28 May - Respublika Günü münasibətilə Bakıda idman yürüşü keçirilib

Bakı:

24 °C

88 %

3 m/s

Əlaqə

AZ RU EN

Ana səhifə / Sosial / 28 May - Respublika Günü münasibətilə Bakıda idman yürüşü keçirilib

28 May - Respublika Günü münasibətilə Bakıda idman yürüşü keçirilib

31.05.2017 [09:40]

28 May - Respublika Günü münasibətilə Dövlət Təhlükəsizliyi Xidməti, Gənclər və İdman Nazirliyi, Dövlət Sərhəd Xidməti və digər dövlət qurumlarının əməkdaşlarının, eləcə də kütləvi informasiya vasitələri nümayəndələrinin birgə iştirakı ilə idman yürüşü keçirilib.
AZƏRTAC xəbər verir ki, idman yürüşündə Dövlət Təhlükəsizliyi Xidmətinin rəisi, Azərbaycanın Milli Qəhrəmanı, general-leytenant Mədət Quliyev, Dövlət Sərhəd Xidmətinin rəisi - Sərhəd Qoşunlarının komandanı, general-polkovnik Elçin Quliyev iştirak ediblər.
Yürüşün açılış mərasimində dövlət himni səsləndirilib.
General-leytenant Mədət Quliyev 28 May - Respublika Günü münasibətilə yürüş iştirakçılarını təbrik edib. Yürüşün keçirilməsi təşəbbüsünə dəstək verdiklərinə və bilavasitə iştiraklarına görə KİV nümayəndələrinə minnətdarlığını bildirən general-leytenant Mədət Quliyev yaranmasının 99-cu ildönümü qeyd edilən Azərbaycan Xalq Cümhuriyyətinin dövlətçilik tariximizdə şərəfli yer tutduğunu deyib. Diqqətə çatdırılıb ki, müsəlman Şərqində ilk demokratik dövlət qurmuş Azərbaycan qədim mədəniyyətə malik xalqının mətinlik, şücaət və mərdlik simvolu olduğunu dünyaya bəyan etməyə müvəffəq olub. Bu tarixi hadisə Vətənimizin daha işıqlı sabahının bünövrəsini qoyub. Möhkəm təməllər üzərində qurulmuş müasir Azərbaycan dövlətinin hazırkı dinamik inkişafı bunun bariz nümunəsidir.
General-leytenant Mədət Quliyev bildirib ki, azərbaycançılıq ideyalarını daim rəhbər tutan Ümummilli lider Heydər Əliyevin hələ sovet dönəmindəki fəaliyyəti müstəqillik arzularının reallaşması üçün zaman-zaman mükəmməl zəmin yaradıb. Qürurvericidir ki, ölkəmizi həqiqi istiqlaliyyətə qovuşduran Heydər Əliyevin siyasi xəttinin layiqli davamçısı, Prezident İlham Əliyev Azərbaycanın müstəqilliyinin daha da möhkəmləndirilməsi istiqamətində qətiyyətli addımlar atıb, ölçüyəgəlməz xidmətlər göstərib.
Dövlət Təhlükəsizliyi Xidmətinin rəisi vurğulayıb ki, bu gün respublikanın müstəqil siyasəti Prezident İlham Əliyevin müdrik, uzaqgörən idarəçilik və yüksək diplomatik peşəkarlığından irəli gəlir: “Azərbaycan öz tarixində heç vaxt indiki kimi güclü olmayıb. Bu inkişafa, tərəqqiyə və əmin-amanlığa görə dövlət başçısı İlham Əliyevə minnətdarıq. Qədirbilən xalqımız Prezident İlham Əliyevi və Birinci vitse-prezident xanım Mehriban Əliyevanı çox sevir”.
Ali Baş Komandan İlham Əliyevin qarşıya qoyduğu vəzifələrin yerinə yetirilməsi istiqamətində DTX-nin bütün imkanlarının səfərbər olunduğunu diqqətə çatdıran general-leytenant Mədət Quliyev respublikada təhlükəsizliyin təmin edilməsi məqsədilə zəruri tədbirlərin həyata keçirildiyini bildirib: “Dövlət Təhlükəsizliyi Xidməti bu işlərdə digər hüquq-mühafizə orqanları, dövlətçiliyə sadiq ictimai təşkilatlar və cəmiyyətin sağlam qüvvələri, habelə tərəfdaş dövlətlərin müvafiq orqanları ilə sıx əməkdaşlığa xüsusi önəm verir. Əlbəttə ki, kütləvi informasiya vasitələri ilə əlaqələrin qurulmasına da böyük diqqət yetirilir. Bugünkü idman tədbiri də cəmiyyətdə hökm sürən həmrəyliyin, dövlət və vətəndaş arasında sarsılmaz birliyin, eləcə də sağlam həyat və sağlam ruh vəhdətinin daha bir əyani nümunəsi və nümayişidir”.
Sonra açılış mərasimi tanınmış estrada müğənnilərinin və rəqs ansamblının ifaları ilə davam edib.
Dövlət Bayrağı Meydanından başlayan, Bakı Şəhər Gənclər və İdman Baş İdarəsinin hakimləri tərəfindən idarə edilmiş 5 kilometrlik idman yürüşü Dənizkənarı Milli Parkdakı “Saat qülləsi”ndə başa çatıb.
Sonda yürüşün iştirakçıları olan KİV nümayəndələri Dövlət Təhlükəsizliyi Xidmətinin diplomları ilə təltif ediliblər.

Paylaş:

Baxılıb: 563 dəfə