Qaçqın və məcburi köçkün gənclər Müsavat partiyasının qərargahının qarşısında etiraz aksiyası keçirib

Bakı:

27 °C

55 %

10 m/s

AZ RU EN

Ana səhifə / Siyasət / Qaçqın və məcburi köçkün gənclər Müsavat partiyasının qərargahının qarşısında etiraz aksiyası keçirib

Qaçqın və məcburi köçkün gənclər Müsavat partiyasının qərargahının qarşısında etiraz aksiyası keçirib

15.04.2011 [09:31]

Etiraz aksiyası hüquq-mühafizə orqanlarının nümayəndələrinin müdaxiləsindən sonra dayandırılıb, bir neçə aksiya iştirakçısı isə polis tərəfindən saxlanılıb
Son dövrlər Azərbaycanın əldə etdiyi böyük nailiyyətlərdən narahatçılıq hissi keçirən bir sıra xarici qüvvələrin sifarişlərini icra edən radikal müxalifət partiyaları ölkə daxilində təxribat törətməyə cəhd göstərirlər. Bu qüvvələr siyasi arenadakı mövcudluqlarını qorumaq, maddi və mənəvi dəstək almaq üçün xaricdəki bəzi antiazərbaycançı dairələr ilə işbirliyini gücləndirirlər. Onlar xaricdən aldıqları təlimatları yerinə yetirmək üçün Azərbaycanda təxribatlar törətməyə, bu yolla da ölkəmizdəki sabitliyə, inkişaf prosesinə zərər vurmağa çalışırlar. Bu cəhətdən Müsavat və AXCP kimi radikal partiyalar xüsusi “fəallıq” göstərirlər.
Cəmiyyətin sağlam qüvvələri, o cümlədən, gənclər bu partiyaların hərəkətlərinə etiraz edirlər. Belə aksiyaların biri də dünən baş tutub. Qaçqın və məcburi köçkün olan bir qrup gənc Müsavat partiyasının qərargahının qarşısında etiraz aksiyası keçirib. Aksiya son dövrlər radikal müxalifətin ölkədə qanunsuz mitinq cəhdlərinə, ictimai-siyasi sabitliyi pozmağa yönəlmiş fəaliyyətlərinə etiraz əlaməti olaraq təşkil olunub.
Etiraz aksiyasında təxminən 70-dən artıq gənc iştirak edib. Gənclər “Xarici qüvvələrin arxasında yox, xalqın arxasında dayanın!”, “İsa Qəmbər, Qarabağa gedən yol mitinqlərdən yox, sabitlikdən keçir!”, “Yaşasın, müstəqil Azərbaycan!” “AXCP və Müsavat, sizin hərəkətləriniz düşmənlərin mənafeyinə xidmət edir “ və s. şüarlar səsləndiriblər.
Etiraz edənlər məhz AXC-Müsavat cütlüyünün hakimiyyəti dövründə torpaqlarımızın böyük hissəsinin işğal olunduğunu xatırladaraq, həmin qüvvələrin hakimiyyət iddiasında olmağa heç bir mənəvi haqlarının çatmadığını vurğulayıblar.
Qeyd olunub ki, Azərbaycan gəncliyi artıq öz seçimini edib və bu seçim ümummilli lider Heydər Əliyev siyasətini davam etdirən Prezident İlham Əliyevdir. Onlar bildiriblər ki, Azərbaycan gəncliyi ictimai-siyasi sabitliyin tərəfdarıdır. “Biz inanırıq ki, Prezidentimizin qətiyyətli siyasəti nəticəsində torpaqlarımız işğaldan azad olunacaq” - deyə, aksiya iştirakçıları vurğulayıblar.
çıxış edən gənclər Prezident İlham Əliyevin rəhbərliyi ilə Azərbaycanın böyük inkişaf yolu keçdiyini vurğulayaraq, hər bir gəncin bu inkişaf yolunu dəstəklədiyini söyləyiblər. Qeyd olunub ki, Prezident İlham Əliyevin həyata keçirdiyi düşünülmüş siyasət nəticəsində Azərbaycan son illər dinamik inkişaf edən, problemlərinin böyük əksəriyyətini qısa müddət ərzində həll etmiş ölkəyə çevrilib.
Həmçinin, bir sıra radikal müxalifət partiyalarının liderlərinin, o cümlədən, Müsavat partiyasının başqanı İsa Qəmbərin xaricdən gələn təlimatları yerinə yetirmək üçün müxtəlif təxribatlar törətdiklərini, bununla da ölkəmizdə mövcud olan sabitliyə, vətəndaş təhlükəsizliyinə kölgə salmağa çalışdıqlarını qeyd ediblər: “Bu gün ölkəmizdə xaos yaratmağa, sabitliyi pozmağa çalışan Müsavat, AXCP kimi radikal siyasi təşkilatların fəaliyyətlərinin mahiyyəti və məqsədi Azərbaycan xalqına bəllidir və onların nə istədiklərinin hamı fərqindədir. Bu təxribatçı qüvvələr yalnız bir məqsəd güdür: ölkəmizdə xaos yaratmaq, cəmiyyətin normal ritmini pozmaq və bu yolla Azərbaycanın sürətli inkişafına mane olmaq. Ona görə də, biz gənclər bu insanları ölkəmizin parlaq gələcəyinə, inkişafına qarşı çıxan, dövlətimizi sevməyən antimilli qüvvələr hesab edir, Müsavat və bu kimi digər radikal qüvvələrin fəaliyyətini qeyri-qanuni sayırıq”.
Həmçinin, gənclər radikal müxalifət təmsilçilərini dövlətçiliyimizin əleyhinə fəaliyyətdən çəkinməyə, xalqımızı isə belə təxribatçı qüvvələrin əməllərinə qarşı ayıq-sayıq olmağa çağırıblar.
Daha sonra etiraz aksiyası iştirakçılarının bəyanatı oxunub. Radikal müxalifətin pozuculuq fəaliyyətinin pislənildiyi bəyanatın sonunda vurğulanır: “Azərbaycan xalqı ölkədəki inkişafdan, dönməz xarakter almış ictimai-siyasi sabitlikdən, dövlətin öz vətəndaşına göstərdiyi diqqətdən məmnundur. Müxalifət qüvvələrinin mitinq çağırışları obyektiv reallıqdan qaynaqlanmadığı üçün insanları çaşdıra, aydın fikirli fəal vətəndaşları tutduqları dövlətçilik mövqeyindən yayındıra bilməz. Ona görə də, biz, öz yurdlarından məcburən köçkün düşmüş insanlar hesab edirik ki, radikal müxalifətin qeyri-qanuni mitinq keçirmək cəhdləri yolverilməzdir və bunların qarşısı qətiyyətlə alınacaq”.
Bəyanatın surəti Müsavat partiyasının nümayəndəsinə təqdim edilib.
Qeyd edək ki, etiraz aksiyası hüquq-mühafizə orqanlarının nümayəndələrinin müdaxiləsindən sonra dayandırılıb. Bir neçə aksiya iştirakçısı isə polis tərəfindən saxlanılıb.
Nardar BAYRAMLI

Paylaş:

Baxılıb: 1046 dəfə