“Ev şəraitində müalicə yalnız həkim təyinatı ilə aparılmalıdır”

Bakı:

28 °C

56 %

7 m/s

Əlaqə

AZ RU EN

Ana səhifə / Sosial / “Ev şəraitində müalicə yalnız həkim təyinatı ilə aparılmalıdır”

“Ev şəraitində müalicə yalnız həkim təyinatı ilə aparılmalıdır”

15.12.2020 [09:27]

Son vaxtlar dünya ölkələrində, o cümlədən Azərbaycanda yeni növ koronavirus (COVID-19) infeksiyasına yüksək yoluxma dinamikası müşahidə edilir. Təbii ki, belə bir vəziyyətdə insanları daha çox düşündürən virusa yoluxmamaq üçün hansı addımların atılmasının vacibliyidir. Mütəxəssislərin sözlərinə görə, burada başlıca məsələ hər kəsin öz üzərinə düşən məsuliyyəti anlayaraq bütün qaydalara əməl etməsidi. İlk növbədə, zərurət olmadığı təqdirdə evdən çıxmamaq lazımdır. Küçəyə çıxmaq xəstəliyə yoluxmağa və başqalarını yoluxdurmağa səbəb ola bilər. Hansısa zərurətdən küçəyə çıxdıqda isə mütləq tibbi maskadan istifadə edilməlidir. Virusa yoluxanlara gəlincə, onların da müalicə zamanı bəzi məsələləri diqqətdə saxlaması vacibdir.
“COVID-19 infeksiyasına yoluxma zamanı xəstəliyi yüngül keçirənlər ev şəraitində müalicə alırlar. Təəssüf ki, həmin xəstələrin müəyyən hissəsi evdə müalicə olunarkən şəfa tapmaq üçün kimdənsə eşitdiyi, yaxud sosial şəbəkələrdə paylaşılan hansısa resept və üsullardan istifadə edir. Təcrübə göstərir ki, ağırlaşmaların başlıca səbəbi çox vaxt bununla əlaqədar olur. Evdə müalicə zamanı istifadə edilən dərmanlardan apteklərdə çalışan əczaçıların məsləhəti ilə deyil, həkim tövsiyəsi və ya reseptlər əsasında istifadə edilməlidir”. Bu fikirləri qəzetimizə açıqlamasında həkim-terapevt Solmaz Musayeva deyib.
O bildirib ki, hər dərman bütün xəstələrə eyni qaydada tətbiq edilə bilməz: “Müəyyən vitamin qrupları var ki, həkimlə məsləhətləşəndən sonra onları qəbul etmək olar. Həmin vitaminlər əsasən D və C vitamini, sink və selen mikroelementləri, antibakterial və antibiotik dərmanlardır. Həmin dərmanlar sırasına qan durulaşdırıcı preparatlar da daxildir, hətta bəzi xəstələr onu inyeksiya şəklində istifadə edirlər. Antibiotiklərdən qeyri-düzgün istifadə nəinki xəstəliyə müsbət təsir göstərə, hətta onun gedişatını ağırlaşdıra da bilər”.
Onun sözlərinə görə, digər qrup preparatlar yüksək dozada vitaminlərin venadaxilinə yeridilməsidir ki, bu, qan laxtalanmasına səbəb ola bilər. Ümumiyyətlə, xəstənin ağır simptomları yoxdursa, həkimlər sistemlərlə müalicəni tövsiyə etmirlər. Həmin proses yalnız xəstəxana şəraitində aparılmalıdır: “Qaraciyərə birbaşa təsir edən toksik dərmanların özbaşına istifadəsi yolverilməzdir. COVID-19 infeksiyası ilə yanaşı, başqa xəstəliklər varsa, bunu həkimə demək lazımdır ki, onun təyin edəcəyi dərmanlar düzgün olsun”.
Həkim qeyd edib ki, düzgün və rasional qidalanmaya da diqqət yetirmək lazımdır: “İstirahət və yuxu rejiminə riayət edilməsi də mütləqdir, eyni zamanda, çoxlu maye qəbul etmək məsləhətdir”.
MÜŞFİQƏ

Paylaş:

Baxılıb: 688 dəfə