QMİ sədri: Qlobal problemlərin həllində multikulturalizm ideyaları xüsusi əhəmiyyət daşıyır

Bakı:

24 °C

52 %

6 m/s

Əlaqə

AZ RU EN

Ana səhifə / Sosial / QMİ sədri: Qlobal problemlərin həllində multikulturalizm ideyaları xüsusi əhəmiyyət daşıyır

QMİ sədri: Qlobal problemlərin həllində multikulturalizm ideyaları xüsusi əhəmiyyət daşıyır

28.11.2024 [19:37]

Portuqaliyanın Kaşkai şəhərində keçirilən BMT Sivilizasiyalar Alyansının (UNAOC) “Sülhdə birlik - etimadın bərpası, gələcəyin yenidən formalaşdırılması” mövzusunda 10-cu Yubiley Qlobal Forumunda iştirak edən Qafqaz Müsəlmanları İdarəsinin sədri Şeyxülislam Allahşükür Paşazadə noyabrın 27-də Forum çərçivəsində keçirilən Dini Abidələrin Qorunması üzrə Qlobal Konfransa qatılıb.

QMİ-nin mətbuat xidmətindən AZƏRTAC-a bildirilib ki, tədbirdə çıxış edən şeyxülislam A.Paşazadə qütbləşən, real nüvə təhlükəsi ilə üz-üzə qalan dünyada ksenofobiya təzahürlərinin, milli, dini, irqi zəmində qarşıdurmaya təşviq edən nifrət çağırışlarının artmaqda olduğu hazırkı dövrdə qlobal miqyasda etimadın bərpası ədalətli və rifahlı gələcəyin formalaşdırılması üçün zəruri şərtdir.

“Sülh və gələcəyə dair qlobal problemlərin həllində dinc birgəyaşayış, qarşılıqlı anlaşma mədəniyyəti, sivilizasiyalararası və dinlərarası dialoq və əməkdaşlıq, multikulturalizm ideyaları xüsusi əhəmiyyət daşıyır. Azərbaycan Prezidenti İlham Əliyevin təbirincə desək, sivilizasiyalar və mədəniyyətlər arasında dialoqun təşkili dünyada əhəmiyyət baxımından ən təxirəsalınmaz vəzifələrdən biridir. Təqdirəlayiqdir ki, BMT və onun 20 illik tarixə malik Sivilizasiyalar Alyansı bu mühüm istiqaməti daim diqqətdə saxlayır”, - deyə o bildirib.

İki yüz ölkənin yekdil qərarı ilə COP29-a ev sahibliyi etməyə layiq görülmüş multikultural Azərbaycanın beynəlxalq səviyyədə tanınmış ərazi bütövlüyünü və suverenliyini məhz BMT-nin Nizamnaməsinə və təşkilatın Təhlükəsizlik Şurasının qətnamələrinə uyğun olaraq təmin etdiyini vurğulayan A.Paşazadə bu gün ölkəmizin işğaldan azad olunmuş ərazilərdə şəhər və kəndləri yenidən qurması, dağıdılmış, təhqir olunmuş milli, dini-mənəvi irs nümunələrini, bütün dinlərə məxsus abidələri yenidən bərpa və inşa etməsi barədə danışıb.

“Kultursidə məruz qalmış ərazilərimizdə dini-mənəvi irsin bərpası və qorunması istiqamətində gördüyümüz işlərə BMT Sivilizasiyalar Alyansının dəstəyini hər zaman hiss etmişik və buna görə də hədsiz minnətdarıq. Azərbaycanda dəfələrlə səfərdə olmuş Migel Anxel Moratinos ölkəmizin sivilizasiyalararası dialoq prosesində rolu, multikultural mühit, dinlərarası səmərəli əməkdaşlığın və din-dövlət münasibətlərinin səviyyəsi barədə kifayət qədər məlumatlıdır. Bildiririk ki, dinlərarası əməkdaşlığın və məzhəblərarası anlaşmanın nadir nümunəsinə malik Azərbaycan sivilizasiyalararası dialoqa hər zaman töhfələr vermək iqtidarındadır”,- deyə QMİ sədri əlavə edib.

COP29 çərçivəsində Dini Liderlərin Qlobal Sammiti zamanı qəbul edilmiş Bakı Bəyannaməsində dini liderlərin Yaşıl Dünya naminə səylərini uğurla koordinasiya etmək üçün COP nəzdində Məşvərət Şurasının təsis olunmasının təklif edildiyini xatırladan şeyxülislam artıq qurumun yaradılmasının zamanı çatdığını vurğulayıb.

Paylaş:

Baxılıb: 849 dəfə