YAP Ayaz Mütəllibovun ölkəyə gəlməsinə icazə verilməsini humanist addım kimi qiymətləndirib

Bakı:

11 °C

82 %

7 m/s

Əlaqə

AZ RU EN

Ana səhifə / Siyasət / YAP Ayaz Mütəllibovun ölkəyə gəlməsinə icazə verilməsini humanist addım kimi qiymətləndirib

YAP Ayaz Mütəllibovun ölkəyə gəlməsinə icazə verilməsini humanist addım kimi qiymətləndirib

11.08.2011 [02:28]

“Ayaz Mütəllibova ölkəsinə gəlmək üçün icazə verilməsi bir daha onu göstərir ki, Prezident İlham Əliyev Azərbaycan xalqının bütün təbəqəsinə, kimliyindən asılı olmayaraq, hər bir insana humanist prinsiplərlə yanaşan bir insandır”, - bunu dünən “Trend”ə açıqlamasında YAP-ın İcra katibinin müavini, millət vəkili Siyavuş Novruzov bildirib.
O deyib ki, dövlət başçısı tək indi yox, dəfələrlə bu cür humanist addımlar atıb: “Cənab İlham Əliyev hələ Prezident seçilərkən “mən bütün azərbaycanlıların Prezidentiyəm” - deyə bəyan etmişdi. Tək indi yox, dəfələrlə bu cür humanist addımlar atılıb. Müəyyən adamlar dünyasını dəyişən yaxınlarının dəfn mərasimində iştirak etmək üçün həbsdən azad olunublar. İndiki vaxtda belə bir humanist addımın atılması, Ayaz Mütəllibovun toxunulmazlığının təmin olunması təqdirəlayiq haldır. Baxmayaraq ki, vaxtilə ümummilli liderimiz Heydər Əliyevə qarşı çoxsaylı məhdudiyyətlər qoyulmuşdu. ümummilli liderimizə ümumiyyətlə, Bakı şəhərində yaşamağa imkan vermədilər. Təhdidlərlə, təqiblərlə, hədələrlə Onu Naxçıvan Muxtar Respublikasına getməyə vadar etdilər”.
YAP İcra katibinin müavini vaxtilə Ayaz Mütəllibova düşmən kəsilən müxalifət liderlərinin ona yaxınlığına da şərh verib: “Azərbaycanda hər bir insana yaxınının dünyasını dəyişməsi ilə əlaqədar başsağlığı verilir. Amma mənim üçün də bir məqam qaranlıq qaldı. Həmin müxalifət liderləri hesab edirlər ki, bu xalqın yaddaşından hər şey silinib. özlərini arsız vəziyyətə qoyublar. Halbuki, bu hadisələrin birbaşa təşkilatçıları onlar özləridir. Vaxtilə Azadlıq meydanında, Prezident Aparatının qarşısında “dar ağacı quran” həmin Əli Kərimli, İsa Qəmbər və digərləri idi. Bu şəxslər, həmçinin, Azərbaycanda ilk dəfə hakimiyyətin silah yolu ilə ələ keçirilməsi ənənəsini yaradıblar. Prezident Aparatına, Ali Sovetə silahlı basqın ediblər. Onlar həmin insanlardır ki, hakimiyyətə gəlmək üçün hər şeyə hazır idilər. Ayaz Mütəllibova qarşı cinayət işini məhz o vaxtkı iqtidar qaldırıb”.
YAP rəsmisi İsa Qəmbərin, Əli Kərimlinin indiki çıxışlarını riyakarlıq adlandırıb: “Onlar öz hərəkətlərindən peşman olduqlarını bildirməkdənsə, etdiklərini bugünkü iqtidarın üstünə atırlar. Bu, ləyaqətsizlikdən başqa bir şey deyil. Onların etdikləri hərəkətlərin hamısı Azərbaycan xalqının gözü qarşısındadır, Azərbaycan xalqının yaddaşındadır. Ayaz Mütəllibova qarşı cinayət işi 1992-ci ilin may ayında qaldırılıb. Həmin dövrdə AXCP və Müsavat Partiyası hakimiyyətdə idi. Cinayət işi İsa Qəmbərin prezident səlahiyyətlərini icra etdiyi vaxt qaldırılıb”.
YAP funksioneri İsa Qəmbərin humanizmdən danışmağa haqqı olmadığını deyib: “İsa Qəmbər prezident səlahiyyətlərini icra etdiyi dövrdə barələrində ölüm hökmü çıxarılmış insanları bir ay ərzində güllələtdirdi. Halbuki ümummilli lider Heydər Əliyevin hakimiyyətə gəldiyi gündən sonra bir nəfər barəsində də belə ölüm hökmü çıxarılmayıb və sonradan hətta bu cəza növü ləğv edilib. Ancaq İsa Qəmbər iki ay gözləmədi. İki aydan sonra Əbülfəz Elçibəy prezident seçiləcəkdi və bu addımı atmaq prezidentin səlahiyyətinə aid olan məsələlərdir, prezidentin səlahiyyətlərini icra edənə yox. Düzdür, hüquqi baxımdan onun ixtiyarı var idi, ancaq mənəvi baxımdan insanın belə bir addım atması yersizdir. Yəni bu cür hərəkətləri etmiş insanların humanizmdən, insan haqlarından danışmağa heç bir mənəvi haqqı yoxdur”.

Paylaş:

Baxılıb: 970 dəfə