Sumqayıt şəhərində də ümumxalq səsverməsi yüksək seçici fəallığı şəraitində baş tutub

Bakı:

10 °C

93 %

1 m/s

Əlaqə

AZ RU EN

Ana səhifə / Sosial / Sumqayıt şəhərində də ümumxalq səsverməsi yüksək seçici fəallığı şəraitində baş tutub

Sumqayıt şəhərində də ümumxalq səsverməsi yüksək seçici fəallığı şəraitində baş tutub

27.09.2016 [10:23]

Dünən Azərbaycan Respublikası Konstitusiyasına əlavə və dəyişikliklərlə bağlı ümumxalq səsverməsi (referendum) keçirilib. Seçici fəallığının müşahidə olunduğu referendumda Azərbaycan seçiciləri ölkə Konstitusiyasının 29 maddəsinə əlavə və dəyişikliklərə öz münasibətini bildiriblər.
Bu gün ölkəmizdə insan hüquq və azadlıqları yüksək səviyyədə təmin olunur və hər bir vətəndaş öz azad səsvermə hüququndan aktiv formada istifadə edir. Referendumu izlədiyimiz Sumqayıt şəhərində də ümumxalq səsverməsi azad, demokratik və şəffaf keçib. Xatırladaq ki, Sumqayıt şəhərində 4 Seçki Dairəsi mövcuddur.
Seçkiləri müşahidə etdiyimiz 43 saylı Sumqayıt üçüncü Seçki Dairəsində seçici aktivliyi xüsusilə yüksək olub. Dairənin 2 saylı Məntəqə Seçki Komissiyasının (MnSK) sədri Maya Abdulova bildirib ki, seçici fəallığı olduqca yüksəkdir. Məntəqədə müşahidə aparan müşahidəçilər də seçkinin gedişatından razılıqlarını bildiriblər. Həmin dairənin 3 saylı MnSK sədri Fikrət Qasımov da bildirib ki, referendum yüksək səviyyədə keçir, seçicilər azad şəkildə gəlib öz mövqelərini bildirirlər.
43 saylı Sumqayıt üçüncü Seçki Dairəsinin 6 saylı MnSK-nın sədri Tərlanə Nağıyeva bildirib ki, insanların azad və demokratik şəkildə məntəqəyə gəlib səs verməsi üçün hər cür şərait yaradılıb. Həmin məntəqədə seçkini müşahidə edən müşahidəçilər Mirzəhüseyn Məmmədov, Hatəm Rüstəmov referendumun demokratik şəraitdə keçirildiyini bildiriblər. Qeyd edək ki, həmin seçki məntəqələrində “exit-poll” həyata keçirilib.
41 saylı Sumqayıt birinci Seçki Dairəsinin 1 və 2 saylı seçki məntəqələrində də aktivlik nümayiş olunub. 1 saylı MnSK-nın sədri Mehdi Ağayev qeyd edib ki, seçicilərin azad şəkildə səs verməsi üçün məntəqədə yüksək səviyyədə şərait yaradılıb. Referendumun gedişini izləyən yerli müşahidəçilər - Şöhrət Səlami, Vəkil Seyidov, Həsən Məmmədov da prosesin demokratik normalara cavab verdiyini vurğulayıblar.
41 saylı Sumqayıt Birinci Seçki Dairəsinin 5 saylı MnSK-nın sədri Sədaqət Həmidova da seçici aktivliyini xüsusi qeyd edib. Referendumu izləyən yerli müşahidəçilər prosesin tam demokratik və ədalətli keçirildiyini vurğulayıblar. Qeyd edək ki, həmin seçki məntəqəsində beynəlxalq müşahidəçilər - Avropa Seçki Müşahidə İnstitutunun nümayəndələri Dainis Turlais və Paulina Haijanen, eləcə də MDB Parlamentlərarası Assambleyanın seçki müşahidə missiyasının üzvləri Serik Bektürqanov və Bahram Abdulayimov referendumun gedişini izləyiblər.
Referendumda iştirak edən seçicilər də yaradılan şəraitdən razılıqlarını bldiriblər. Seçici Zakir Əliyev bildirib ki, Konstitusiyaya təklif olunan əlavə və dəyişiklikləri dəstəkləyir: “Azərbaycan dövlətinin daha da firavan gələcəyini istəyiriksə, bu gün səsverməyə çıxarılan məsələlərə “HƏ” deməliyik”.
Seçici Seymur Mərdəliyev qeyd edib ki, referendum hər bir xalqın gələcəyini təyin etmək üçün verdiyi qərardır: “İnanıram ki, xalqımız dövlətimizi daha böyük uğurlara daşıyacaq dəyişikliklərə səs verəcək”.
Pərviz SADAYOĞLU

Paylaş:

Baxılıb: 499 dəfə