Fransa Konstitusiya Şurasının qərarı bu ölkənin demokratik ənənələrə, söz, fikir və özünüifadə azadlığına sadiq qalmasının göstəricisidir

Bakı:

10 °C

93 %

3 m/s

AZ RU EN

Ana səhifə / Siyasət / Fransa Konstitusiya Şurasının qərarı bu ölkənin demokratik ənənələrə, söz, fikir və özünüifadə azadlığına sadiq qalmasının göstəricisidir

Fransa Konstitusiya Şurasının qərarı bu ölkənin demokratik ənənələrə, söz, fikir və özünüifadə azadlığına sadiq qalmasının göstəricisidir

01.03.2012 [01:16]

Azərbaycanın rəsmi səviyyədə sərgilədiyi prinsipial mövqe, Azərbaycan-Fransa parlamentlərarası əlaqələr üzrə işçi qrupunun ardıcıl və sistemli fəaliyyəti Fransa Konstitusiya Şurasının ədalətli qərar qəbul etməsini şərtləndirən fundamental faktorlar qismində çıxış etdi
Xəbər verildiyi kimi, Fransa Konstitusiya Şurası fevralın 28-də Milli Assambleyanın ötən il dekabrın 22-də qəbul etdiyi və yanvarın 23-də Senat tərəfindən təsdiqini tapan qondarma “erməni soyqırımı”nı inkar edənlərin cinayət məsuliyyətinə cəlb olunması barədə qanunu müzakirə edib və onun Fransa Konstitusiyasına zidd, söz və fikir azadlığına qarşı yönəlmiş qanun olduğunu nəzərə alaraq ləğv olunması barədə qərar qəbul edib.
Yelisey sarayının mətbuat xidməti Fransa prezidenti Nikola Sarkozinin Konstitusiya Şurasının qərarından təəssüf hissi keçirdiyini bəyan edib, eyni zamanda, Konstitusiya Şurasının “soyqırımı”na dair qanunun ləğvinə etiraz əlaməti olaraq yeni bir qanunun mətninin hazırlanması barədə göstəriş verdiyini bildirib.
Qeyd etmək lazımdır ki, Fransa Konstitusiya Şurasının bu qərarı bəhs olunan ölkənin demokratik ənənələrə, söz, fikir və özünüifadə azadlığına sadiq qalmasına dəlalət etdi. çünki belə bir qanunun qəbul və təsdiq olunması özlüyündə demokratik ənənələrə və prosedurlara ciddi surətdə zidd olmaqla yanaşı, həm də Fransanın demokratik dövlət imicinə birbaşa zərbə olacaqdı. Hansısa korporativ maraqlara müvafiq surətdə atılan bu addım, eyni zamanda, Fransa üçün “bumeranq” effekti verə biləcək presedent ola bilərdi.
Beləliklə, bütün bunları nəzərə alan Fransa Konstitusiya Şurasının bu qərarı olduqca rasional və praqmatik səciyyə daşıyır. Bu, Fransanın demokratik ənənələrə sadiq qaldığını göstərir.
Əlbəttə ki, Fransa Konstitusiya Şurasının belə bir ədalətli, demokratik qərar çıxarmasını şərtləndirən digər mühüm amillər də mövcuddur. İlk növbədə, qeyd edilməlidir ki, Azərbaycanın aktiv, prinsipial və rasional mövqeyi Fransa Konstitusiya Şurasının ədalətli qərar qəbul etməsini şərtləndirən fundamental amil kimi dəyərləndirilməlidir. Təbii ki, burada bir neçə məqama xüsusilə toxunmaq lazımdır.
Birincisi, məlum “Qanunla tanınmış soyqırımıların mövcudluğunun təkzib edilməsinə görə cəza nəzərdə tutan” qanun layihəsinin qəbul edilməsi məsələsi gündəmə gələr-gəlməz Azərbaycan rəsmi və ictimai təşkilatlar səviyyəsində öz haqlı etirazını bildirdi. Fransa Senatının aşağı palatasının məlum qərarından sonra Azərbaycan rəsmiləri, Milli Məclisi, Xarici İşlər Nazirliyi, Qafqaz Müsəlmanları İdarəsi, hakim Yeni Azərbaycan Partiyası və partiyanın Gənclər Birliyi, həmçinin millət vəkilləri, ziyalılar, KİV, ictimai təşkilatlar və digər siyasi partiyalar Fransa Senatının qərarını kəskin şəkildə pislədilər. Eyni zamanda, Azərbaycan diaspor təşkilatları da Fransa Senatına etirazlarını bildirdilər. Bakıda Fransa səfirliyi qarşısında etiraz aksiyaları keçirildi, hətta Sankt-Peterburq şəhərində Azərbaycan diasporunun fəalları Fransa konsulluğu qarşısında aksiya təşkil etdilər. Əlbəttə ki, bu, Azərbaycanın prinsipiallığının və məsələyə nə dərəcədə həssas yanaşmağının göstəricisidir. Məhz bu cür prinsipiallıq Fransa Konstitusiya Şurasının ədalətli qərar qəbul etməsini şərtləndirən əhəmiyyətli amil oldu.
Digər tərəfdən, Azərbaycan-Fransa parlamentlərarası əlaqələr üzrə işçi qrupunun ardıcıl və sistemli fəaliyyəti də birmənalı şəkildə fundamental amil kimi dəyərləndirilməlidir. Belə ki, sözügedən işçi qrupunun fəaliyyəti, sıx təmasları Fransa Konstitusiya Şurasının ədalətli, demokratik qərar çıxarmasına həlledici təsir göstərdi. Eyni zamanda, Fransa-Qafqaz dostluq qrupunun sədr müavini, Fransa-Azərbaycan işçi qrupunun rəhbəri senator xanım Natali Qulenin başçılıq etdiyi senatorlardan ibarət nümayəndə heyətinin təmasları, hadisəylə bağlı çıxışları və mövqeyi Fransa Konstitusiya Şurasının qərarına təsir göstərən mühüm faktor kimi çıxış etdi.
Bir sözlə, görünən odur ki, Azərbaycan tərəfinin proseslərin ilk günündən məsələyə çevik və qətiyyətli reaksiyası öz bəhrəsini verdi. Daha doğrusu Azərbaycanın rəsmi səviyyədə sərgilədiyi prinsipial mövqeyi, Azərbaycan Fransa parlamentlərarası əlaqələr üzrə işçi qrupunun ardıcıl və sistemli fəaliyyəti Fransa Konstitusiya Şurasının ədalətli qərar qəbul etməsini şərtləndirən fundamental faktorlar qismində çıxış etdi.
NURLAN QƏLƏNDƏRLİ

Paylaş:

Baxılıb: 962 dəfə