Milli Məclisdə "Heydər Əliyev Xatirə Zalı" kitabının təqdimatı olub

Bakı:

10 °C

93 %

2 m/s

Əlaqə

AZ RU EN

Ana səhifə / Siyasət / Milli Məclisdə "Heydər Əliyev Xatirə Zalı" kitabının təqdimatı olub

Milli Məclisdə "Heydər Əliyev Xatirə Zalı" kitabının təqdimatı olub

11.05.2012 [00:51]

AzərTAc xəbər verir ki, dünən Milli Məclisdə “Heydər Əliyev Xatirə Zalı” kitabının təqdimatı olub. Mərasim Azərbaycan xalqının ümummilli lideri Heydər Əliyevin anadan olmasının 89-cu ildönümünə həsr olunub.
Tədbiri Milli Məclisin sədri Oqtay Əsədov açaraq əvvəlcə bayram münasibətilə deputatları və tədbirin digər iştirakçılarını təbrik edib.
Milli Məclisin sədri deyib ki, xalqımızın ümummilli lideri Heydər Əliyev müstəqil və müasir Azərbaycanın yaradıcısıdır. Məhz Onun sayəsində xalqımız siyasi və dövlət müstəqilliyinin möhkəm təməlini yaradıb. Bu təməl üzərində qurulan müstəqil dövləti qoruyub saxlaya bilib. Ulu öndərin Vətən və xalq qarşısındakı əvəzsiz tarixi xidmətlərindən danışan O.Əsədov deyib ki, bu il parlamentdəki Heydər Əliyev Xatirə Zalının yaradılmasının 5 ili tamam olur. Bu münasibətlə işıq üzü görən yeni nəşr Ulu öndərin xatirəsinə ehtiramın bir ifadəsidir. ötən 5 ildə xatirə zalı parlamentə gələn xarici qonaqların əsl ziyarət yerinə çevrilib. Milli Məclisdə qonaq olan 150-dən çox nümayəndə heyəti buradakı eksponatları maraqla izləyib, Muzeydəki xatirə kitabına ürək sözlərini yazıblar.
Sonra Milli Məclisin Sosial siyasət komitəsinin sədri Hadi Rəcəbli, İnsan hüquqları komitəsinin sədri Rəbiyyət Aslanova, Regional məsələlər komitəsinin sədri Arif Rəhimzadə, Aqrar siyasət komitəsinin sədri Eldar İbrahimov, deputatlardan Siyavuş Novruzov, Rəfael Hüseynov, Fəttah Heydərov, Mübariz Qurbanlı, Rövşən Rzayev, Milli Məclis Aparatının rəhbəri Səfa Mirzəyev çıxış ediblər. Azərbaycanın yaxın tarixinə nəzər salan natiqlər bildiriblər ki, Heydər Əliyev xalqının xilaskarı və ən böyük şəxsiyyətlərdəndir. Azərbaycanın dövlət müqəddəratının həll olunduğu bir vaxtda xalqın təkidi ilə hakimiyyətə gələn Ulu öndərin müdrik və uzaqgörən siyasəti nəticəsində müstəqilliyimiz çətin və mürəkkəb bir şəraitdə qorunub saxlanılıb, daha da möhkəmlənib. Ulu öndərin böyük siyasətə qayıdışı 1993-cü il iyunun 15-də Onun Ali Sovetə Sədrliyi ilə başlayıb. ümummilli lider Prezident seçilənədək 4 ay parlamentə Sədrlik edib. Bu müddətdə ölkədə qanunvericilik orqanının nüfuzu artıb, Milli Məclis ölkədə baş verən mürəkkəb və ziddiyyətli ictimai, siyasi hadisələrin açıq, demokratik şəraitdə müzakirə olunduğu real hakimiyyət orqanına çevrilib. Qısa müddətdə parlamentin ruhu kökündən dəyişib. Ulu öndər Milli Məclisə siyasi mədəniyyət gətirib.
Qeyd olunub ki, Ulu öndərin rəhbərliyi ilə uğurlu siyasi-inkişaf strategiyasının təməli qoyulub ki, bu da sonralar ölkənin həyatında həlledici amillərdən biri olub. Azərbaycan qısa bir zamanda nəinki regionda, dünyada yüksək nüfuza, sözə sahib olan dövlətə çevrilib. Ulu öndər Azərbaycana milli təhlükəsizlik konsepsiyası, milli dövlətçilik ideyası, bu ideyanı daşıyıb xalqı arxasınca aparmağa qadir siyasi təşkilat, yeni lider bəxş edib. Bu gün Ulu öndərin müəyyənləşdirdiyi strateji inkişaf xəttini uğurla davam etdirən Prezident İlham Əliyevin həyata keçirdiyi uğurlu siyasət nəticəsində Azərbaycanın dünyadakı nüfuzu getdikcə daha da artır. İqtisadi inkişaf, sosial rifah həyatın bütün sahələrində özünü göstərir. Azərbaycanda reallaşdırılan islahatlar ölkəni dünyanın diqqət mərkəzində saxlayır. Neft-qaz sahəsində uğurla reallaşdırılan böyük regional layihələr təkcə bu günümüzün deyil, gələcək rifahımıza təminat verir.
Deputatlar Ulu öndərin gələn il anadan olmasının 90 illiyi ilə bağlı müxtəlif tədbirlərin keçirilməsini, Heydər Əliyevin parlamentə sədrliyi dövrünü əks etdirən filmin çəkilməsini də təklif ediblər.
Tədbirdə parlamentin “Azərbaycan Respublikasının Milli Məclisi - dördüncü çağırış” kitabı da təqdim olunub.

Paylaş:

Baxılıb: 900 dəfə