Mübariz Qurbanlı: Bizim üçün Azərbaycan xalqının iradəsi əsasdır

Bakı:

13 °C

71 %

3 m/s

Əlaqə

AZ RU EN

Ana səhifə / Siyasət / Mübariz Qurbanlı: Bizim üçün Azərbaycan xalqının iradəsi əsasdır

Mübariz Qurbanlı: Bizim üçün Azərbaycan xalqının iradəsi əsasdır

28.01.2011 [10:02]

“ATƏT-in Demokratik Təsisatlar və İnsan Haqları Bürosunun Azərbaycanda keçirilmiş parlament seçkiləri ilə bağlı yekun hesabatı obyektivliyi əks etdirmir. 2010-cu ilin noyabr ayında Azərbaycanda azad və demokratik parlament seçkiləri keçirilib”. Bu fikirləri yap.org.az saytına açıqlamasında YAP İcra katibinin müavini, Milli Məclisin deputatı Mübariz Qurbanlı deyib. M.Qurbanlı bildirib ki, parlament seçkilərini 1000 nəfərdən çox beynəlxalq müşahidəçi izləyib. Onun sözlərinə görə, ATƏT DTİB-nin müşahidəçiləri ilə yanaşı qurumun Parlament Assambleyasının, Avropa Şurasının, Avropa İttifaqının və digər beynəlxalq təşkilatların ilkin rəylərində seçki prosesi və səsvermə müsbət qiymətləndirilib.
“İlkin hesabatlar zamanı KİV-lərə verdikləri açıqlamalarda ATƏT-in Demokratik Təsisatlar və İnsan Haqları Bürosunun müşahidəçiləri birmənalı olaraq seçki haqqında müsbət fikirdə olduqlarını vurğulamışdılar. Yəni qurumun müşahidəçiləri seçki ilə bağlı fərdi açıqlamalarında yüksək fikirdə olduqlarını deyiblər. Lakin indi görürük ki, təşkilatın yekun hesabatında ilkin rəylərə uyğun olmayan fikirlər özünə yer tapmaqdadır” - deyə YAP İcra katibinin müavini vurğulayıb.
Bu cür qərəzli hesabatın səbəblərinin olduğunu deyən M.Qurbanlının fikrincə, başlıca səbəb müşahidə missiyasının üzvlərinin öz müşahidələri haqda fikirlərini yekun sənəddə sərbəst şəkildə ifadə edə bilməməsidir. Bu da onu göstərir ki, ATƏT-də bəzi dairələr ayrı-ayrı ölkələrdə keçirilən seçkilər və onun nəticələrindən müəyyən vasitə kimi istifadə etməyə çalışır.
“Bu vəziyyət birinci dəfə baş vermir. Əvvəllər də seçkilər haqqında ilkin rəylə yekun hesabat arasında belə fərqlər olub və bu dəfə də bunu görürük. Bütün bunlar ATƏT DTİB-nin hesabatının obyektiv olmadığını göstərir. Azərbaycanda seçkilər azad və demokratik şəkildə keçirilib. Bu seçkilər Azərbaycan xalqının siyasi iradəsini ifadə edib. Seçkilərin şəffaf keçirilməsini Azərbaycan iqtidarı təmin edib. Seçki ilə bağlı obyektiv hesabatın olmaması, seçki və onun nəticələrindən müəyyən məqsədlər üçün istifadənin formasıdır. Dağlıq Qarabağ məsələsində olduğu kimi seçki məsələsində də ikili standartlar mövcuddur. Bizim üçün Azərbaycan xalqının iradəsi əsasdır. Xalqımız isə öz iradəsini nümayiş etdirib. Bundan sonra da ölkəmizdə keçiriləcək seçkiləri izləmək istəyən bütün müşahidəçilər üçün qapılar açıq olacaq. Lakin istərdik ki, seçkilərlə bağlı rəylər obyektiv olsun” - deyə YAP İcra katibinin müavini vurğulayıb.

Paylaş:

Baxılıb: 1024 dəfə