Brüsseldə qeyri-formal görüş - Paris nəyi nümayiş etdirməyə çalışır?

Bakı:

17 °C

94 %

3 m/s

Əlaqə

AZ RU EN

Ana səhifə / Siyasət / Brüsseldə qeyri-formal görüş - Paris nəyi nümayiş etdirməyə çalışır?

Brüsseldə qeyri-formal görüş - Paris nəyi nümayiş etdirməyə çalışır?

17.12.2021 [10:04]

Emmanuel Makron “ölü doğulmuş körpə”ni dirildə biləcəkmi?

Pərviz Sadayoğlu

Dekabrın 15-də Fransa Respublikasının prezidenti Emmanuel Makronun təşəbbüsü ilə Brüsseldə Azərbaycan Respublikasının Prezidenti İlham Əliyev ilə Ermənistan Respublikasının baş naziri Nikol Paşinyan arasında qeyri-formal görüş keçirilib. Ekspertlər vaxtilə münaqişənin tənzimlənməsində vasitəçi missiyası daşımış ATƏT-in Minsk qrupunun həmsədrlərindən olan Fransanın bu kimi cəhdlərinin ən yaxşı halda “daldan atılan daş” effekti verdiyini qeyd edirlər. Çünki Prezident İlham Əliyev Brüsseldə Avropa İttifaqının Şərq Tərəfdaşlığı Sammitində çıxışı zamanı 28 il ərzində aparılan danışıqlarda hər hansı bir nəticənin hasil olmadığını diqqətə çatdırdı və Azərbaycanın ATƏT-in Minsk qrupundan yeni geosiyasi reallığa uyğun cavab gözlədiyini dedi: “Bu xüsusda Azərbaycan tərəfi hesab edir ki, Ermənistanla Azərbaycan arasında sülh sazişinin hazırlanması, sərhədlərin delimitasiyası, insanlar arasında təmasların yaradılması, etimad quruculuğu tədbirləri və digər məsələlərdə Minsk qrupu tərəfindən kömək göstərilə bilər”.

Məsələ ilə bağlı fikirlərini bölüşən Milli Məclisin Beynəlxalq münasibətlər və parlamentlərarası əlaqələr komitəsinin üzvü Ramil Həsən Prezident İlham Əliyevin Brüssel səfəri çərçivəsində mühüm görüşlər keçirdiyini diqqətə çatdırıb. Emmanuel Makronun təşəbbüsü ilə keçirilən qeyri-formal üçtərəfli görüşə gəldikdə isə, millət vəkili vurğulayıb ki, Fransa ATƏT-in Minsk qrupunun həmsədrlərindən biri olsa da, hər zaman qərəzli mövqe sərgiləyib və birtərəfli siyasət həyata keçirib: “Rəsmi Paris ATƏT-in Minsk qrupunun fəaliyyətdə olan üç həmsədrindən biri olsa da, mövqeyi qərəzli sayıla bilər. O baxımdan ki, Fransa hər zaman açıq şəkildə Ermənistanı dəstəkləyib, işğalçıya dayaq olmağa çalışıb. Hətta müharibə və postmüharibə dövründə də bu qərəzli mövqeyindən əl çəkməyib. Bununla da beynəlxalq hüququn normalarını pozub. Artıq yeni siyasi reallıqlar formalaşıb və münaqişə yoxdur. Bu baxımdan, Makronun sərgilədiyi mövqe ölü doğulmuş körpənin yenidən dirildilməsi cəhdinə oxşayır. Bu isə mümkün deyil. Artıq Ermənistan ilə Azərbaycan arasında dialoq başlanıb. Bu prosesin uğurlu inkişafı üçün həm Rusiya, həm də Avropa İttifaqı öz köməyini təqdim edir. Cənab İlham Əliyevin Avropa İttifaqının Şərq Tərəfdaşlığı Sammitindəki çıxışı, Ermənistanın baş nazirinin açıqlamaları da yaxın gələcəkdə sərhədlərin delimitasiya və demarkasiyası ilə bağlı əsaslı addımların atıla biləcəyinə ümidlər yaradır. Bu baxımdan, Fransa prezidenti artıq prosesin müəyyən sürət qazandığı və geriyə dönüşün olmadığını dərk edir. Makronun hər hansı bir cəhdinin hansısa formada işə yarayacağı inandırıcı deyil”.

R.Həsən bildirib ki, ATƏT-in Minsk qrupunun artıq lüzumsuz olması Avropa İttifaqı tərəfindən də dolayısı ilə təsdiqlənir. Bu qurumun adının müzakirələrdə çəkilməməsi, hətta Avropa İttifaqı Şurasının Prezidentinin bəyanatında da rast gəlinməməsi bu reallığı təsdiqləyir. “Fransa anlayır ki, Minsk qrupunun tərkibində onlar da prosesdən kənarda qalıblar. Makronun addımları isə sadəcə taktiki gedişdir. Rəsmi Paris “qatarın içində olduğunu” göstərməyə çalışır. Amma mənzərə fərqlidir”, - deyən millət vəkili əlavə edib ki, Azərbaycanın müstəqil, milli maraqlara xidmət edən xarici siyasət kursu mövcuddur. Azərbaycan suverenliyini tanıyan, qəbul edən və əməkdaşlıqda maraqlı olan bütün ölkələrlə əlaqələrin inkişafında maraqlıdır. Bu baxımdan, Fransa ilə də ikitərəfli əlaqələrimiz normaldır və gələcəkdə daha da inkişaf edə bilər. Amma hər bir dialoq konstruktiv əməkdaşlığa xidmət göstərməlidir.

Paylaş:

Baxılıb: 791 dəfə