“Bu uğur uzun illər ərzində çəkilən zəhmət nəticəsində əldə olunub”

Bakı:

12 °C

94 %

4 m/s

Əlaqə

AZ RU EN

Ana səhifə / Sosial / “Bu uğur uzun illər ərzində çəkilən zəhmət nəticəsində əldə olunub”

“Bu uğur uzun illər ərzində çəkilən zəhmət nəticəsində əldə olunub”

17.08.2017 [10:20]

Məlum olduğu kimi, 2017-2018-ci tədris ili üçün I-IV ixtisas qrupları üzrə keçirilən qəbul imtahanı başa çatıb. Öz bilik səviyyəsini sınaqdan keçirmiş və müsabiqədə iştirak etmək hüququ qazanmış abituriyentlər yığdıqları bala müvafiq olaraq ixtisas seçimi ediblər. Artıq ali təhsil müəssisələrinə qəbul olan abituriyentlərin qeydiyyatı başlanıb. Odur ki, abituriyentlər avqustun 15-dən 25-dək sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər.
Yeri gəlmişkən xatırladaq ki, bu dəfə imtahanda I ixtisas qrupu üzrə 7, II ixtisas qrupu üzrə 2, III ixtisas qrupu üzrə 3, IV ixtisas qrupu üzrə isə 3 nəfər olmaqla, ümumilikdə 15 abituriyent onlara təqdim olunmuş bütün test tapşırıqlarına düzgün cavab verib və maksimum nəticə - 700 bal toplayıb. Ənənəyə sadiq qalaraq, bu il də 700 bal toplayan abituriyentləri sizinlə tanış edirik. Belə ki, III ixtisas qrupu üzrə maksimum nəticə əldə edən rekordçulardan biri də 278 nömrəli məktəbin məzunu olan Pərvin Əhmədovadır.
Məlumat üçün bildirək ki, Pərvin Əhmədova respublika fənn olimpiadasında Azərbaycan tarixi fənni üzrə 2015-ci və 2016-cı illərdə qızıl medal qazanıb, “Ədəbiyyat biliciləri” müsabiqəsində isə 2017-ci ildə I yeri tutub. Həmçinin Bakı şəhəri üzrə keçirilən şeir müsabiqələrində 2014-cü və 2015-ci illərdə I yerə layiq görülüb, “Parlaq zəka” intellektual oyununda 2016-cı və 2017-ci illərdə tarix və coğrafiya fənləri üzrə I yerə sahib olub. O, IX sinfi xüsusi fərqlənmə şəhadətnaməsi ilə bitirib, XI sinfi əla qiymətlərlə başa vurub.
Məzun olduğu məktəbdə həm də sinif nümayəndəsi olan rekordçumuzun sözlərinə görə, kiçik yaşlarından 700 bal toplayacağına əmin olub: “Sinif nümayəndəsi olduğum üçün digər şagirdlərə də nümunə olmalıydım. Hazırlıq müddətində belə dərslərimdən qalmırdım. Məktəb mənə elm öyrətməklə yanaşı, çoxlu dostlar da qazandırdı. İstər təhsil aldığım rayonda, istər məzunu olduğum məktəbdə, istərsə də ailəmizdə ilk dəfə 700 balı mən toplamışam. Ailəmin inamını doğrultduğum üçün böyük sevinc hissi yaşayıram. Bu uğur uzun illər ərzində çəkilən zəhmət nəticəsində əldə olunub. Mənim oxumaqdan və gələcəkdə peşəkar mütəxəssis olmaqdan başqa şansım yoxdur. Bunu bildiyim üçün gecəmi-gündüzümə qatıb dərslərimi oxuyurdum. Bəzən gecə yuxuda da dərslərimi sayıqlayırdım. Aprelin 30-da keçirilən imtahanda 657 bal toplamışdım. Kodlaşdırmada etdiyim səhvlər ucbatından ilk cəhdim uğursuz olsa da, iyulun 14-də keçirilən ikinci imtahanda ən yüksək balı toplaya bildim. Hər zaman 700 bal toplayacağımı və jurnalistlərin mənimlə reportaj hazırlayacaqlarını təsəvvür edərdim. Nəhayət ki, bu arzum gerçəkləşdi və hazırda sizin qarşınızdayam”.
Pərvinin dediyinə görə, ali təhsilini ADA Universitetinin dövlət və ictimai münasibətlər fakültəsində davam etdirəcək. Vətən həsrəti ilə yanan, əslən Ağdam rayonundan olan abituriyentimizin bu ixtisası seçməsi də səbəbsiz deyil: “Suveren Azərbaycanın ərazisinin təxminən 20 faizi hələ də Ermənistanın işğalı altındadır. Ermənistanın təcavüzkar siyasətini, dinc sakinlərə qarşı törədilmiş cinayətləri, o cümlədən Azərbaycan haqqında, xalqımızı narahat edən problem haqqında həqiqəti dünya ictimaiyyətinə çatdırmaq istəyirəm. Düşünürəm ki, seçdiyim ixtisas mənim bu arzumun reallaşmasında mühüm rol oynayacaq”.
Müşfiqə BAYRAMLI

Paylaş:

Baxılıb: 509 dəfə