daha kəskin addımlar atacağını deməyə də əsas verir...

Paylaş:

Baxılıb: 891 dəfə