Başın sağ olsun, Türkiyə!

Bakı:

13 °C

94 %

7 m/s

Əlaqə

AZ RU EN

Ana səhifə / Sosial / Başın sağ olsun, Türkiyə!

Başın sağ olsun, Türkiyə!

17.05.2014 [10:54]

Bu ağır günlərdə Türk qardaş və bacılarımızın yanındayıq!
Birdir bizim hər halımız-
Sevincimiz-məlalımız.
Bayraqlarda hilalımız
Azərbaycan-Türkiyə.

Mərhum şairimiz Bəxtiyar Vahabzadənin “Azərbaycan-Türkiyə” şeirindən götürülən bu misralar kökü qərinələrə söykənən və dünya durduqca var olacaq Azərbaycan-Türkiyə qardaşlığının ədəbi təsviridir. Bəli, doğrudan da, “bir millət, iki dövlət olan” Azərbaycanla Türkiyənin sevinci də, kədəri də eynidir. Bizlər toyda-bayramda, hər hansı uğurlar əldə edəndə sevindiyimiz kimi, hansısa itkilər baş verəndə də bir-birimizin kədərinə şərik oluruq. Şairin də vurğuladığı kimi, bir ananın iki oğlu olaraq eyni dərdin acısını yaşayırıq. Mayın 13-də Türkiyənin Manisa vilayətinin Soma rayonundakı kömür mədənində baş verən partlayış nəticəsində 284 insanın ölümü Türkiyə qədər Azərbaycanı da kədərə qərq edib.
Xatırlatmaq yerinə düşər ki, hadisənin səhəri günü, yəni, mayın 14-də Azərbaycan Respublikasının Prezidenti İlham Əliyev Manisa vilayətinin Soma rayonundakı kömür mədənində baş vermiş faciə ilə əlaqədar Türkiyə Respublikasının Prezidenti Abdullah Gülə və Baş nazir Rəcəb Tayyib Ərdoğana başsağlığı verib.
Mayın 15-də isə bu faciə ilə bağlı Türkiyənin səfirliyində anma mərasimi keçirilib. Mərasimdə çıxış edən Azərbaycanın Baş nazirinin müavini Abid Şərifov və digər natiqlər Azərbaycanın hər zaman Türkiyənin yanında olduğunu, bundan sonra da olacağını deyiblər.
Yeri gəlmişkən, Soma faciəsi ilə bağlı Türkiyənin Gəncədəki və Naxçıvandakı Baş konsulluqlarında da anma mərasimi keçirilib.
Mayın 16-da isə Azərbaycanın bütün məscidlərində Cümə xütbələri Türkiyədə baş vermiş faciəyə həsr olunub, faciə qurbanlarının ruhuna dualar oxunub.
Öz növbəsində Azərbaycan Qızıl Aypara Cəmiyyəti (AzQAC) Türkiyənin Soma rayonunda baş verən mədən faciəsi nəticəsində ölənlərin ailələrinə yardım kampaniyasına başlayıb. Bu barədə APA-ya AzQAC-ın mətbuat xidmətindən məlumat verilib. “Mərhəmətinizi əsirgəməyin!” devizi altında keçirilən kampaniya faciədə həyatlarını itirmiş insanların ailə üzvlərinə yardım edilməsi məqsədilə təşəbbüsü ilə çıxış edən insanların arzusu ilə başladılıb.
Əslində, burada təəccüblü heç nə yoxdur. Çünki dahi Mustafa Kamal Atatürkün “Azərbaycanın sevinci bizim sevincimiz, kədəri bizim kədərimizdir” və Ulu öndər Heydər Əliyevin “Azərbaycanla Türkiyə bir millət, iki dövlətdir” kəlamlarından güc alan dövlətlərimiz hər zaman bir-birinin yanındadır. Eyni zamanda, Türkiyənin Manisa vilayətinin Soma rayonundakı kömür mədənində baş verən qəzada həlak olanların acısı təkcə Türkiyənin deyil, həm də bizim ortaq acımızdır. Biz bunu öz kədərimiz kimi yaşayırıq. Və bu ağır günlərdə Türk qardaş və bacılarımızın yanındayıq!!!
NADİR

Paylaş:

Baxılıb: 1121 dəfə