DİJA-nın bir qrup üzvü SƏS Media Qrupda olub

Bakı:

11 °C

87 %

4 m/s

Əlaqə

AZ RU EN

Ana səhifə / Sosial / DİJA-nın bir qrup üzvü SƏS Media Qrupda olub

DİJA-nın bir qrup üzvü SƏS Media Qrupda olub

23.06.2015 [09:32]

Dünən Dünya İdman Jurnalistləri Assosiasiyasının (DİJA) bir qrup üzvü SƏS Media Qrupun qonağı olub. SİA-nın məlumatına görə, SƏS Media Qrupun rəhbəri, fəlsəfə üzrə fəlsəfə doktoru Bəhruz Quliyev qonaqları salamlayıb, onları ölkəmizdə, xüsusilə də SƏS Media Qrupun ofisində görməkdən məmnun olduğunu bildirib. Daha sonra söhbət masa ətrafında davam etdirilib.
Bəhruz Quliyev xarici jurnalistlərə qurumun fəaliyyəti haqqında ətraflı məlumat verib. Bildirilib ki, SƏS Media Qrupun tərkibinə daxil olan “Səs” qəzeti 24 il bundan öncə - 1991-ci ildə yaradılıb: “Bundan sonra Media Qrupun tərkibində “Səs” İnformasiya Agentliyi (2008), “SəsTV” internet televiziyası (2011) və bir neçə xəbər portalı təsis edilib. “Səs” qəzeti gündəlik nəşr olunur, agentlik üç dildə - Azərbaycan, ingilis, rus dillərində xəbər yayımı ilə məşğul olur. “Səs TV” internet televiziyası 24 saat onlayn yayım həyata keçirir. Media qrupun Azərbaycanın bölgələri ilə yanaşı, bir neçə xarici ölkələrdə büroları fəaliyyət göstərir”.
Jurnalistlərə Azərbaycanda keçirilən ilk Avropa Oyunları haqqında da məlumat verən Bəhruz Quliyev bildirib ki, ölkəmizdə peşə fəaliyyətlərini yüksək səviyyədə həyata keçirmələri üçün həm yerli, həm də xarici media nümayəndələrinə bütün şərait yaradılıb: “Bakı-2015” birinci Avropa Oyunları Azərbaycan üçün mühüm hadisədir. Nəzərə almaq lazımdır ki, bu Oyunlar Avropa məkanında ilk dəfə keçirilir. Tarixdə ilk dəfə keçirilən Avropa Oyunlarının standartları Azərbaycanda müəyyənləşir. Media orqanı olaraq bizim məqsədimiz yarış ərəfəsində həm ölkə, həm də dünya ictimaiyyətini Oyunlar haqqında maarifləndirmək, onlara ölkəmiz haqqında doğru məlumatlar çatdırmaqdır. Hər bir media orqanının və vətəndaşın borcudur ki, əlində olan resurslardan istifadə edərək insanları düzgün istiqamətə yönəltsin, Azərbaycan həqiqətlərini, mədəniyyətini, iqtisadiyyatını dünyaya düzgün çatdırsın”.
B.Quliyev bu ilin iyul ayının 22-də qeyd ediləcək Azərbaycan milli mətbuatının yaranmasının 140 illiyi haqqında da danışaraq deyib ki, dövlətimiz tərəfindən mediaya, medianın inkişafına xüsusi diqqət və qayğı var. Azərbaycan mətbuatı dünyanın heç bir yerində olmayan qayğı ilə əhatə olunub. Bu günə kimi 300-ə yaxın jurnalistə müxtəlif adlar və mükafatlar verilib: “2009-cu ildən etibarən Azərbaycan Respublikasının Prezidenti yanında Kütləvi İnformasiya Vasitələrinə Dövlət Dəstəyi Fondunun yaradılmasını da xüsusi qeyd etmək lazımdır. 2010-cu ildə jurnalistlərin mənzil şəraitinin yaxşılaşdırılması ilə bağlı Azərbaycan Prezidenti İlham Əliyev dünyada analoqu olmayan bir Sərəncam verdi. 2013-cü ildə, milli mətbuatın 138 illiyində 156 jurnalist bu Sərəncamdan yararlanaraq, mənzillə təmin olundu. Gələn il isə 256 mənzil jurnalistlərə təqdim olunacaq. Bu, onu göstərir ki, mətbuat vətəndaş cəmiyyətinin inkişafında başlıca rol oynayan institut kimi qayğı ilə əhatə olunub”.
Daha sonra avstriyalı Martin Schauhuber, bolqariyalı Alexander Sotirov, xorvatiyalı Karlo Tasler, estoniyalı Merili Luuk, yunanıstanlı Sofia Tsikou Simaioforidou, macarıstanlı Petra Mihalyi, irlandiyalı Ryan Byrne, maltalı Stewart Said, isveçrəli Ugo Curty çıxış edərək, Bakı şəhərinin gözəlliyinə, insanların qonaqpərvərliyinə, üzlərindəki təbəssümə heyran olduqlarını dilə gətirdilər: “Bakı möhtəşəm şəhərdir. Buradakı insanlar gülərüz və mehribandırlar. Sakinlər hər sahədə qonaqlara kömək etməyə çalışırlar. Birinci Avropa Oyunlarının Azərbaycanda keçirilməsi çox yaxşı haldır. İlk Avropa Oyunları Azərbaycanda yüksək səviyyədə təşkil olunub”.
Sonda xarici jurnalistlərlə səmimi söhbət çay süfrəsi arxasında davam etdirilib.

Paylaş:

Baxılıb: 861 dəfə