Bəzi dövlətlər və beynəlxalq təşkilatlar Azərbaycana qarşı qərəzli mövqe nümayiş etdirir

Bakı:

27 °C

61 %

8 m/s

Əlaqə

AZ RU EN

Ana səhifə / Siyasət / Bəzi dövlətlər və beynəlxalq təşkilatlar Azərbaycana qarşı qərəzli mövqe nümayiş etdirir

Bəzi dövlətlər və beynəlxalq təşkilatlar Azərbaycana qarşı qərəzli mövqe nümayiş etdirir

13.04.2011 [13:47]

Siyavuş Novruzov: Bu gün onları razı salmayan Azərbaycanda olan inkişafdır, ictimai-iqtisadi sabitlikdir
“İstər ATƏT, istər onun Bakı ofisi öz funksiyalarını yerinə yetirməlidir. Müxalifətin 2 apreldəki qanunsuz aksiyasında ATƏT-in çoxsaylı nümayəndələri də oradaydılar. O nümayəndələr niyə Azərbaycanın işğal olunmuş ərazisində deyil, nə üçün Azərbaycanın ermənilər tərəfindən qətlə yetirilmiş 9 yaşlı uşağının valideynlərinə başsağlığı vermirlər? Onların funksiyası oradadır, burada deyil”. Bu fikirləri jurnalistlərə açıqlamasında Yeni Azərbaycan Partiyası İcra katibinin müavini, millət vəkili Siyavuş Novruzov deyib.
S.Novruzov qeyd edib ki, Azərbaycan insan hüquqlarını da, insan azadlıqlarını da və insanlarla davranışını da gözəl bilir. Onun sözlərinə görə, ölkəmiz öz üzərinə götürdüyü öhdəlikləri hər zaman yerinə yetirib və bu gün də yetirir. “Qalan məsələləri onlar bizim qarşımıza şərt kimi qoya bilməzlər, çünki öz simalarını bütün dünyada itiriblər. ABŞ-da oğul Buşun vaxtında prezident seçkiləri keçiriləndə- Florida ştatında səsvermənin nəticələrini izləmək üçün ATƏT-in nümayəndələrini heç ora yaxın buraxmadılar, ancaq onlar səslərini belə çıxara bilmədilər. Rusiyada son seçkilər zamanı ATƏT-i yaxın buraxmadılar, qovdular. ATƏT istəyirdi ki, ora heç olmasa 51 nəfər nümayəndə göndərsin, amma Rusiya onları ölkəsinə buraxmadı və ATƏT-in də səsi çıxmadı. Bunun əvəzində ATƏT son parlament seçkilərini izləmək üçün Azərbaycana 500-dən artıq nümayəndə göndərdi. Demək istəyirəm ki, bunların mövqeyi çürümüş, ölmüş bir mövqedir, bu qurum qeyri-hökumət təşkilatı səviyyəsinə enmiş bir təşkilatdır və onun verdiyi bəyanatların heç bir əhəmiyyəti yoxdur”-deyə, S.Novruzov bildirib.
YAP İcra katibinin müavini hesab edir ki, ATƏT-in Minsk qrupunun vasitəçiliyindən imtina edilməlidir. Bunun zamanının çatdığını deyən S.Novruzovun sözlərinə görə, həmsədrlər sadəcə bölgəyə gəlib-getməklə məşğuldurlar, münaqişənin həlli ilə bağlı isə heç bir nəticə yoxdur.
YAP İcra katibinin müavini deyib ki, nə Qərbin, nə də ATƏT-in dəyəri qalmayıb: “Hansı ki, demokratiya, insan hüquqları ilə bağlı dəyərlər var, onlar ABŞ tərəfindən tamamilə itirilib. Onların nə demokratiyadan, nə də insan hüquqlarından danışmaq haqqı var. Bir müddət öncə Əfqanıstanda keçirilən seçkiləri elə həmin ATƏT, ABŞ yüksək qiymətləndirdi və bəyan etdi ki, burada seçkilər çox demokratik olub. Axı, Əfqanıstanda demokratiya var? Orada demokratik seçkilər keçirilib? İnsanlar aullarda, hərəsi bir dərədə yaşayırlar. İndi onlar gəlib demokratiyanın göstəricisi oldular? Orada parlament üzvlərinin 90 faizinin heç orta təhsili yoxdur. Yaxud da İraqda baş verənləri götürək. Azlıqda olan xalqın nümayəndəsi gəlib prezident “seçildi”. Adını da qoydular ki, bu, demokratik seçkidir. Bu, demokratik seçki və demokratiya demək deyil, bu, oradakı xalqı qırdırmaqdan ötrü oynanılan oyunlardır. Bunu da artıq bizim cəmiyyət başa düşür. Bunu pərdələmək olmaz. İnsanlar bunu dərk edir, görür və başa düşür. Ona görə bizimlə heç bir dövlətin, təşkilatın belə bir oyun oynaması mümkün deyil. Azərbaycanda azad, ədalətli, demokratik seçkilər keçirilib və burada hər bir sahə üzrə inkişaf gedir. Bu gün onları razı salmayan Azərbaycanda olan inkişafdır, ictimai-iqtisadi sabitlikdir”.
Nardar BAYRAMLI

Paylaş:

Baxılıb: 1059 dəfə