COVID-19-a yoluxmamaq üçün qabaqlayıcı tədbirlərin görülməsi pandemiya ilə mübarizədə mühüm əhəmiyyət kəsb edir

Bakı:

27 °C

58 %

7 m/s

AZ RU EN

Ana səhifə / Sosial / COVID-19-a yoluxmamaq üçün qabaqlayıcı tədbirlərin görülməsi pandemiya ilə mübarizədə mühüm əhəmiyyət kəsb edir

COVID-19-a yoluxmamaq üçün qabaqlayıcı tədbirlərin görülməsi pandemiya ilə mübarizədə mühüm əhəmiyyət kəsb edir

25.08.2020 [09:08]

Ekspertlərin fikrincə, yeni növ koronavirus infeksiyasından qorunmaq üçün sosial məsafənin saxlanılması, sanitar-gigiyenik qaydalara riayət olunması və qoruyucu vasitələrdən istifadə edilməsi zəruridir
Məlum olduğu kimi, bütün dünyada tüğyan edən yeni növ koronavirus (COVID-19) infeksiyasının ölkəmizdə geniş yayılmasına qarşı dövlət tərəfindən həyata keçirilən effektiv və təxirəsalınmaz tədbirlər öz müsbət nəticəsini verib. Belə ki, xüsusi karantin rejimi ilə əlaqədar vaxtında verilmiş düzgün qərarların hesabına yoluxma əleyhinə qabaqlayıcı tədbirlərin görülməsi nəticəsində avqust ayından etibarən gündəlik yoluxma sayı azalıb. Təbii ki, əldə olunan bu nəticəni qoruyub saxlamaq, yoluxma sayının artmasına imkan verməmək üçün inzibati tədbirlərlə yanaşı, vətəndaş məsuliyəti də ilkin şərtlərdəndir. Ekspertlərin fikrincə, COVID-19 xəstəliyindən qorunmaq üçün vətəndaşlar tərəfindən qoruyucu vasitələrdən istifadə edilməsi, sanitar-gigiyenik qaydalara riayət olunması və sosial məsafənin saxlanması zəruridir.
Məsələyə münasibət bildirən Milli Məclisin Səhiyyə komitəsinin sədr müavini Rəşad Mahmudov deyib ki, son iki ay Azərbaycan səhiyyəsi, cəmiyyəti və dövləti üçün ağır dönəm olub: “Hər 1 milyon əhaliyə düşən xəstə və yoluxma sayı ilə yanaşı, vəziyyəti ağırlaşan pasiyentlər, reanimasiyada olan xəstələrin sayı baxımından çətinliklər yaşandı. Xüsusi karantin rejimi ilə əlaqədar vaxtında qəbul edilmiş doğru qərarlar yoluxma sayının dəfələrlə aşağı düşməsinə və səhiyyənin, aidiyyəti qurumların, həmçinin cəmiyyətin dərindən nəfəs almasına imkan yaratdı. Lakin unutmamaq lazımdır ki, virutik xəstəliklər öz xüsusiyyətlərini dəyişmir”.
“Payız aylarında COVID-lə əlaqəsi olmayan virus xəstəliklərinin artma dövrü olur. İnsan bədənində bəzi bioloji dəyişikliklər payız aylarında baş verdiyinə görə həmin vaxt alovlanmanın yenidən baş verməsi ehtimalı həm Ümumdünya Səhiyyə Təşkilatı, həm də bu sahədə fəaliyyət göstərən tibb mütəxəssisləri tərəfindən qeyd edilir. Ona görə də biz buna hərtərəfli hazır olmalıyıq”, - deyə R.Mahmudov bildirib.
R.Mahmudov, həmçinin ötən həftə ölkəmizdə həyata keçirilməsinə başlanan seroloji testlərin aparılması və onların əhəmiyyəti haqqında da məlumat verib: “Aparılan seroloji testlər ölkədə xəstəliyin xəbərsiz keçirilməsi baxımından cəmiyyət içərisində infeksiyanın skrinninqi, yəni, tədqiqatı üçün həyata keçirilən müayinələrdən biridir. Həmin testlərin başqa faydaları da var. Orqanizmdə anticisimlərin miqdarının müəyyən edilməsi bundan sonra baş verə biləcək ikinci yoluxmaya qarşı müqavimət gücü haqqında məlumat əldə etməyə imkan verir. Həmçinin daha əvvəl virusa yoluxanların siyahısı əldə edildiyi üçün onların qanından istifadə edərək ağırlaşmış xəstələrin müalicəsi həyata keçirilə bilir”.
Milli Məclisin deputatı Kamilə Əliyeva isə bildirib ki, digər dövlətlərlə müqayisədə Azərbaycanda virusa qarşı daha səmərəli mübarizə aparılır: “Ölkəmizdə xüsusi karantin rejimi tətbiq edildikdən sonra atılan qabalayıcı addmlar göstərdi ki, Azərbaycan ötən müddət ərzində COVID-19 infeksiyası ilə mübarizədə uğurlu bir yol keçib. Mövcud xəstəxanaların maddi-texniki bazasının gücləndirilməsi, COVID-19-la mübarizədə modul tipli xəstəxanaların tikilib istifadəyə verilməsi xəstələrin müalicəsi işinə böyük töhfə olub. Vətəndaşların bir qismi karantin rejimi qaydalarına ciddi əməl etmədiyi üçün son iki ay ərzində Azərbaycan böyük bir dalğa ilə üz-üzə qalsa da, görülən tədbirlər nəticəsində avqust ayından həmin dalğa nisbətən səngiyib”.
Deputatın sözlərinə görə, bundan sonrakı dövr üçün pandemiya ilə mübarizədə əsas məsələ yoluxma əleyhinə qabaqlayıcı tədbirlərin görülməsidir: “Son günlərin rəqəmləri yoluxma sayında nisbətən artım olduğunu göstərdiyi üçün sanitar-gigiyenik qaydalara riayət edilməsi, qoruyucu maskalardan istifadə, sosial məsafənin saxlanması olduqca vacibdir. COVID-19 infeksiyasından qorunmaq üçün vətəndaşlarımız sağlamlıqlarına diqqətlə yanaşmalıdırlar. Eyni zamanda, hər kəs mövcud karantin rejiminin qaydalarına ciddi əməl etməlidir”.
Qaşqay ZİYƏDDİNOĞLU

Paylaş:

Baxılıb: 566 dəfə