YAP dünənin, bu günün və gələcəyin partiyasıdır

Bakı:

11 °C

87 %

1 m/s

Əlaqə

AZ RU EN

Ana səhifə / YAP xəbərləri / YAP dünənin, bu günün və gələcəyin partiyasıdır

YAP dünənin, bu günün və gələcəyin partiyasıdır

02.11.2012 [01:06]

Yeni Azərbaycan Partiyası Abşeron rayon təşkilatında partiyanın yaradılmasının 20-ci ildönümünə həsr olunmuş möhtəşəm bayram tədbiri keçirilib
Dünən Yeni Azərbaycan Partiyası Abşeron rayon təşkilatı rayon İcra Hakimiyyəti ilə birgə partiyanın yaradılmasının 20-ci ildönümünə həsr olunmuş möhtəşəm bayram tədbiri keçirib. Tədbir iştirakçıları öncə Xırdalan şəhərinin mərkəzində yerləşən Heydər Əliyev adına Xiyabanda Ulu öndərin abidəsi önünə gül-çiçək dəstələri düzüblər.
Bayram tədbiri Mədəniyyət Sarayında davam etdirilib. Azərbaycan Respublikasının dövlət himni səsləndikdən sonra, tədbir iştirakçılarına Azərbaycan xalqının Ümummilli lideri Heydər Əliyevə həsr olunmuş sənədli film təqdim olunub. Filmə baxışdan sonra, Yeni Azərbaycan Partiyasının sıralarına yeni qəbul olunmuş gənclərə partiya biletləri təqdim edilib. Partiya biletlərini YAP Abşeron rayon təşkilatının sədri Bilman Vəliyev, Milli Məclisin deputatı Hadı Rəcəbli, YAP İdarə Heyətinin üzvü Nizami Xudiyev və Abşeron rayon İcra Hakimiyyəti başçısının humanitar işlər üzrə müavini İradə Gülməmmədova təqdim ediblər.
YAP Abşeron rayon təşkilatının sədri Bilman Vəliyev çıxışında qeyd edib ki, partiya siyasi səhnəyə XX əsrin 90-cı illərinin əvvəllərində ölkədə yaranmış mürəkkəb ictimai-siyasi şəraitdə gəlib: “YAP Ümummilli lider Heydər Əliyevin ideyalarını həqiqətə çevirən nüfuzlu bir siyasi təşkilatdır. 600 minə yaxın üzvü olan partiyamız geridə qoyduğumuz 20 ildə çətin, çətin olduqca da şərəfli, qüdrətli yol keçmişdir. Yeni Azərbaycan Partiyası tarixi zərurətdən yaranan siyasi təşkilatdır. Partiyanın ideyalarına sadiq qalan insanlar, Azərbaycan dövlətinə, dövlətçiliyinə sadiq insanlar, ziyalılar, ictimai-siyasi xadimlər bu gün də YAP-da təmsil olunmaqla partiyanın fəaliyyətində müstəsna xidmətlər göstərirlər”.
B.Əliyev, eyni zamanda, vurğulayıb ki, Ulu öndər Heydər Əliyevin rəhbərliyi ilə yaradılmış və bu gün Prezident İlham Əliyevin Sədri olduğu YAP-ın nüfuzu gündən-günə artmaqdadır. YAP-ın cəmiyyətin inkişafını hədəfləyən çoxsaylı sosial layihələr reallaşdırması, gəncləri dövlətçilik, milli maraqlar ətrafında sıx birləşdirməsi onun tərəfdarlarının sayının artmasına səbəb olub: “Əsası Ümummilli lider Heydər Əliyev tərəfindən qoyulan inkişaf strategiyasının Prezident İlham Əliyev tərəfindən uğurla davam etdirilməsi nəticəsində Azərbaycan nəinki Cənubi Qafqazda, ümumiyyətlə, Avropada lider dövlətə çevrilmişdir”.
Milli Məclisin deputatı Hacı Rəcəbli partiyanın 20 illik şərəfli və zəngin yol keçdiyini, Ümummilli lider Heydər Əliyevin və Onun layiqli davamçısı partiyanın Sədri, Azərbaycan Respublikasının Prezidenti cənab İlham Əliyevin rəhbərliyi ilə bir sıra uğurlara imza atdığını bildirib. O, qeyd edib ki, Yeni Azərbaycan Partiyasının yaranması ilə ölkədə demokratik cəmiyyətin formalaşmasının əsası qoyulub: “20 il Azərbaycanın möhkəmlənməsi, qüdrətlənməsi və dünyada tanınması ilidir. 20 ildir YAP Azərbaycan miqyasında siyasi nəhəngdir”.
Daha sonra çıxış edənlər Nizami Xudiyev və İradə Gülməmmədova da qeyd ediblər ki, bu gün Azərbaycanın lider dövlətə bütün dünyada söz sahibinə çevrilməsi məhz Ulu öndər Heydər Əliyevin tarixi fəaliyyətinin bariz nəticəsidir. Belə ki, həmin tarixi fəaliyyətin ən vacib və ən əhəmiyyətli məqamlarından biri, təbii ki, Yeni Azərbaycan Partiyasının yaradılmasıdır.
Tədbir tanınmış incəsənət ustalarının bir-birindən maraqlı konsert çıxışları ilə başa çatdırılıb.

Paylaş:

Baxılıb: 1371 dəfə