Yevlaxda əlillər üçün Regional Bərpa Mərkəzi əsaslı təmir və yenidənqurmadan sonra istifadəyə verilib

Bakı:

20 °C

68 %

3 m/s

AZ RU EN

Ana səhifə / Sosial / Yevlaxda əlillər üçün Regional Bərpa Mərkəzi əsaslı təmir və yenidənqurmadan sonra istifadəyə verilib

Yevlaxda əlillər üçün Regional Bərpa Mərkəzi əsaslı təmir və yenidənqurmadan sonra istifadəyə verilib

08.11.2019 [12:03]

Əmək və Əhalinin Sosial Müdafiəsi Nazirliyinin Yevlax şəhərindəki Əlilliyi olan şəxslər üçün Regional Bərpa Mərkəzi əsaslı təmir və yenidənqurmadan sonra istifadəyə verilib.

AZƏRTAC-ın bölgə müxbiri xəbər verir ki, mərkəzin açılışında Əmək və Əhalinin Sosial Müdafiəsi nazirinin müavini Vüsal Nəsirli, Yevlax rayon İcra Hakimiyyətinin başçısı Anar Tağıyev, qeyri-hökumət təşkilatlarının nümayəndələri, əlilliyi olan şəxslər iştirak ediblər.

Tədbridə çıxış edən Əmək və Əhalinin Sosial Müdafiəsi nazirinin müavini Vüsal Nəsirli bildirib ki, Prezident İlham Əliyevin tapşırığına əsasən bir çox bölgələrdə yeni reabilitasiya mərkəzləri yaradılıb. Hazırda Əmək və Əhalinin Sosial Müdafiəsi Nazirliyinin 14 bərpa-müalicə müəssisəsi var. Dövlət başçısının göstərişi ilə reabilitasiya infrastrukturunun müasirləşdirilməsi istiqamətində müvafiq işlər aparılır. Nazirliyin Respublika Əlillərin Bərpa Mərkəzində, Uşaq Bərpa Mərkəzində yüksəksəviyyəli reabilitasiya şəraiti yaradılıb.

Nazir müavini reabilitasiya mərkəzinin bir çoxunda – Mərdəkan Müalicə Pansionatında, Protez Ortopedik Bərpa Mərkəzində, Yevlax, Naftalan, Xaçmaz, Şəki, Lənkəran və Sumqayıt Regional Bərpa mərkəzlərində əsaslı təmir və yenidənqurma işlərinin aparıldığını deyib. Bildirib ki, cari ilin sonuna qədər həmin müəssisələrin əsaslı təmir və bərpadan sonra istifadəyə verilməsi nəzərdə tutulub.

V.Nəsirli dövlət başçısının tapşırığına əsasən, bərpa mərkəzləri şəbəkəsinin ölkə boyu genişləndiriləcəyini də qeyd edib. Bu il Şəmkir və Qəbələ rayonlarında hər biri 50 çarpayılıq Uşaq Bərpa mərkəzlərinin inşasına başlanmasının planlaşdırıldığını, növbəti illərdə də bu istiqamətdə işlərin davam etdiriləcəyini, yeni mərkəzlərin tikiləcəyini bildirib.

Məlumat verilib ki, əlilliyi olan şəxslər üçün Regional Bərpa Mərkəzində müasir tələblərə uyğun reabilitasiya şəraiti yaradılmaqla yanaşı, mərkəz yeni müasir tibbi-reabilitasiya aparatları və avadanlıqlarla təchiz edilib. Mərkəzdə əlilliyi olan şəxslərə səmərəli fizioterapevtik üsulların tətbiqi əsasında kompleks tibbi-sosial reabilitasiya xidmətləri göstəriləcək. Burada əlilliyi olan şəxslərin müalicə idmanına cəlb olunması, onlarda gigiyenik vərdişlərin tərbiyə edilməsi, sağlam həyat tərzinin təbliği və sair istiqamətlərdə işlər görüləcək, müasir və sınanmış metodika və texnologiyalardan da istifadə ediləcək.

Bildirilib ki, yeni qurulan “Reabilitasiya” altsistemi bərpa müəssisələri ilə Tibbi-Sosial Ekspert komissiyaları arasında e-formada məlumat mübadiləsinə şərait yaradacaq. Əlilliyi olan şəxslərin reabilitasiya müəssisələrinə qəbulu da həmin komissiyalar tərəfindən altsistemə daxil edilən göndərişlər əsasında şəffaf, obyektiv şəkildə aparılacaq.

Yevlax Şəhər İcra Hakimiyyətinin başçısı Anar Tağıyev əlilliyi olan şəxslər üçün belə müasir tələblərə uyğun reabilitasiya müəssisəsinin istifadəyə verilməsinin Prezident İlham Əliyev tərəfindən həssas qruplara, o cümlədən əlilliyi olan şəxslərə göstərilən xüsusi qayğının bir təzahürü olduğunu vurğulayıb. O, dövlət başçısının sosial siyasətinin Yevlax rayonunda da uğurlu icrası sahəsində aparılan işləri qeyd edib.

Tədbirdə ictimai təşkilatların nümayəndələri, əlilliyi olan şəxslər çıxış edərək, ölkəmizdə əlilliyi olan şəxslərin sosial təminatının gücləndirilməsi, tibbi-sosial reabilitasiyası və cəmiyyətə inteqrasiya imkanlarının artırılması, reabilitasiya müəssisələrinin müasir tələblərə uyğun qurulması sahəsində atılan mühüm addımlara görə dövlətimizin başçısına minnətdarlıqlarını ifadə ediblər.

Sonra mərkəzdə yaradılan şəraitlə tanışlıq olub. İkimərtəbəli mərkəz akt zalı, idman zalı, duş zalı, hovuz, qəbul, fizioterapiya, parafin, masaj, vanna, palata və həkim otaqlarından, mətbəx, yeməkxana və sairdən ibarətdir. Mərkəz Yevlax və ətraf rayonlardan olan əlilliyi olan şəxslərə xidmət göstərəcək.

Paylaş:

Baxılıb: 516 dəfə