Casusun kimliyi bəlli oldu

Bakı:

11 °C

82 %

4 m/s

Əlaqə

AZ RU EN

Ana səhifə / Siyasət / Casusun kimliyi bəlli oldu

Casusun kimliyi bəlli oldu

10.01.2024 [11:05]

Martin Ryan dekabrın 4-də Bakıda həbs edilib...

Ermənipərəst maraqların əsirinə çevrilmiş və beləliklə özünün dövlət imicini ayaqlar altına atmış Fransanın qurduğu oyunlar ard-arda ifşa edilməkdədir. Ötən il dəfələrlə və müxtəlif platformalarda Azərbaycana qarşı formalaşdırmağa çalışdığı təzyiq kampaniyaları puç olan Parisin “sonuncu kartı” da “əlindən çıxdı”. Siyasət meydançalarında, hətta özünün patronajlığı altında olan platformalarda ağır məğlubiyyət yaşayan Fransanın casus şəbəkəsinin ifşası, planlarının boşa çıxması tam fiaskodan xəbər verirdi.

İfşa edilən casus şəbəkəsi və Fransanın “davranışı”...

Xatırladaq ki, ötən ilin son ayında Ukrayna, Moldova, Gürcüstan, Azərbaycan, Şərqi Avropa, Yaxın Şərq və Mərkəzi Asiyanın bir sıra ölkələrində müxtəlif əməliyyatlara cəlb edilmiş Fransa xüsusi xidmət orqanlarının geniş agentura şəbəkəsinin Azərbaycanda ifşa olunması ilə bağlı məlumat yayıldı. Məlumata görə, uzun illər Fransa casus şəbəkəsinin ştatdankənar əməkdaşı olmuş Fransa vətəndaşlarından biri könüllü olaraq Azərbaycan hüquq-mühafizə orqanları ilə əməkdaşlığa təşəbbüs göstərmişdi. Müəyyən müddət ərzində bir qismi indi və ya əvvəllər Azərbaycanda xidmət etmiş, bəziləri müxtəlif ölkələrdə və nüfuzlu beynəlxalq təşkilatlarda örtülü işi davam etdirən onlarla Fransa xəfiyyəsi aşkarlandı. Bununla yanaşı, Azərbaycan xüsusi xidmət orqanlarına Fransa rezidenturasının Cənubi Qafqaz, Yaxın Şərq, Ukrayna və Moldovadakı fəaliyyətinə dair dəlil və sənədlər təqdim edildi. Bir neçə gün öncə isə Fransanın Azərbaycandakı səfiri Ann Buayon Xarici İşlər Nazirliyinə (XİN) çağırılıb. Nazirliyin Mətbuat xidmətinin məlumatına görə, Fransa səfirliyinin iki əməkdaşının diplomatik statuslarına uyğun olmayan və “Diplomatik əlaqələr haqqında” 1961-ci il Vyana Konvensiyası ilə ziddiyyət təşkil edən fəaliyyətinə görə Azərbaycan hökuməti tərəfindən “persona-non-grata” (arzuolunmaz şəxs) elan olunduğu Fransa səfirinin diqqətinə çatdırılıb, həmin şəxslərin 48 saat ərzində Azərbaycan ərazisini tərk etməsi tələb edilib və XİN-in müvafiq notası Fransa səfirinə təqdim edildi.

Azərbaycanın bu haqlı davranışının qarşılığında isə yenə də özünün siyasi cılızlığından əl çəkməyən, sanki bunun “qarşılığını verməyə tələsən” Fransa dünya ictimaiyyətinin gözü önündə qeyri-demokratik addımı ilə seçildi - Azərbaycanın Parisdəki səfirliyinin iki əməkdaşı Bakının fransalı diplomatlara qarşı oxşar hərəkətinə cavab olaraq “persona-non-grata” (arzuolunmaz şəxs) elan edildi.

“Merkorama MMC”-nin baş direktoru...

KİV-də yayılan xəbərlərə görə, Fransa Xarici Kəşfiyyat Baş İdarəsinin Azərbaycanda apardığı casusluq fəaliyyətinə görə həbs olunmuş şəxslərdən birinin şəxsiyyəti ortaya çıxıb - bu, Martin Ryandır. Məsələ ilə bağlı erməni əsilli fransız jurnalist Leo Nicolian 07 yanvar 2024-cü ildə “X” (keçmiş Tvitter) sosial platformasındakı rəsmi səhifəsində məlumat verib. O qeyd edib ki, “Martin Ryan dekabrın 4-də Bakıda həbs edilib. “Merkorama MMC”-nin baş direktoru Martin Ryan casusluqda ittiham olunur. Ryan, onu məxfi əməkdaşlığa məcbur edən, sonradan Bakıdan qovulmuş Fransanın 2 DGSE (Xarici Kəşfiyyat Baş İdarəsi) agenti tərəfindən istifadə (manipulyasiya) edilib”.

Tələsik qərar...

Beləliklə, casuslardan birinin Fransa vətəndaşı Martin Ryan olması və ötən il dekabrın 4-də Fransa kəşfiyyatının xeyrinə casusluğa görə həbs olunmaqla, hazırda Bakıda həbsdə olduğu məlum olub.

Qeyd edək ki, Qərb mətbuatında yayılmış məlumatlara əsasən, Azərbaycan Respublikası Dövlət Təhlükəsizliyi Xidmətinin 2023-cü il dekabr ayının əvvəlində həyata keçirdiyi araşdırmalar və həbslər nəticəsində Ukrayna, Moldova, Gürcüstan, Azərbaycan, Şərqi Avropa, Yaxın Şərq və Mərkəzi Asiyanın bir sıra ölkələrində müxtəlif əməliyyatlara cəlb edilmiş Fransa xüsusi xidmət orqanlarının geniş agentura şəbəkəsinin Azərbaycanda ifşa olunmasının ardından dekabr ayının 20-də Fransa prezidenti Emmanuel Makron Fransa Xarici Təhlükəsizlik Baş İdarəsinin (DGSE) rəisi Bernar Emyeni vəzifəsindən azad edib. Daxili Təhlükəsizlik Baş İdarəsinə (DGSİ) rəhbərlik etmiş Nikolas Lerner isə Xarici Kəşfiyyat strukturuna yeni rəhbər təyin edilib.

Şirkətlə bağlı məlumatlar...

Sözügedən şirkətlə bağlı internet üzərindən aparılan araşdırmadan bəlli olub ki, şirkətin ofisi 2020-ci ildə təsis edilib. Şirkətlə bağlı əldə edilən məhdud informasiyada ofis işçilərinin, eləcə də kampaniyanın ümumi əməkdaşlarının sayı bildirilmir. Şirkətin fəaliyyət sferası isə müxtəlif spesifikasiyaları əhatə edib. Hazırda şirkətin əsas internet saytına giriş məhdudlaşdırılıb və əsas informasiyalar silinib.

P.İSMAYILOV

Paylaş:

Baxılıb: 602 dəfə