“Virtual məktəb” layihəsi: interaktivliyi təmin etmək, məsafədən tədris imkanlarını genişləndirmək...

Bakı:

19 °C

68 %

1 m/s

AZ RU EN

Ana səhifə / Sosial / “Virtual məktəb” layihəsi: interaktivliyi təmin etmək, məsafədən tədris imkanlarını genişləndirmək...

“Virtual məktəb” layihəsi: interaktivliyi təmin etmək, məsafədən tədris imkanlarını genişləndirmək...

25.04.2020 [20:39]

Layihə üzrə 370 min şagird və 20 min müəllim qeydiyyatdan keçib

Məlum olduğu kimi, yeni növ koronavirus infeksiyasının (COVİD-19) Azərbaycan ərazisində geniş yayılmasının qarşısının alınması məqsədilə bir sıra təxirəsalınmaz tədbirlər həyata keçirilir. Eyni zamanda, bu kontekstdə ölkədə fəaliyyət göstərən bütün təhsil müəssisələrində tədris, təlim-tərbiyə prosesi dayandırılıb.

Teledərslər bütün sinifləri və əksər fənləri əhatə edir

Heç şübhəsiz, karantin günlərində şagirdlərin dərsdən geri qalmaması üçün distant və evdə təhsil formatları məqsədəuyğun seçim kimi qəbul edilir. Məhz bunu nəzərə alaraq Təhsil Nazirliyinin təşkilatçılığı ilə martın 11-dən “Mədəniyyət” və “ARB Günəş” kanallarında teledərslərin yayımına başlanılıb. Teledərslər bütün sinifləri və əksər fənləri əhatə etməklə həm Azərbaycan, həm də rus bölmələri üçün əvvəlcədən elan edilmiş cədvələ uyğun olaraq təqdim olunub.

Bununla yanaşı, aprelin 2-dən etibarən "Virtual məktəb" layihəsinə start verilib. Layihənin əsas məqsədi Təhsil Nazirliyi tərəfindən yayımlanan teledərslərin interaktivliyini təmin etmək və ümumilikdə, məsafədən tədris imkanlarını genişləndirməkdir.

Qeydiyyatdan keçənlərin sayında günbəgün artım müşahidə olunur

Təhsil Nazirliyindən "Yeni Azərbaycan" qəzetinə verilən məlumata əsasən hər bir şagird “virtual.edu.az” onlayn portalında qeydiyyatdan keçərək öz yaşına əsasən sinifə təyin olunur. Eləcə də “Virtual məktəb” portalında müəllimlər tərəfindən onlayn dərslərin keçirilməsi üçün imkan yaradılıb. Nazirlikdən əldə etdiyimiz məlumata görə, bu məqsədlə qeydiyyatdan keçənlərin sayında günbəgün artım müşahidə olunur. Belə ki, aprelin 2-dən 21-dək ölkənin 65 şəhər və rayonlarından 370 min şagird və 20 min müəllim "Virtual məktəb" portalında qeydiyyatdan keçib.

Portalın funksionallığı genişləndirilib

Nazirlik tərəfindən hazırlanmış elektron dərsliklər və əlavə video dərslər “Virtual məktəb” portalına inteqrasiya edilib. Beləliklə, portalın funksionallığı genişləndirilərək qeyd olunan imkanlarla bərabər görüntülü və audio dərslərin keçirilməsi, teledərslərin izlənilməsi, tədris cədvəlinin tutulması, şagird və müəllim qruplarının təşkili, sənədlərin üzərində birgə iş, həftəlik tapşırıqların həll edilməsi, o cümlədən şagird və müəllimlər arasında yazışma imkanları təqdim edilib.

Bir sözlə, şagirdlər karantin müddətində bu resurslardan faydalanmaqla yanaşı, məktəblərdə tədris prosesi başladıqdan sonra da öz şəxsi səhifələrinə daxil olaraq, mövcud imkanlardan yararlana bilərlər. Eyni zamanda, portalda qeydiyyatdan keçmiş müəllimlər bu resursları sinif otağında dərslərində tətbiq edə bilərlər.

Sualınız var? “Virtual bələdçi” xidmətindən istifadə edin...

Öz növbəsində, “Virtual məktəb” portalından daha rahat istifadəni təmin etmək və yaranan sualları cavablandırmaq məqsədilə “Virtual bələdçi” xidməti də istifadəyə verilib. Xidmətdən faydalanmaq üçün istifadəçilər portalda (www.virtual.edu.az) “Sualınız var?” bölməsinə keçid edib onları maraqlandıran sualları seçməklə cavablarla tanış ola bilərlər.

İki növ texniki dəstək...

Bununla yanaşı, portaldan istifadə üzrə iki növ texniki dəstək xidməti göstərilir. Vətəndaşlar müraciətlərində tələb olunan məlumatları (çətinlik haqqında qısa təsvir, şagirdin FİN kodu, şagirdin ad, soyadı və ata adı, sinif, məktəb, doğum tarixi, əlaqə nömrəsi) qeyd etməklə “teams@tsii.edu.az” elektron ünvanına və yaxud Təhsil Sisteminin İnformasiyalaşdırılması İdarəsinin "facebook" səhifəsində məktub bölməsinə göndərə bilərlər.

Müşfiqə BAYRAMLI

Paylaş:

Baxılıb: 522 dəfə