20 Sentyabr – Xankəndi, Xocalı, Xocavənd və Ağdərənin Azərbaycanla əbədi qovuşduğu gün

Bakı:

30 °C

50 %

2 m/s

Əlaqə

AZ RU EN

Ana səhifə / YAP xəbərləri / 20 Sentyabr – Xankəndi, Xocalı, Xocavənd və Ağdərənin Azərbaycanla əbədi qovuşduğu gün

20 Sentyabr – Xankəndi, Xocalı, Xocavənd və Ağdərənin Azərbaycanla əbədi qovuşduğu gün

20.09.2025 [15:29]

Azərbaycan tarixində hər bir günün, hər bir tarixi anın öz yeri var. Ancaq bəzi günlər var ki, onlar yalnız bir dövrü deyil, bütöv bir xalqın taleyini, milli kimliyini və gələcək yolunu müəyyənləşdirir. 20 Sentyabr da məhz belə günlərdən biridir. Bu tarix Xankəndi, Xocalı, Xocavənd və Ağdərə şəhərlərinin üzərində dalğalanan üçrəngli bayrağımızla dövlətimizin ərazi bütövlüyünü tam bərpa etməsinin, tarixi ədalətin təntənəsinin simvoluna çevrilmişdir.

Qarabağ torpaqları Azərbaycan tarixinin, mədəniyyətinin, dövlətçilik irsinin ayrılmaz hissəsidir. Ancaq uzun illər ərzində bu bölgə erməni separatizminin mərkəzinə çevrilmiş, xalqımız böyük itkilərə məruz qalmışdır. 1992-ci ilin fevralında Xocalıda törədilən dəhşətli soyqırımı isə təkcə Azərbaycan xalqına deyil, bütün bəşəriyyətə qarşı törədilmiş cinayət idi. Bu faciə heç vaxt unudulmayacaq və gələcək nəsillərə ədalət uğrunda mübarizə simvolu kimi ötürüləcək.

Azərbaycan xalqı isə heç zaman bu itkilərlə barışmadı. 2020-ci ildə 44 günlük Vətən müharibəsində əldə olunan şanlı Qələbə ilə illərin nisgili sona çatdı. 2023-cü ilin 19-20 sentyabrında həyata keçirilən antiterror tədbirləri nəticəsində isə Xankəndi, Xocalı, Xocavənd və Ağdərə şəhərləri tam olaraq Azərbaycan dövlətinin nəzarətinə qaytarıldı.

Azərbaycan Prezidenti, Müzəffər Ali Baş Komandan İlham Əliyevin qətiyyətli siyasəti nəticəsində ölkəmizin ərazi bütövlüyü bərpa olundu. Bu qələbənin əsasında yalnız hərbi güc deyil, həm də illərlə aparılan məqsədyönlü diplomatik fəaliyyət, iqtisadi müstəqillik və xalqın dövlət ətrafında sıx birliyi dayanırdı.

Bu gün artıq dünya birliyi Azərbaycanın haqlı mövqeyini qəbul edib. Qarabağda dövlət suverenliyinin tam bərpası beynəlxalq hüququn, tarixi ədalətin və regional təhlükəsizliyin təminatına çevrilib.

Qələbədən sonrakı mərhələ dövlətimizin ən mühüm vəzifələrindən birini təşkil edir – azad edilmiş ərazilərin bərpası və dirçəldilməsi. Xankəndi, Xocalı, Xocavənd və Ağdərədə yeni həyat başlayır. Müasir şəhərsalma prinsiplərinə uyğun layihələr icra olunur, infrastruktur qurulur, sosial obyektlər tikilir. Ən əsası isə – doğma yurdlarından didərgin düşmüş on minlərlə soydaşımız öz evlərinə qayıtmaq şansı əldə edir.

“Böyük Qayıdış” proqramı çərçivəsində Qarabağ yalnız Azərbaycanın deyil, bütövlükdə regionun inkişaf mərkəzinə çevriləcək. Bu, həm də iqtisadi gücümüzün artması, yeni iş yerlərinin açılması və milli rifahın yüksəlməsi deməkdir.

20 Sentyabr günü yalnız qələbənin qeyd edilməsi deyil, həm də şəhidlərimizin əziz xatirəsinə ehtiram günüdür. Bu torpaqlar uğrunda canını fəda etmiş qəhrəmanlarımızın ruhu xalqımızın yaddaşında daim yaşayacaq. Qazilərimizin şücaəti isə gələcək nəsillər üçün qəhrəmanlıq məktəbidir.

Xankəndi, Xocalı, Xocavənd və Ağdərənin azad olunması həm də milli həmrəyliyin, xalq-dövlət birliyinin güclü simvoludur. Bu birlik Azərbaycanı gələcəyə daha da inamla aparır.

20 Sentyabr – tariximizin qürur səhifəsi, dövlətimizin möhkəm iradəsinin, xalqımızın birliyinin və ərazi bütövlüyümüzün təntənəsidir. Bu gün artıq bütün dünya görür ki, Azərbaycan xalqı öz taleyinin sahibi, öz dövlətinin qüdrətinin təminatçısıdır.

Xankəndi, Xocalı, Xocavənd və Ağdərə şəhərlərinin üzərində dalğalanan üçrəngli bayrağımız bir daha sübut edir: Azərbaycan qalib dövlətdir, bu torpaqlar əbədi olaraq Azərbaycanındır!

Fidan Hüseynova

YAP Quba rayon təşkilatının sədri

Paylaş:

Baxılıb: 592 dəfə