Millət vəkilləri Məlahət İbrahimqızı və Sevinc Hüseynova Elvin Əsgərovun toy mərasimində iştirak ediblər

Bakı:

25 °C

60 %

2 m/s

AZ RU EN

Ana səhifə / Sosial / Millət vəkilləri Məlahət İbrahimqızı və Sevinc Hüseynova Elvin Əsgərovun toy mərasimində iştirak ediblər

Millət vəkilləri Məlahət İbrahimqızı və Sevinc Hüseynova Elvin Əsgərovun toy mərasimində iştirak ediblər

23.07.2015 [09:29]

Mərasim YAP Sabirabad rayon təşkilatı və Sabirabad rayon İcra Hakimiyyəti tərəfindən təşkil olunub
Ötən il iyulun sonu-avqustun əvvəllərində cəbhə xəttində Ermənistan hərbçilərinin təxribat hərəkətlərinin qarşısını alarkən bir neçə hərbçimiz həlak olmuş, bəziləri isə yaralanmışdı. Döyüşlər zamanı ağır yaralanan əsgərlərin bir neçəsi müalicə üçün Türkiyəyə göndərilmişdi. Həmin əsgərlər qardaş dövlətin qayğısı ilə əhatə olundu və tam sağalaraq ölkəyə qayıtdılar. Əsgərlərimiz Türkiyədə müalicə olunarkən Yeni Azərbaycan Partiyasının (YAP) nümayəndələri onları ziyarət edib, səhhətləri ilə maraqlanmışdılar. Həmin əsgərlərdən biri də Elvin Mayıl oğlu Əsgərovdur. İyulun 21-də Elvin Əsgərovun Sabirabad rayonunda toy mərasimi olub. Toy YAP Sabirabad rayon təşkilatı və Sabirabad rayon İcra Hakimiyyəti tərəfindən təşkil olunub.
Toyda Milli Məclisin deputatları - YAP Siyasi Şurasının üzvü, partiyanın Nəsimi rayon təşkilatının sədri Məlahət İbrahimqızı və YAP Qadınlar Şurasının sədr müavini Sevinc Hüseynova, Sabirabad rayonunun və YAP Sabirabad rayon təşkilatının rəhbərliyi iştirak ediblər.
Bu hadisə ilə bağlı təəssüratlarını bölüşən Məlahət İbrahimqızı bildirib ki, belə bir mərasimdə iştirak etmək çox xoşdur: “Elvin bizim qəhrəman əsgərlərimizdəndir. Ötən il ermənilərin təxribatçı hərəkətlərinin qarşısının alınmasında böyük şücaət göstərib. O, döyüşlərdə ağır yaralandı, müalicə üçün Türkiyəyə göndərildi. Çox şükürlər olsun ki, əsgərlərimiz sağlamlıqlarına qovuşdular. Onlar hələ Türkiyədə müalicə alarkən biz əsgərlərimizi ziyarət etdik. İndi bu gəncin xeyir işində iştirak edirik”.
Millət vəkili qeyd edib ki, Yeni Azərbaycan Partiyası hər zaman belə məsələlərə həssaslıqla yanaşır. Onun sözlərinə görə, çünki bu bizim vətəndaşlıq borcumuzdur: “Partiyamızın rəhbər şəxsləri, millət vəkilləri, o cümlədən, YAP Qadınlar Şurasının nümayəndələri bu kimi tədbirlərdə iştirak edirlər. Biz belə qəhrəman oğullarımızla fəxr edirik. İnanırıq ki, məhz belə oğullarımızın sayəsində Qarabağı işğalçılardan azad edəcəyik. Görünən budur ki, dünya dövlətləri, beynəlxalq təşkilatlar, o cümlədən, Minsk qrupunun həmsədrləri münaqişənin ədalətli həllinə o qədər də maraqlı deyillər. Ona görə də, biz torpaqlarımızı işğalçılardan azad etməyə hazır olmalıyıq və hazırıq da”.
M.İbrahimqızı qeyd edib ki, Elvin Əsgərovun toy mərasimi yüksək əhval ruhiyyədə keçib: “Rayon sakinləri üçün bu toy yaddaqalan oldu. Biz də bu toyda iştirak etdik, onun və ailəsinin sevincinə şərik olduq”.
Millət vəkili Sevinc Hüseynova da Elvinin toyundan xoş təəssüratlarla ayrıldığını bildirib. Onun sözlərinə görə, belə qəhrəman oğulların xeyir işində iştirak etmək çox xoşdur: “İnanırıq ki, qəhrəman əsgərlərimizin sayəsində torpaqlarımızı işğalçılardan azad edəcəyik. Belə toy mərasimləri də həmin torpaqlarda təşkil olunacaq”.
Nardar BAYRAMLI

Paylaş:

Baxılıb: 907 dəfə